ސިހުރު ހެދިކަމުގެ ތުހުމަތުގައި ތިމާވެއްޓާ ބެހޭ މިނިސްޓްރީގެ ސްޓޭޓް މިނިސްޓަރު ފާތިމަތު ޝަމްނާޒް އަލީ ސަލީމް ހައްޔަރުކުރިއިރު އޭނާ އާއި ރައީސުލްޖުމްހޫރިއްޔާގެ އޮފީހުގެ މިނިސްޓަރު އާދަމް ރަމީޒު ވަރިވެފައިވާކަން އެނގިއްޖެ އެވެ.
ޝަމްނާޒް ހައްޔަރުކުރީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުއާ "ގާތްވުމަށް" ސިހުރި ހެދި ކަމުގެ ތުހުމަތުގަ އެވެ. ސަރުކާރުގެ އޮފިޝަލަކު "އަދަދު" ނޫހަށް މިކަން ކަށަވަރު ކޮށްދެއްވި އެވެ.
ޝަމްނާޒަކީ ރަމީޒުގެ އަނބިކަނބަލުން ކަމަށް ކުރިން ރިޕޯޓުކުރެވިފައީ ނަމަވެސް ދެ މީހުންގެ ކައިވެނި ޖޫން މަހުގެ ތެރޭގައި ނިމުމަކަށް ގެނެސްފައިވާކަން ވަނީ ޔަގީން ކުރެވިފަ އެވެ.
އެ ކައިވެންޏަށް ދެ ކުދިން ލިބިފައިވާއިރު އޭގެ ތެރޭގައި އުމުރުން އެއް އަހަރު ނުފުރޭ ތުއްތު ކުއްޖަކު ވެސް ހިމެނެ އެވެ. ޝަމްނާޒްގެ ޖުމުލަ ތިން ދަރިން ތިބެ އެވެ.
އޭނާގެ ކުރީގެ ފިރިކަލުން އާދަމް ރަމީޒު "އެކަހެރި" ކޮށްފައިވާކަމުގެ އަޑުތައް ވަނީ ގިނަވެފަ އެވެ. ރައީސް މުއިއްޒުއާ ވަރަށް ގާތްކޮށް މަސައްކަތް ކުރެއްވި އާދަމް ރަމީޒް، ރައީސްއާ އެއްކޮށް ނުފެންނަތާ މަސްތަކެއްވެއްޖެ އެވެ.
ޝަމްނާޒާއި ރަމީޒު ވެސް ރައީސް މުއިއްޒު މޭޔަރަކަށް ހުންނެވިއިރު ކައުންސިލް މެންބަރުކަން ކުރެއްވި އެވެ. ދެ ބޭފުޅުން ވެސް ކައުންސިލުން އިސްތިއުފާ ދިނީ ސަރުކާރުގެ މަގާމުތަކަށް އައުމަށެވެ.
