ލަކުޑި އާއި ފްލައިވުޑުގެ ނަމުގައި ރާއްޖެއަށް އެތެރެކޮށް ކަސްޓަމްސްއިން ބޭރުކުރިފަހުން އަތުލައިގަތް ދެ ކޮންޓޭނަރެއްގައި ހުރި 22 ވެހިކަލަކާއި ސްޕެއާ ޕާޓްސް ދައުލަތަށް ނަގަން ސިވިލް ކޯޓުން ހުކުމްކޮށްފި އެވެ.
އެ ކޮންޓޭނަރުތައް ރާއްޖެއަށް އެތެރެ ކުރީ އަލީ އަސްބާހު، ލާޓް، ގދ. ތިނަދޫ ގެ ނަމުގައި ރެޖިސްޓަރީ ކޮށްފައިވާ އަމިއްލަ ފަރުދުންގެ ވިޔަފާރި، މެޓްރޮކްސްއިން 2019 ވަނަ އަހަރު އެވެ.
ސިވިލް ކޯޓުން އިއްޔެ ކުރި ހުކުމުގައި ބުނެފައި ވަނީ ލަކުޑި އާއި ފްލައިވުޑުގެ ނަމުގައި ރާއްޖެއަށް އެތެރެކުރި ވެހިކަލްތަކާއި ސްޕެއާ ޕާޓްސްތަކާއި މެޓްރޮކްސްއާ އެއްވެސް ގުޅުމެއް ނެތް ކަމަށް މެޓްރޮކްސްގެ ވެރިފަރާތް، އަސްބާހު ބުނެފައިވީ ނަމަވެސް އެ މުދާ އެތެރެ ކޮށްފައި ވަނީ ކަސްޓަމްސްއިން އެ ވިޔަފާރިއަށް ދޫކޮށްފައިވާ ޔޫސާ ނޭމާއި ޕާސްވޯޑު ބޭނުން ކޮށްގެންކަން އެނގޭތީ އާއި އެ ލޮގިން ބޭނުން ކުރީ އަސްބާހު ނޫންކަން ޝަރީއަތަށް ސާބިތު ކޮށްދެވިފައި ނުވާތީ އެ ވެހިކަލާއި ސްޕެއާ ޕާޓްސް ދައުލަތަށް ނެގުމުގެ އަމުރު ދީ ހުކުމް ކުރާ ކަމަށެވެ.
އެ މައްސަލައިގެ ޝަރީއަތުގައި އަސްބާހު ބުނެފައި ވަނީ އެ މުދަލަކީ މެޓްރޮކްސްގެ މުދަލެއް ނޫން ކަމަށާއި އެ މުދާ ދައުލަތަށް ނެގުމާމެދު އެއްވެސް އިއުތިރާޒެއް ނެތް ކަމަށެވެ. ނަމަވެސް އެހެން ބުނުން ފިޔަވައި އެކަން ސާބިތު ކޮށްދޭން އިތުރު އެއްވެސް ހެއްކެއް އޭނާގެ ފަރާތުން ޝަރީއަތަށް ހުށަހަޅައިފައެއް ނުވެ އެވެ.
އެ ކޮންޓޭނަރުތަކުގައި އެތެރެކުރި ވެހިކަލްތައް ދައުލަތަށް ނަގައިދިނުމަށް އެދި ކަސްޓަމްސްއިން ސިވިލް ކޯޓަށް ހުށަހެޅި މައްސަލައިގައި ދައުލަތުން ބުނެފައި ވަނީ އެ ދެ ކޮންޓޭނަރު ޑިކްލެއާ ކުރުމަށް މެޓްރޮކްސްއަށް ދީފައިވާ ލޮގިން ބޭނުން ކޮށްގެން މުދާ ޑިކްލެއާކޮށް ފޯމު ހުށަހަޅާފައިވާ ކަމަށާއި އެ ދެ ކޮންޓޭނަރުގެ "ސީލް" ވެސް ކަނޑައިފައި ވަނީ ކަސްޓަމްސްއަށް އެނގުމަކައި ނުލައި ކަމަށެވެ. އަދި އެ ވެހިކަލްތައް އެ ކޮންޓޭނަރުތަކުން ނެރުނުކަން ކަސްޓަމްސްއިން ކުރިއަށް ގެންދިޔަ ތަހުގީގަށް ސާބިތުވެފައިވާ ކަމަށެވެ.
އެ ވާހަކަތަކަށް ރިއާޔަތްކޮށް ސިވިލް ކޯޓުން ކުރި ހުކުމުގައި ވަނީ ކަސްޓަމްސްގެ އާންމު ގަވާއިދުގެ 521 ވަނަ މާއްދާގައި "ކަސްޓަމްސްއާއެކު އިލެކްޓްރޯނިކް ވަސީލަތްތައް މެދުވެރިކޮށް މުއާމަލާތު ކުރުމަށްޓަކައި ކަސްޓަމަސްގެ ހިދުމަތް ހޯދާ ފަރާތްތަކަށް ދެވޭ ޔޫސާ ނޭމާއި ޕާސްވޯޑަށާއި ކަސްޓަމްސްގައި ރެޖިސްޓަރީ ކުރެވިފައިވާ އީމެއިލް އެޑްރެހުގެ ޕާސްވޯޑަށް ރައްކާތެރިވުމަކީ، އެ ހިދުމަތް ހޯދާ ފަރާތެއްގެ ޒިންމާއެއް،" އޮންނަކަން ފާހަގަކޮށްފަ އެވެ.
އޭގެ އިތުރުން، މުދާ ޑިކްލެއާ ކުރުމަށް ހުށަހަޅާފައި ވަނީ މެޓްރޮކްސްގެ ލޮގިންއިން ކަމަށް ވާތީއާއި އެއީ މެޓްރޮކްސްގެ މުދާ ނޫން ކަމަށް ބުނާ ބުނުން ސާބިތުކޮށްދޭން އެކަށީގެންވާވަރުގެ ދިފާއުއެއް އަސްބާހުގެ ފަރާތުން ހުށަހަޅައިފައި ނުވާތީ އެ ވެހިކަލްތަކަކީ މެޓްރޮކްސްއަށް ނިސްބަތްވާ މުދާ ނޫންކަން ޝަރީއަތަށް ސާބިތު ނުވާ ކަމަށް ވެސް ހުކުމުގައި ބުނެފައިވެ އެވެ.
