އިންޑިއާ އައުޓް ކެމްޕޭނުގައި ރައީސް މުއިއްޒު ބައިވެރިވެވަޑައިގެންނެވީ ހިތާ ދެކޮޅަށް ކަމަށާއި އެއީ ކުރީގެ ރައީސް ޔާމީނަށް ކިޔަމަންތެރިކަން އަދާ ކުރުމުގެ ގޮތުން ކުރެއްވި ކަމެއް ކަމަށް ހުޅުމާލެ އުތުރު ދާއިރާގެ މަޖިލިސް މެންބަރު ހުސެއިން ޝަރީފް ވިދާޅުވެއްޖެ އެވެ.
ޕީއެންސީ ހަރުގޭގައި ރޭ ބޭއްވި ޖަލްސާގައި ވާހަކަ ދައްކަވަމުން ހުސެއިން ވިދާޅުވީ އިންޑިއާ ކަހަލަ ބޮޑު ގައުމަކަށް ކުޑައިމީސް ވާގޮތަށް ބަހެއް ބުނުމަކީ އޭގެ ޒާތުގައި މަސްލަހަތު ފުށުއަރާ ކަމެއް ކަމަށާއި ޕީއެންސީގެ ލީޑަޝިޕުން އެކަން ކުރީ އޭރު ވެސް ރުހިގެން ނޫން ކަމަށެވެ.
އެގޮތުން މިހާރުގެ ރައީސް، ޑރ. މުހައްމަދު މުއިއްޒު އިންޑިއާ އައުޓް ޓީޝާޓު ލައިގެން އެ ކެމްޕޭނަަށް އޭރު ނުކުންނެވީ ވެސް ހިތާ ދެކޮޅަށް ކަމަށް އޭނާ ވިދާޅުވި އެވެ.
"އިންޑިއާ އައުޓު ޖެހިއިރު އަޅުގަނޑުމެންނަށް ފެނުނީ އަދުގެ ރައީސުލްޖުމްހޫރިއްޔާ އަދުގެ އިއްޒަތްތެރި ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވެސް ހަމަ އެ ޓީޝާޓު ތުރުކުރައްވައިގެން އަޅުގަނޑުމެންނެކޭ އެއްގޮތަށް މަގުމައްޗަށް ނުކުމެ މަގުމަތީގައި ހުންނެވި ތަން...،" އޭނާ ވިދާޅުވި އެވެ.
"...އަޅުގަނޑުމެންނަށް އޭރުގައި މަގުދައްކަން މަގުކޮށެވި ގޮތަށް އެކަން ވެސް ކުރެއްވީ އާންމު ރައްޔިތުންގެ ކުރިމައްޗަށް ބޮޑު ދައުލަތެއް އެކަމާ އިންތިހާއަށް ދެކޮޅު ހަދަހަދައި އޮތް އިރުގައި ވެސް އިންޑިއާ އައުޓް ޖަހާފައިވާ ޓީޝާޓު ތުރުކުރައްވައިގެން އަޅުގަނޑުމެންނާ އެކު މަގުމައްޗަށް ނުކުމެވަޑައިގެން މަސައްކަތް ކުރެއްވީ ހިތާ ދެކޮޅަށް،" ހުސެއިން ޝަރީފް ވިދާޅުވި އެވެ.
އިންޑިއާ އައުޓް ހަރަކާތުގައި ބައިވެރިވުމަކީ އިންޑިއާއާއި ރާއްޖޭގެ އެތައް ބައެއްގެ ނުރުހުން އަމާޒުވާނެ ކަމެއްމަން އެނގުނު ނަމަވެސް އިދިކޮޅުގައި އޮންނައިރު އެންމެ މުހިންމު ކަމަކީ ވެރިކަމަށް އައުން ކަމަށް ވެސް ހުސެއިން ޝަރީފް ވިދާޅުވި އެވެ.
އިންޑިއާ އައުޓް ޖަހައިގެން ހިތާ ދެކޮޅަށް މަގުތައް މައްޗަށް ނުކުތީ އޭރުގެ ލީޑަރެއްގެ ގޮތުގައި ހުންނެވި، ރައީސް ޔާމީންއަށް ކިޔަމަންތެރިކަން އަދާ ކުރުމުގެ ގޮތުން ކަމަށް ވެސް ހުސެއިން ވިދާޅުވި އެވެ.
"[އިންޑިއާ އައުޓް ޓީޝާޓު ލައިގެން ރައީސް މުއިއްޒު ނުކުންނެވީ] އެއީ ކޮންމެހެން ބިރަކުންނެއް ނޫން، އެއީ ގައުމުގެ ހައްގުގައި ވެސް ފަހަތަށް ޖެހެނީއަކީ ނޫން، އޭގެ މުޅި މަސްލަހަތަށް ބަލަނީ ކަމުގައި ވާނަމަ އެތައް ރައްޔިތެއްގެ ނުރުހުމާއި ރުޅިވެރިކަން، އެހެން ގައުމެއްގެ ރައްޔިތުންގެ ނުރުހުމާއި ރުޅިވެރިކަން އަމާޒު ވެދާނެތީ އޭގެ މަސްލަހަތަށްޓަކައި އެކަން ކުރަން ނޭދުނަސް ލީޑަރެއްގެ ފަހަތުގައި މަސައްކަތް ކުރުމަށްޓަކައި އަޅުގަނޑުމެން އެކަން ވެސް ކުރީ، އަޅުގަނޑުމެންގެ ހިތާ ދެކޮޅަށް ނަމަވެސް ކިޔަމަންތެރިކަން އަދާ ކުރުމުގެ ގޮތުން،" ހުސެއިން ޝަރީފް ވިދާޅުވި އެވެ.
ހުސެއިން އެ ވާހަކަ ދެއްކެވިއިރު، އިންޑިއާ އައުޓު ހަރަކާތުގައި އެންމެ އިސްކޮށް ހަރަކާތްތެރިވެވަޑައިގެންނެވި ޕީއެންސީގެ ޗެއާޕާސަން، އަދި މަޖިލީހުގެ ރައީސް، އަބްދުއްރަހީމް އަބްދުﷲ ވެސް އިންނެވި އެވެ.
އިންޑިއާ އައުޓް ހަރަކާތަކީ މި ސަރުކާރުން ވެރިކަމަށް އައުމަށް އެންމެ ވަރުގަދައަށް ކުރި ކެމްޕޭނެވެ. ރައީސް މުއިއްޒުގެ ކެމްޕޭނަށް ރާއްޖޭގެ އެކި ކަންކޮޅަށް ދަތުރުކުރައްވައި ކުރެއްވި ކެމްޕޭނުގައި ވެސް އެމަނިކުފާނު އެންމެ ގިނައިން ދެއްކެވީ އެ ވާހަކަ އެވެ. އަދި ވެރިކަމަށް ވަޑައިގަތުމަށްފަހު ވެެސް ރައީސް މުއިއްޒު ވަނީ އެ ރާގުގައި އެތައް ވާހަކައެއް ދައްކަވައިފަ އެވެ.
