ރައްކާތެރިކަމުގެ މިންގަނޑުތަކާ ހިލާފަށް އާތު ލީކޭޖް ސާކިއުޓް ބްރޭކާ (އީއެލްސީބީ) ހަރުނުކުރާ ބަގުބައްތިތަކަށް މި މަހަށްފަހު ކަރަންޓު ދިނުން ހުއްޓާލަން ފެނަކަ ކޯޕަރޭޝަނުން ނިންމައިފި އެވެ.
ރ. އުނގޫފާރުގައި އީއެލްސީބީ ހަރުނުކޮށް ހުރި މަގުބައްތިއަކުން ކަރަންޓުގައި ޒުވާނަކު ޖެހި މަރުވުމާ ގުޅިގެން، މުޅި ރާއްޖޭގައި ފެނަކައިން ކުރިއަށް ގެންދިޔަ އިންސްޕެކްޝަންގައި ގިނަ ރަށްތަކުގައި އީއެލްސީބީ ހަރުނުކުރާ މަގުބައްތި ހުރިކަން ވަނީ ހާމަވެފަ އެވެ.
ފެނަކައިން ނެރުނު އިއުލާނެއްގައި ބުނީ އެ ކުންފުނިން ކަރަންޓުގެ ހިދުމަތް ދޭ މަގުބައްތިއަށް މީގެ ފަހުން ކަރަންޓު ދޫކުރެވޭނީ ދޭ ނަމޫނާ ކުރެހުމާ އެއްގޮތަށް ސަލާމަތީ މިންގަނޑުތަކަށް ފެތޭ ގޮތަށް ހަދާފައިހުންނަ ސަބް ޑީބީ ހަރުކޮށްގެން ކަމަށް ޖޫން 9، ގައި ހިދުމަތް ދޭ ކައުންސިލްތަކަށް އަންގާފައިވާ ކަމަށެވެ.
ސަބް ޑީބީ ހަރުކުރަން ޖޫން 27، ގެ ނިޔަލަށް ފެނަކައިން މުއްދަތު ދިން ނަމަވެސް، ގިނަ ކައުންސިލުތަކުގެ އެދުމުގެ މަތިންނާއި އަދި މަސައްކަތުގެ މުހިންމުކަމުން ޖުލައި މަހުގެ ނިޔަލަށް މުއްދަތު ވަނީ އިތުރުކޮށްފަ އެވެ.
"މި މުއްދަތުގެ ތެރޭގައި ކައުންސިލުތަކުން ތަކެތި ފޯރުކޮށްދިނުމުން ފެނަކައިން ހިލޭ ސަބް ޑީބީތައް އިންސްޓޯލްކޮށްދޭނެ. ނުވަތަ ފެނަކައިން ތަކެތި ފޯރުކޮށް ބިލު ކުރެވޭ ގޮތަށް ކުންފުނީގެ ޓެކްނިކަލް މުވައްޒަފުންގެ އެހީތެރިކަމާއެކު ސަބްޑީބީ ތައްޔާރުކޮށް ހަރުކޮށްދިނުމުގެ މަސައްކަތް ކޮށްދެވިދާނެ،" ފެނަކައިން ބުންޏެވެ.
މިންގަނޑާ އެއްގޮތަށް ކައުންސިލުތަކުން މަގުބައްތިތައް ރަނގަޅު ކުރޭތޯ ފެނަކައިގެ ބްރާންޗުތަކުން މޮނިޓާ ކުރަމުންދާނެ ކަމަށް ފެނަކައިން ބުނެ އެވެ.
ކުންފުނިން އަބަދުވެސް މަސައްކަތް ކުރަމުންދާނީ ރައްޔިތުންނާ ގުޅުން ހުރި މިފަދަ ކަންކަމަށް ހާއްސަ އިސްކަމެއް ދީ، ރައްކާތެރި އަދި ރައްޔިތުން ބަލައިގަންނާނެ ފަދަ ހިދުމަތް ފޯރުކޮށްދިނުމަށް ކަމަށް ފެނަކައިން ބުނެ އެވެ.
