ހުޅުމާލޭ ދެވަނަ ފިޔަވަހީގައި މިކްސްޑް ޔޫސް 10 ޓަވަރު އަޅަން، އެންމެ ބޮޑު އަގެއް ހުށަހަޅާ ފަރާތަކަށް 112،288.14 އަކަފޫޓުގެ ބިން ވިއްކަން ހައުސިން ޑިވެލޮޕްމަންޓު ކޯޕަރޭޝަނުން އިއުލާނު ކޮށްފި އެވެ.
އެޗްޑީސީން މިއަދު ކުރި އިއުލާނުގައި ބުނީ ޓަވަރުތައް އެޅުމުގެ ޝައުގުވެރިކަން ހުރި ހުރިހާ ފަރާތްތަކަށް ވެސް ހަމަހަމަ ފުރުސަތެއް ދިނުމުގެ ގޮތުން އެކަމަށް އެދި އީއޯއައި ހުށަހެޅުމުގެ ފުރުސަތު ހުރިހާ ފަރާތްތަކަށް ވެސް ހުޅުވާލައިފައިވާ ކަމަށެވެ.
މިކްސްޑް ޔޫސް ޓަވަރުތައް އިމާރާތް ކުރުމަށް ދޫކުރަން އެޗްޑީސީން ނިންމާފައި ވަނީ ބިން ވިއްކާ އުސޫލުގެ ދަށުންނެވެ.
އެ ޓަވަރުތައް އިމާރާތް ކުރުމަށް އެޗްޑީސީން ކަނޑައަޅައިފައި ވަނީ 14 ބުރި އާއި 15 ބުރި އަދި 20 ބުރި އަށެވެ.
އޭގެ ތެރޭގައި ހިމެނެނީ:
- 9559.74 އަކަފޫޓުގެ ބިމެއް
- 10846.46 އަކަފޫޓުގެ ބިމެއް
- 12821.42 އަކަފޫޓުގެ ބިމެއް
- 9622.60 އަކަފޫޓުގެ ބިމެއް
- 8701.43 އަކަފޫޓުގެ ބިމެއް
- 8661.60 އަކަފޫޓުގެ ބިމެއް
- 15098.85 އަކަފޫޓުގެ ބިމެއް
- 14525.56 އަކަފޫޓުގެ ބިމެއް
- 11256.24 އަކަފޫޓުގެ ބިމެއް
- 11194.24 އަކަފޫޓުގެ ބިމެއް
އެޗްޑީސީން ބުނީ އެ ޓަވަރުތައް އިމާރާތް ކުރުމަށް ޝައުގުވެރިކަން ފާޅުކޮށް އިއޯއައި ހުށަހަޅާ ފަރާތްތަކުގެ ތެރެއިން މަސައްކަތް ހަވާލު ކުރާނެ ފަރާތެއް ކަނޑައެޅުމުގައި އިސްކަން ދޭނީ ބިން ވިއްކަން ހުށަހަޅާ ރޭޓަށާއި ފައިސާ ދައްކަން ހުށަހަޅާ ގޮތެއްގެ އިތުރުން ހުށަހެޅުން ހުށަހަޅާ ފަރާތުގެ މާލީ ގާބިލު ކަމަށް ކަމަށެެވެ.
ނަމަވެސް ކޮންމެ ވަގުތަކު ވެސް ހުށަހަޅާ ހުރިހާ އީއޯއައިއެއް ބާތިލު ކުރުމުގެ ބާރު އެޗްޑީސީއަށް ލިބިގެންވާ ކަމަށް އެ އިއުލާނުގައި ބުނެފައިވެ އެވެ. އެފަދަ ހާލަތެއް ކުރިމަތިވެ، އީއޯއައިތައް ބާތިލު ކުރާނަމަ، އީއޯއައި ހުށަހެޅި ކުންފުނިތަކަށް އެކަން އަންގާނެ ކަމަށް ވެސް އިއުލާނުގައި ބުނެފައިވެ އެވެ.
އެ ޓަވަރުތައް އިމާރާތް ކުރުމަށް ޝައުގުވެރިކަން ހުރި ފަރާތްތަކުން ބިން ގަތުމަށް ހުށަހަޅާ އަގު (އަކަ ފޫޓަކަށް ކިޔާ އަގު) ގެ އިތުރުން އަގު ދައްކަން ހުށަހަޅާ މުއްދަތު އެނގޭނޭހެން އީއޯއައި އެޕްލިކޭޝަން ފޯމު ފުރިހަމަކޮށް އެ ކޯޕަރޭޝަނަށް ހުށަހެޅުމަށް އިއުލާނުގައި އެދިފައިވެ އެވެ.
