ޗައިނާއިން ރާއްޖެއަށް ކަނޑައާޅާފައި ހުންނަވާ ސަފީރު ވަން ލިޒން އާ ރައީސް ޑރ. މުހައްމަދު މުއިއްޒު ބައްދަލުކުރައްވައިފި އެވެ.
ރައީސް އޮފީހުގައި މިއަދު ހެދުނު ކުރިއަށްދިޔަ މި ބައްދަލުވުމާ ގުޅޭގޮތުން އެ އޮފީހުން ބުނެފައިވަނީ، މި ބައްދަލުވުމުގައި ދެ ގައުމުގެ ގުޅުން އިތުރަށް ބަދަހިކުރުމާ ގުޅޭގޮތުން މަޝްވަރާކުރެވިފައިވާ ކަމަށެވެ. ޕީއެންސީގެ ވެރިކަމުގައި ރާއްޖެއިން ގެންދަނީ ޗައިނާއާއެކު ވަރަށް ގާތް ގުޅުމެއް ބާއްވަމުންނެވެ.
މިއަދުގެ ބައްދަލުވުމުގައި މި އަހަރުގެ ޖެނުއަރީގައި ރައީސް މުއިއްޒު ޗައިނާއަށް ކުރެއްވި ދަތުރުގައި އެ ގައުމުގެ ރައީސް ޝީ ޖިންޕިން އާ އެކު މަޝްވަރާކުރެއްވި ކަންކަމާއި، އެއްބަސްވެވަޑައިގެންފައިވާ ކަންކަން ތަންފީޒުކޮށް ހަލުވި ދުވެލީގައި ކުރިއަށްގެންދިއުމަށް މަޝްވަރާ ކުރެވުނު ކަމަށްވެސް ރައީސް އޮފީހުން ބުނެފައިވެ އެވެ.
އެކަންކަމުގެ ދުވެލި ހަލުވި ކުރަން ކުރެވެންހުރި ކަންކަމާ ގުޅޭގޮތުން ރައީސް، ސަފީރާ ހިޔާލު ބަދަލުކުރައްވާފައިވާއިރު، އެ ދަތުރުގައި ވި ގިނަ އެއްބަސްވުންތައް ސަރުކާރުން ވަނީ ސިއްރުކޮށްފަ އެވެ.
ޗައިނާގެ ސަފީރު މިއަދުގެ ބައްދަލުވުމުގައި ދެއްކެވި ވާހަކައިގައި ރާއްޖެއަށް މިހާރު އެންމެ ބޮޑަށް ބޭނުންވާ ކަންކަން އޮޅުންފިލުއްވާ އެކަންކަމުގައި "ވެވެންހުރި" މިންވަރަކުން އެއްބާރުލުން ދެއްވާނެ ކަމަށާއި ހާއްސަކޮށް ފަތުރުވެރިކަން ކުރިއެރުވުމާ ގުޅޭގޮތުން ވާހަކަދެއްކެވި ކަމަށްވެސް ރައީސް އޮފީހުން ބުނެފައިވެ އެވެ.
މި ބައްދަލުވުމުގައި ރައީސްގެ އިތުރުން ފޮރިން މިނިސްޓަރު މޫސާ ޒަމީރާއި ރާއްޖޭގައި ހުންނަ ޗައިނާ އެމްބަސީގެ އިސް އޮފިޝަލުން ބައިވެރިވި އެވެ.
ބައްދަލުވުމާ ގުޅޭގޮތުން ދިން މައުލޫމާތު ނިންމާލަމުން ރައީސް އޮފީހުން ބުނެފައިވަނީ "މި ސަރުކާރުގެ ހާރިޖީ ސިޔާސަތަކީ ހުރިހާ ގައުމަކާ ގުޅިގެން، ވަޒަން ހަމަކޮށް ހަލުވި، ބާރުމިނުގައި ގައުމު ތަރައްގީކުރުމަށް މަސައްކަތްކުރުން،" ކަމަށެވެ.
