މިދިޔަ ސަރުކާރުގައި ފެނަކަ ކޯޕަރޭޝަންގައި އޮތް މެނޭޖްމަންޓުން ހިންގި ކަމަށް ތުހުމަތުކުރާ ކޮރަޕްޝަންގެ ހަ މައްސަލައެއް ބަލަމުންދާ ކަމަށާއި އެ ތަހުގީގުތައް ލަސްވަނީ އެ ކުންފުނީގެ މިހާރުގެ މެނޭޖްމަންޓުން މައުލޫމާތު ހިފަހައްޓާތީ ކަމަށް އެންޓި ކޮރަޕްޝަން ކޮމިޝަން (އޭސީސީ) ގެ ރައީސް އާދަމް ޝާމިލް ވިދާޅުވެއްޖެ އެވެ.
މަޖިލީހުގެ ސްޓޭޓް އޯންޑް އެންޓަޕްރައިސަސް ކޮމިޓީއަށް އޭސީސީ ހާޒިރުކޮށް މިއަދު މެންބަރަކު ކުރި ސުވާލުތަކަށް ޖަވާބު ދެއްވަމުން ޝާމިލް ވިދާޅުވީ، މި މައްސަލަތައް ބެލުމަށް ކުރިމަތިވާ އެންމެ ބޮޑު ގޮންޖެހުމަކީ މައުލޫމާތު ލިބުމުގައި ލަސްތަކެއް އައުން ކަމަށެވެ.
"އަޅުގަނޑުމެން ފެނަކައިން މައުލޫމާތު ހޯދަންވެގެން މިސާލަކަށް އެޕްރީލް މަހު ފޮނުވާފަ އޮތް މައުލޫމާތު ހޯދަން ފޮނުވާފަ އޮތް ކަމެއް، މިއަދާ ހަމައަށްވެސް ނުލިބި އެބައޮތް، އެންމެ މިސާލެއް އަޅުގުނޑު މި ދެންނެވީ،" ޝާމިލް ވިދާޅުވި އެވެ.
މައުލޫމާތު ލިބުން ލަސްވުމުގެ ސަބަބުން، ފެނަކައިގެ އޮފީހަށް ވަދެ ތަހުގީގު ކުރިއަށް ގެންދިއުމަށް މިވަގުތަށް ބޭނުންވާ މައުލޫމާތުތައް ހޯދާފައިވާކަންވެސް އޭނާ ފާހަގަކުރެއްވި އެވެ.
"އަޅުގަނޑުމެން ބޭނުންވާ ސްޕީޑުގަ މައުލޫމާތު ނުލިބުނީމަ އަޅުގަނޑުމެން ވާނެ ފެނަކައަށް ގޮސް ސާޗުކޮށް ވަދެ މިހާރު އަޅުގަނޑުމެންނަށް މިވަގުތަށް މައްސަލަ ކުރިއަށް އޮތް ގޮތުން ބޭނުންވާ ހުރިހާ މައުލޫމާތެއް ކޮމިޝަނަށް ހޯދާފަ،" ޝާމިލްވެސް ވިދާޅުވި އެވެ.
އާދަޔާ ހިލާފަށް ޝަކުވާ، ބަލަނީ ހަ މައްސަލައެއް
މިއަދުގެ ކޮމިޓީ ބައްދަލުވުމުގައި އޭސީސީއިން އިތުރަށް ފާހަގަކުރީ މިދިޔަ މެނޭޖްމަންޓާ ގުޅުވާ، އޭސީސީއަށް އާދަޔާ ހިލާފަށް ގިނަ ޝަކުވާތަކެއް ލިބިފައިވާ ކަމަށެވެ. އެ މައްސަލަތައް ބެލުމަށް ކޮމިޝަނުގެ މުވައްޒަފުންގެ ވަގުތާއި ވަސީލަތްތައް އާދަޔާ ހިލާފަށް ބޭނުންކުރަން ޖެހުނުކަންވެސް އޭސީސީގެ ރައީސް ފާހަގަކުރެއްވި އެވެ.
މި މައްސަލަތައް މިދިޔަ އަހަރުން ފެށިގެންވެސް ފާހަގަވެ، ކުރިއަށް ގެންދާނެ ގޮތްތަކެއް ކަނޑައަޅާފައިވާނެ ކަމަށާއި ތަހުގީގު ކުރިއަށް ގެންދަނީ ވިސްނުންތެރިކަމާއެކު އެވެ. އެގޮތަށް ގެންދިއުމުން ކާމިޔާބީތަކެއް ލިބިފައިވާކަންވެސް އެ ކޮމިޝަނުން ފާހަގަކުރި އެވެ.
"ހަ މައްސަލައެއް މިވަގުތުވެސް ތުހުމަތާ އެއްކޮށް ފެނަކައިގެ އޭރުގެ ވެރިންނަށް އަޅުގަނޑުމެން މިދަނީ ތަހުގީގުކުރަމުން،" ޝާމިލް ވިދާޅުވި އެވެ.
މައްސަލަތަކުގެ ނަންބަރު މަދުވި ނަމަވެސް އެއީ ބޮޑެތި މައްސަލަތައް ކަމަށާއި އޭގެ ތެރޭގައި އެއް ބާވަތަކުން ލިބިފައިވާ އެތައް ޝަކުވާތަކެއް އެއް މައްސަލައެއްގެ ގޮތުގައި އޭސީސީއިން ބަލަމުންދާ ކަންވެސް ކޮމިޓީ މެންބަރުންނަށް ހިއްސާކުރެއްވި މައުލޫމާތުގައި އޭނާ ފާހަގަކުރެއްވި އެވެ.
"ފެނަކަ އުފެދުނު ހިސާބުން ފެށިގެން އަންގަމުން އެބަ ގެންދަން ރެކްރޫޓުމަންޓުގައި ހުރި މައްސަލަތަކަކީ މިއޭ, އުސޫލުތަކުގައި ހުރި މައްސަލަތަކަކީ މިއޭ. މިއަށް ޕެޗު ނާޅައިފިއްޔާ މިދިމާވާ ހުރިހާ މައްސަލައެއް ދިމާވާނެ ކަމަށް ދެންނެވިން," ކޮމިޓީގައި ވާހަކަ ދައްކަވަމުން އޭސީސީގެ ނައިބު ރައީސް އަބްދުއްސަލާމް ވިދާޅުވި އެވެ.
