ރައީސް ޑރ. މުހައްމަދު މުއިއްޒު ވެރިކަމާ ހަވާލުވެ ވަޑައިގެންނެވި އިރު، މާލީ ހާލަތު ވެސް ހިމެނޭ ގޮތުން ރާއްޖޭގެ ހުރިހާ ދާއިރާއެއްގެ ހާލަތު އޮތް ގޮތް އެނގިވަޑައިގަންނަވާނެ ކަމަށް ކުރީގެ ރައީސް އަބްދުﷲ ޔާމީން އަބްދުލްގައްޔޫމް މިރޭ ވިދާޅުވެއްޖެ އެވެ.
ޔާމީނު އިސްކޮށް އުޅުއްވާ ޕީޕަލްސް ނެޝަނަލް ފްރޮންޓް (ޕީއެންއެފް) އިން މިރޭ ބޭއްވި ޖަލްސާގައި ޔާމީން ވިދާޅުވީ ރާއްޖޭގެ މިހާރު އޮތް އިގްތިސާދީ ހާލަތު ޓްރާންސިޝަން މުއްދަތުގައި ފަސޭހަކަމާއެކު ބެލުމުގެ ފުރުސަތު ރައީސްއަށް ލިބިވަޑައިގެންފައި ވާނެ ކަމަށެވެ. މާލީ އިދާރާތަކާއި މިނިސްޓްރީތަކުގެ ކަރުދާސްތައް ގެނައުމުން އެކަން ބައިގަޑިއިރުން އެނގިވަޑައިގަންނަވާނެ ކަމަށް ވެސް އެމަނިކުފާނު ވިދާޅުވި އެވެ.
ޓްރާންސިޝަން މުއްދަތުގައި އެކަމުގައި ގާބިލު ބޭފުޅުން އުޅުއްވިކަން ފާހަގަކުރައްވައި ޔާމީން ވިދާޅުވީ އޭރު ވެސް އިގްތިސާދީ ކަންކަމާ ކަންބޮޑުވުމެއް ނެތް ކަމަށް ރައީސް މުއިއްޒު ވިދާޅުވެފައިވާ ކަމަށެވެ.
"ބަހާ އަމަލާ ދިމާވާނެ ކަމަށް ރައީސް މުއިއްޒު ވިދާޅުވި. ހަމަ ރައްޔިތުންނަށް ވަރަށް ހިތްހަމަޖެހޭ ގޮތަށް ހިނިތުންވުމާއެކު އެ ވިދާޅުވަނީ ތިމަންނަމެން މި ހުރިހާ ކަމެއް އެނގެއޭ، ހާސްވާންޖެހޭ ކަންބޮޑުވާން ޖެހޭ އެއްވެސް ކަމެއް ނެތޭ. ދެން މީގަ އަޅުގަނޑުމެން ދަންނަވާލަން ބޭނުންވަނީ ކުރީ ސަރުކާރަށް ވެސް ލިބުނު ގޮތަށް މި ސަރުކާރަށް ވެސް ލިބުނު ޓްރާންސިޝަން ޕީރިއަޑެއް. ހަމަ ހޭބޯނާރައި ދިމްޔާތުގައި އެންމެން ކުރީ މި މަސައްކަތް،" ޔާމީން ވިދާޅުވި އެވެ.
ނަމަވެސް ބަންދަށް ކަނޑާފައި "ހަނީމޫން ޕީރިއަޑް" ނުނިމެނީސް ސަރުކާރުން ބުނާ ހުރިހާ ކަމެއް ކުރަން ކަމަރު ބަންނަން އަންގައިފި ކަމަށާއި އޭގެއިން ރައްޔިތުންނަށް ދޭ މެސެޖަކީ ރައީސް މުއިއްޒުގެ ބަހާއި އަމަލާ ދިމާ ނުވާކަން ކަމަށް ވެސް ޔާމީނު ވިދާޅުވި އެވެ.
ރާއްޖޭގެ ވަރުގަދަ މުއައްސަސާތަކުގައި ތިބި މީހުން ރައްޔިތުންނަށް ޖަވާބުދާރީވާން ޖެހޭ ކަމަށާއި ޖަވާބުދާރީވާން ޖެހޭ މި ހާލަތުގައި ހަނު ތިއްބަވަނީ ކީއްވެތޯ ސުވާލު އުފެދޭ ކަމަށް ވެސް އެމަނިކުފާނު ވިދާޅުވި އެވެ.
"ރައްޔިތުންނަށް އެބޭފުޅުން އޯވް ކުރާ އެކްސްޕެލެނޭޝަންތަކެއް. ޖަވާބުދާރީވާން ޖެހޭ ހާލަތުގައޭ މިއޮތީ. ހަމައެކަނި ހިތިބޭސް ބޯ ވާހަކައެއް ނޫނޭ އަޅުގަނޑުމެން ދައްކަންވީ. ކީހާޅެން ފަރިއްސަށްވެގެންދާއިރު ހަނު މި ތިބެނީ ކީއްވެތޯއޭ" ޔާމީން ވިދާޅުވި އެވެ.
މި ސަރުކާރުން އިގްތިސާދީ ހާލަތު ރަނގަޅު ކުރެވޭނެކަމުގެ ޔަގީންކަން ވެރިކަމާ ހަވާލުވުމަށްފަހު ވެސް ދިނެވެ. ނަމަވެސް ސަރުކާރުގެ ރާގު ފަހުން ބަދަލުވެ، ކުރީ ސަރުކާރާ ހެދި ހާލަތު ގޯސްވެފައިވާ ކަމަށް ފަހުން ސަރުކާރުން ވަނީ ބުނެފަ އެވެ.
