ޓޫރިޒަމް ދާއިރާގެ އުފެއްދުންތަކާއި ހިދުމަތުން ނަގާ ޓެކްސް (ޓީޖީއެސްޓީ) ބޮޑުކުރުމަކީ "ރަންބިސް އަޅާ ކުކުޅު ފުނޑައިލުން" ކަަމަށް ސިފަކުރައްވައި، ޓެކްސް ބޮޑުކުރުމާ ދެކޮޅަށް ވެލިދޫ ދާއިރާގެ މެންބަރު މުހައްމަދު އައްބާސް ތެދުވެވަޑައިގެންފި އެވެ.
އައްބާސް ނިސްބަތްވެވަޑައިގަންނަވާ މޯލްޑިވްސް ޑިވެލޮޕްމެންޓް އެލަޔަންްސް (އެމްޑީއޭ) އަކީ ސަރުކާރު ހިންގާ ޕީއެންސީއާ ކޯލިޝަން ހަދައި، ސަރުކާރަށް ތާއީދުކޮށްގެން އޮތް ޕާޓީ އެކެވެ.
ސަރުކާރުގެ ފަރާތުން ފުނަދޫ ދާއިރާގެ ޕީއެންސީ މެންބަރު މުހައްމަދު މަމްދޫހު ހުށަހަޅުއްވާފައިވާ ދައުލަތުގެ ދަރަންޏާ ބެހޭ ބިލަށް މަޖިލީހުގެ މިއަދުގެ ޖަލްސާގައި ކުރި ބަހުސްގައި އައްބާސް ވިދާޅުވީ ޓީޖީއެސްޓީ ބޮޑުކުރުމަކީ ދައުލަތަށް މިހާރު ދިމާވެފައިވާ މާލީ ދަތިކަމަށް އެއްވެސް ހައްލެއް ލިބޭނެ ކަމެއް ނޫން ކަމަށެވެ.
މިއީ ޓީޖީއެސްޓީ ބޮޑުކުރަން މުނާސަބު ވަގުތެއް ނޫން ކަަމަށާއި ރައްޔިތުން ތިބީ ވަރަށް ނިކަމެތި ހާލުގައި ކަަމަށް ވެސް އޭނާ ވިދާޅުވި އެވެ.
"މި ވަގުތަކީ ޓީޖީއެސްޓީ ބޮޑުކުރަން ވެސް އެންމެ މުނާސަބު ވަގުތެއް ނޫން، ސަބަބަކަށް ވަނީ މިރާއްޖެއަށް ބޭންކްތަކުން ލޯނު ނަގައިގެން އިންވެސްޓްކޮށްފައި ތިއްބެވި އިންވެސްޓަރުން ތިބީ ފީސިބިލިޓީ ހަދައިގެން އެލޯނުތައް ނަގައިގެން. އަޅުގަނޑުމެން ކުއްލިއަކަށް ޓީޖީއެސްޓީ ބޮޑުކޮށްފިއްޔާ އެ އިންވެސްޓަރުންގެ ތެރެއިން ގިނަ ބަޔަކު ބޭންކްރަޕްޓްވާނެ، ނުވަތަ އެ އިންވެސްޓަރުން ރާއްޖެއަށް އިތުރަށް އިންވެސްޓްކުރުމާ މެދު ދެވަނަ ވިސްނެވުމަކަށް ދާނެ،" އައްބާސް ވިދާޅުވި އެވެ.
ޓެކުސް ބޮޑުކޮށްފިއްޔާ ރާއްޖެއަށް އަންނަން ތިބި އިންވެސްޓަރުން ނައުމަކީ ވެސް އެކަށީގެންވާ ކަމެއް ކަމަށާއި އެއީ ދުނިޔޭގެ ކަންކޮޅުތަކުގައި ބޮޑެތި ހަނގުރާމަތައް ހިނގަމުންދާތީ ކަމަށް ވެސް އޭނާ ވިދާޅުވި އެެވެ.
"މިފަދަ ނާޒުކުހާލަތެއްގައި އަޅުގަނޑުމެންގެ ރަންބިސްއަޅާ ކުކުޅު ފުނޑައިލަން [އުޅުމަށް ވުރެ]، ނުވަތަ އަޅުގަނޑުމެންގެ ވިޔަފާރިވެރިންނާ ދޭތެރޭގައި އަޅުގަނޑުމެން އިހުމާލުވުމަށް ވުރެ އެންމެ އައުލާކަން ބޮޑީ ދައުލަތުން މިހާރު ވެސް، މިހާރު ވެސް މޫލާފައި ހުރި ވަގުންތައް ބޭރުކޮށް، ވައްކަންކުރާ ދޮރުތައް ބަންދުކޮށް، އޭސީސީ ވެސް މިއަށް ވުރެ ބޮޑަށް ފާރަވެރިވެ، އަދި އޮޑިޓާ ޖެނެރަލް ވެސް ޒިންމާދާރުކަމާ އެކު ޒިންމާދާރު އޮޑިޓްތަކެއް ކުރައްވައި، ސަރުކާރަށް ސާފުބަހުން ބުނެދޭންވީ ގެއްލުންވަނީ މިވެނިކުންފުނިތަކަކުންނޭ،" އައްބާސް ވިދާޅުވި އެވެ.
އޭނާ ވިދާޅުވި ގޮތުގައި ދައުލަތަށް ގެއްލުންވާ އެއްވެސް ކުންފުންޏަކުން މިހާލަތުގައި އިތުރަށް ވިޔަފާރިކުރާކަށް ނުޖެހެ އެވެ. ރައްޔިތުން އަތުން ނަގާ ޓެކްސް އަބަދު ބޮޑުކޮށް، ވިޔަފާރިވެރިން އަތުން ނަގާ ޓެކުސް ހައްދެއް ނެތް ވަރަށް ބޮޑުކޮށްގެން ވާނެ މާބޮޑު ފައިދާއެއް ނެތް ކަމަށެވެ.
