ހުޅުމާލެއިން ދޫކޮށްފައިވާ ގޯތިތަކާއި ވިއްކާފައިވާ ބިންތަކުގައި ހައުސިން ޑިވެލޮޕްމަންޓު ކޯޕަރޭޝަން (އެޗްޑީސީ) ގެ އުސޫލުތަކާ ހިލާފަށް މަސައްކަތްކޮށް އިމާރާތް ކުރާނަމަ ފިޔަވަޅު އަޅާނެ ކަމުގެ އިންޒާރު އެ ކުންފުނިން މިއަދު ދީފި އެވެ.
އެޗްޑީސީއިން ނެރުނު ބަޔާނެއްގައި ބުނި ގޮތުގައި މިހާރަކަށް އައިސް ހުޅުމާލެއިން ވިއްކާފައިވާ، ކުއްޔަށްދީފައިވާ، ނުވަތަ އިޖުތިމާއީ ބޯހިޔާވަހިކަމުގެ ތެރެއިން ދޫކޮށްފައިވާ ގޯތިތަކުގައި އިމާރާތް ކުރާއިރު އެ ކުންފުނީގެ އުސޫލުތަކާ ހިލާފުވާކަން އެ ކޯޕަރޭޝަނަށް ފާހަގަކުރެވިފައިވެ އެވެ.
"އިމާރާތް ކުރާއިރު މި ކޯޕަރޭޝަނުން ހަދާފައިވާ ގަވާއިދުތަކާއި އުސޫލުތަކަށް ބެލުމެއްނެތި، އިމާރާތް ކުރުމާއި ގުޅޭ ހުއްދަތައް ނުނަގާ ގޯތި ތެރޭގައި މަސައްކަތް ކުރުމާއި އިމާރާތް ކުރުމުގެ މަސައްކަތް ކުރިއަށް ގެންދާކަން ވަނީ ފާހަގަކުރެވިފަ" އެޗްޑީސީގެ ބަޔާނުގައިވެ އެވެ.
މިގޮތަށް އުސޫލުތަކާ ހިލާފަށް ގޯތި ތެރޭ މަސައްކަތް ކުރާނަމަ ނުވަތަ އިމާރާތް ކުރާނަމަ ކަނޑައެޅިފައިވާ އުސޫލުތަކުގެ ތެރެއިން ގޯތީގެ ވެރިފަރާތާމެދު ފިޔަވަޅު އަޅާނެކަމަށް އެޗްޑީސީން ބުންޏެވެ.
އޭގެ އިތުރުން، ހުޅުމާލެއިން ދޫކޮށްފައިވާ ގޯއްޗެއްގައި އިމާރާތެއް ހަދަން ފެށުމުގެ ކުރިން އިމާރާތުގެ ކުރެހުން އެ ކުންފުންޏަށް ހުށަހަޅާ ހުއްދަ ހޯދަން ޖެހޭކަން ވެސް އެޗްޑީސީއިން ފާހަގަކޮށްފައިވެ އެވެ.
އެޗްޑީސީން ބުނީ އިމާރާތްކުރުމުގެ އުސޫލުތައް އެ ކުންފުނީގެ ވެބްސައިޓު ލިބެން ހުންނާނެ ކަމަށާއި އިތުރަށް މައުލޫމާތު ބޭނުންވާނަމަ ކުންފުނީގެ ހޮޓްލައިން ނަމްބަރަށް ގުޅުމަށްވެސް އެދޭ ކަމަށްވެސް ހުޅުމާލޭގެ ބިމާބެހޭ ކަންކަން ބަލަހައްޓާ އެޗްޑީސީއިން ބުނެފައިވެ އެވެ.
މިދިޔަ ސަރުކާރުން ކުރިއަށް ގެންދިޔަ ބިންވެރިޔާ ސްކީމުގެ ދަށުން ފުރަތަމަ ބުރުގައި ދޫކުރި 9003 ގޯތީގެ ތެރޭގައި ހުޅުމާލެއިން 1351 ގޯއްޗެއް ދޫކޮށްފައިވެ އެވެ. އޭގެ ތެރެއިން ބައެއް ގޯތިތަކުގައި މިހާރު އިމާރާތް ކުރުމުގެ މަސައްކަތް ކުރިއަށް ގެންދާކަން ފާހަގަކޮށްލެވެ އެވެ.
