ހަދުބޮޑުވެ, ބިޒްނަސް ސެންޓާ ކޯޕަރޭޝަން (ބީސީސީ) އިން ހިންގަމުންދާ އެސްއެމް އީ ހަބުގެ ދެ ފްލޯއެއް ދޫކޮށްލަން ނިންމާފައިވާ ކަމަށް އެ ކުންފުނީގެ މެނޭޖިން އިބްރާހިމް ޒިޔާއު ވިދާޅުވެއްޖެ އެވެ.
މިކަމާ ގުޅޭގޮތުން "އަދަދު" އިން ކުރި ސުވާލަކަށް ޖަވާބުދެއްވަމުން އޭނާ ވިދާޅުވީ ދޫކޮށްލަން ނިންމާފައިވަނީ އެސްއެމްއީ ހަބުގެ ގްރައުންޑް ފްލޯ އަދި ދެވަނަ ފްލޯ ކަމަށެވެ. އެހެން ނަމަވެސް ކުދި ވިޔަފާރިތަކުން ކިއޮސްކްތައް ހިންގާ ފުރަތަމަ ފްލޯ މިހާރުވެސް ހިންގާ ގޮތަށް ކުރިއަށް ގެންދަން ނިންމާފައިވާ ކަމަށް ވެސް އޭނާ ވިދާޅުވި އެވެ. ދެ ފްލޯ ދޫކޮށްލަން ނިންމާފައިވަނީ ޖުލައި މަސް ނިމުމުންނެވެ.
"މެދުތެރޭގަ ތިބޭނެ 19 ވެންޑާސް، އެ 19 ވެންޑާސް ހަމަ ތިބޭނެ، ކާބޯތަކެތި ވިއްކަން، ހޯމް ބޭސްޑް ކުދި ވިޔަފާރިތައް އެއީ، އެތަނުން އެފަދަ އެއްވެސް ބަޔަކު ނުނެރޭނެ،"
ޒިޔާއު ވިދާޅުވީ ދޫކޮށްލަން ނިންމާފައިވާ ދެ ފްލޯއަކީ ބީސީސީއިން އާމްދަނީ ހޯދަން ހިންގާ ދެ ފްލޯ ކަމަށެވެ.
"ހަރަދު ބޮޑުވެގެން މި ދޫކޮށްލަނީ ބީސީސީއިން ހިންގާ ދެ ފްލޯ، ސޯޝަލް މީޑިއާގައި އެ ދެނީ ނުބައި މެސެޖެއް،" ކުދި ވިޔަފާރިތަކާއެކު އެސްއެމްއީ ހަބު އެއްކޮށް ބަންދުކުރަން ނިންމާފައިވާ ކަމަށް ބުނެ ފެތުރޭ އަޑުތަކާ ގުޅިގެން އޭނާ ވިދާޅުވި އެވެ.
ބީސީސީއިން ދޫކޮށްލަން ނިންމި ދެ ފްލޯގެ ތެރެއިން މަތީ ފްލޯއަކީ އެކި ކަހަލަ ގޭމްތައް ކުޅެވޭ ގޮތަށް ތަރައްގީކޮށް ހިންގަމުންދިޔަ ފްލޯއެކެވެ. އެސްއެމްއީ ހަބަކީ މިދިޔަ ސަރުކާރުގެ އިކޮނޮމިކް މިނިސްޓްރީން ކުރިއަށް ގެންދިޔަ މަޝްރޫއެއްގެ ދަށުން ވުޖޫދަށް ގެނެސްފައިވާ ތަނެކެވެ.
