ބީއެމްއެލްއަށް ގަންނަން ލިބޭ ޑޮލަރުގެ ނިސްބަތް މަދުވުމާއެކު ވެސް ގަންނަން ލިބޭ އަދަދަށް ވުރެ ގިނައިން ޑޮލަރު ވިއްކަން ޖެހުމުން ކުރިމަތިވެފައިވާ މާލީ ބުރައަށް ހައްލެއް ހޯދުމަށްޓަކައި ރާއްޖެއިން ބޭރުގައި ތައުލީމު ހާސިލު ކުރަމުންދާ ދަރިވަރުންނަށް އެ ބޭންކުން ދޫކުރާ ޑޮލަރުގެ ލިމިޓަށް ބަދަލު ގެނެސްފި އެވެ.
ބޭންކުން ވަނީ ރާއްޖޭން ބޭރުގައި މަތީ ތައުލީމު ހާސިލްކުރަމުންދާ ދަރިވަރުންނަށް "ސްޓައިޕެންޑް" ގެ ގޮތުގައި ކޮންމެ މަހަކުވެސް ދަރިވަރަކަށް ވިއްކަމުން އައި 1،000 ޑޮލަރުގެ ބަދަލުގައި މިނިސްޓްރީ އޮފް ހަޔާ އެޑިއުކޭޝަނުން ކަނޑައަޅާފައިވާ އަދަދެއް ދިނުމަށް ނިންމައިފަ އެވެ.
ބޭންކުން ވަނީ އީމެއިލް މެދުވެރިކޮށް ދަރިވަރުންނަށް މި ބަދަލުތަކުގެ ތަފުސީލު ފޮނުވައިފަ އެވެ. އެކަން ބޭންކުގެ އޮފިޝަލަކުވަނީ "އަދަދު" ކަށަވަރުކޮށްދެއްވާފަ އެވެ.
ދިވެހި ގިނަ ދަރިވަރުން ކިޔަވަމުން އަންނަ ގައުމުތަކަށް މިނިސްޓްރީން ސްޓައިޕެންޑްގެ ގޮތުގައި މަހަކަށް މިހާރު ކަނޑައަޅާފައިވާ އަދަދުތައް:
1. މެލޭޝިއާ 1960 ރިންގިޓް (ގާތްގަނޑަކަށް 415 ޑޮލަރު)
2. އިންޑިއާ: 440 ޑޮލަރު
3. ނޭޕާލް: 415 ޑޮލަރު
4. ފިލިޕީންސް: 450 ޑޮލަރު
5. ރަޝިއާ: 615 ޑޮލަރު
މި ބަދަލާއެކު ގިނަ ދަރިވަރުންތަކަކަށް މަހެއްގެ މައްޗަށް ވިއްކަމުން އައި ޑޮލަރުގެ އަދަދު ދެބައި ކުޅަ އެއް ބަޔަށް ކުޑަވެގެންދާނެ އެވެ.
ފާއިތުވި އަހަރު ވެސް ބީއެމްއެލުން ވަނީ ކަސްޓަމަރުންނާއި އެމްއެމްއޭ އިން އެ ބޭންކަށް ގަންނަން ލިބުނު ޑޮލަރުގެ އަދަދަށްވުރެ 333 މިލިއަން ޑޮލަރު އިތުރަށް ވިއްކައިފަ އެވެ.
ނަމަވެސް ބޭންކަށް ގަންނަން ލިބެން ނެތް އެއްޗެއް ވިއްކަމުން ދިޔުމަކީ ދެމެހެއްޓެނެވި ކަމަކަށް ނުވާ ހިނދު، އެ މަގު ފަހިވަންދެން ބޭންކުގެ މާލީ ހާލަތާއި ރިސްކްތަކަށް ހުށަހެޅޭ މިންވަރު ކުޑަކުރުމަށްޓަކައި އުދަނގޫ ނިންމުންތަކެއް ނިންމަން މަޖުބޫރުވާ ކަމަށް ބީއެމްއެލްގެ ސީއީއޯ ކާލް ސްޓުމްކަ ވަނީ މީގެ ކުރިން ވިދާޅުވެފަ އެވެ.
ރާއްޖެއިން ބޭރުގައި ކިޔަވާ ކުދިންނަށް ޑޮލަރު ނެގޭނެ އަދަދު 1،200 އިތުރުކުރުމަށް ސަރުކާރުން ޑިސެންބަރު މަހު ވައުދުވެފައިވި ނަމަވެސް އެކަން ކޮށްދެވިފައެއް ނުވެ އެވެ.
ބޭންކުތަކުން ކަނޑައަޅާފައި އޮންނަ ޑޮލަރު ލިމިޓު އުވައިލުމަކީ ރައީސް މުހައްމަދު މުއިއްޒުގެ ރިޔާސީ ވައުދެކެވެ.
ކަޅު ބާޒާރުގައި ޑޮލަރު ވިއްކާ މައްސަލައަކީ ހައްލުނުވެ އަހަރުތަކަކަށް ދިގުލައިގެން ގޮސްފައިވާ މައްސަލައެކެވެ. ރަސްމީ އެކްސްޗޭންޖް ރޭޓަކީ 15.42ރ. ވިޔަސް، ކަޅު ބާޒާރުގައި ޑޮލަރުގެ އަގު އުޅެނީ 18ރ. އިން މަތީގެ އަގުތަކުގަ އެވެ.
މި މައްސަލައިގައި އެމްއެމްއޭއަށް އެންމެ ބޮޑަށް ފާޑުކިޔުން އަމާޒުވާ އެއް ސަބަބަކީ، އެ އިދާރާގެ ހުއްދަ ލިބިގެން ހިންގާ މަނީ އެކްސްޗޭންޖުތަކުން ވެސް މިކަމުގައި ބައިވެރި ވާތީ އެވެ. އަދި ފާޅުކަން ބޮޑުކޮށް މިކަން ކުރަމުންދާއިރު، މިހާތަނަށް އެމްއެމްއޭއަށް މިކަން ހުއްޓުވަން އެކަށީގެންވާ ވަރުގެ ފިޔަވަޅުތަކެއް އެޅިފައި ނުވާތީ އެވެ.
