ފެނަކަ ކޯޕަރޭޝަނުން މަހަކު ހަތަރު ލައްކައަށް ވުރެ ގިނަ ރުފިޔާ ދޭ ގޮތަށް ދޯންޏެއް ކުއްޔަށް ނެގީ ދަތުރުފަތުރަށް ކުރާ ހަރަދުތައް ކުޑުކުރަން ކަމަށް އެ ކުންފުނީގެ އެމްޑީ މުއާޒް މުހައްމަދު ރަޝީދު އެއްބަސްވެވަޑައިގެންފި އެވެ.
ފެނަކައަށް ދޯންޏެއް ކުއްޔަށް ނަގާފައި ވަނީ ސަރުކާރުން ހަރަދު ކުޑަކުރުމަށް މަސައްކަތް ކުރަމުންދާ ދަނޑިވަޅެއްގަ އެވެ. އަދި އެ ދޯނި ކުއްޔަށް ނަގާފައި ވަނީ ނުފޫޒުން ވަކި ކުންފުންޏަކުން ކަމަށް ވެސް ސޯޝަލް މީޑިއާގައި އަންނަނީ ތުހުމަތު ކުރަމުންނެވެ.
އެކަމާ ގުޅިގެން މުއާޒް "އަދަދު" އަށް ވިދާޅުވީ އެއް އަހަރު ދުވަހަށް ދޯންޏެއް ކުއްޔަށް ނަގާފައި ވަނީ އޮޑިމެރިން ނަމަކަށް ކިޔާ ކުންފުންޏަކުން ކަމަށާއި އެކަން ކުރީ ޕްރޮކިއުމަންޓުގެ އުސޫލުތަކާ އެއްގޮތަށް އެންމެ ރަނގަޅު ކުންފުންޏަށް ކަމަށެވެ.
ދޯނި ކުއްޔަށް ދިނުމުގައި އެއްވެސް ނުފޫޒެއް ނޯނާނެކަން ފާހަގަކުރައްވާ މުއާޒް ވިދާޅުވީ އެގޮތަށް ތުހުމަތު ކުރެވޭނަމަ، އޭސީސީއަށް މައްސަލަ ހުށަހަޅައިގެން ކުރިއަށް ގެންދިޔުމުގެ ފުރުސަތު ވެސް އޮންނާނެ ކަމަށެވެ.
"ކުރީ ސަރުކާރުން ދޯނި ކުއްޔަށް ނެގުމުގެ ބަދަލުގައި ފައިސާ ނަގަމުން ދިޔައީ ކޮންމެ ދަތުރަކަށް. އެހެން ހެދީމަ ކޮންމެ އަހަރަކު އެބަ ހަރަދުވޭ 100 މިލިއަނެއްހާ ރުފިޔާ. ނަމަވެސް ދޯންޏެއް ކުއްޔަށް ނެގުމުން 70 މިލިއަން ރުފިޔާ އެބަ ސަލާމަތް ކުރެވޭ،" އޭނާ ވިދާޅުވި އެވެ.
މުއާޒް ވިދާޅުވީ ކުއްޔަށް ނަގާފައިވާ ދޯނީގެ އެއް އަހަރު ދުވަހުގެ މުއްދަތު ހަމަވާންވާއިރަށް ފެނަކައަށް ދޯންޏެއް ގަންނަން މަސައްކަތް ކުރަމުންދާ ކަމަށާއި މިހާރު ވެސް ދޯންޏެއް ގަންނަން ގެޒެޓް ކޮށްފައިވާ ކަމަށެވެ.
އޭގެ އިތުރުން ލޭންޑިން ކްރާފްޓެއް ގަތުމަށް ވެސް އިއުލާންކޮށްފައިވާ ކަމަށާއި ދޯންޏާއި ލޭންޑިން ކްރާފްޓަށް ބޭނުންވާ މެޝިނަރީސް ވެސް ހޯދުމަށް އިއުލާންކޮށްފައިވާ ކަމަށް މުއާޒް ވިދާޅުވި އެވެ.
ފެނަކައިން އަންނަނީ އެ ކުންފުނީގެ ހަރަދު ކުޑަ ކުރުމަށް ކަމަށް ބުނެ، އެ ކުންފުންޏަށް ނަގާފައިވާ ކޮންޓްރެކްޓް މުވައްޒަފުން ވަކިކުރަމުންނެވެ. އެކަމާ ގުޅިގެން އެ ކުންފުންޏަށް ބޮޑެތި ފާޑުކިޔުންތައް އަމާޒުވެ، މުޒާހަރާތައް ވެސް އެކި ރަށްރަށުގައި ކުރި އެވެ.
