ރާއްޖޭގައި ހުންނަވާ އިނގިރޭސިވިލާތުގެ އޮނަރަރީ ކޮންސުލް ޑރ ޕޯލް އާރްތާ ވަން ޑްރީޝްގެ ސައިކަލު ވަގަށް ނެގުމުގެ ކުށުގައި މީހަކަށް ކުރި ދައުވާއަށް އިއުތިރާފުވުމުން އޭނާ 10 މަހަށް ޖަލަށް ލުމަށް ކްރިމިނަލް ކޯޓުން އިއްޔެ ހުކުމްކޮށްފި އެވެ.
އެ މައްސަލާގައި ދައުލަތުން ވައްކަމުގެ ދެ ދައުވާއެއް އުފުލީ ރ.ކަނދޮޅުދޫ، ދޮންވެލި، އަހުމަދު އިރުޝާންގެ މައްޗަށެވެ. އެއް ދައުވާއަކީ ސައިކަލު ވަގަށް ނެގުމުން ކުރި ދައުވާ އެކެވެ. އަނެއް ދައުވާ ކުރީ ސައިކަލުގެ މަޑިދަށުގައި އޮތް އައިނެއް ވަގަށް ނެގުމުން ކަމަށް ދައުވާގެ ލިޔެކިޔުންތަކުން އެނގެ އެވެ.
ދައުލަތުން ކްރިމިނަލް ކޯޓަށް ހުށަހަޅާފައިވާ ދައުވާގެ ލިޔުމުގައި ބުނާ ގޮތުން ޕޯލްގެ ސައިކަލު ވަގަށް ނެގީ، ނޮވެމްބަރު 14، 2023 ވަނަ ދުވަހުގެ ހެނދުނު 10:30 ހާއިރު ސަންސިޔާމް ބިލްޑިން ކުރިމަތީގައި ޕާކްކޮށްފައި ހުއްޓަ އެވެ.
ވައްކަމުގެ ދެ ދައުވާއަށް ވެސް އޭނާ އިއުތިރާފުވެފައިވާތީ ދައުލަތާ އެކު އިއުތިރާފު އެއްބަސްވުމެއް ހަދާފައިވެ އެވެ. ދެ ދައުވާއަށް އޭނާ 10 މަހަށް ޖަލަށް ލުމަށް ކޯޓުން ހުކުމްކުރީ ދައުލަތާއެކު ވެފައިވާ އެއްބަސްވުމުގައި އަދަބު ލުއި ކުރުމަށް ކަނޑައަޅާފައިވާ މިންގަނޑާ އެއް ގޮތަށެވެ.
