ދައުލަތުގެ ހަރަދު ކުޑަކޮށް އާމްދަނީ އިތުރުކުމުގެ ސިޔާސަތެއްގެ އިތުރުން މީޑިއަމް ޓަރމް ރެވެނިއު ސްޓްރެޓެޖީއެއް އެކުލަވާލަން ރައީސް ޑރ. މުހައްމަދު މުއިއްޒު ނިންމަވައިފި އެވެ.
ރައީސް އޮފީހުން މިރޭ ބުނި ގޮތުގައި ރައީސް މިފަދައިން ނިންމަވާފައިވަނީ އިއްޔެ ބޭއްވި ވަޒީރުންގެ މަޖިލީހުގެ ބައްދަލުވުމުގައި، ވަޒީރުންގެ ލަފާގެ މަތިންނެވެ.
ސަރުކާރުން މި ފިޔަވަޅުތައް އެޅުމަށް އެދި ވަޒީރުންގެ މަޖިލީހަށް ކަރުދާހެއް ހުށަހަޅުއްވާފައިވަނީ ފިނޭންސް މިނިސްޓްރީގެ ފަރާތުން ވަޒީރު، ޑރ. މުހައްމަދު ޝަފީގު އެވެ. މީގެކުރިންވެސް ޝަފީގު ވަނީ ދައުލަތުގެ ހަރަދު ކުޑަކުރަން ޖެހޭ ކަމަށް ތަކުރާރުކޮށް ވިދާޅުވެ އެކަމަށް ފިޔަވަޅުތަކެއް އަޅުއްވާނެ ކަމަށްވެސް ވިދާޅުވެފަ އެވެ.
މީގެއިތުރުން، ރާއްޖޭގެ އިގުތިސާދު ސިންދަފާތު ކުރުމަށާއި، އާމްދަނީ އިތުރުކުރުމަށް އިތުރަށް ކުރެވިދާނެ ކަންތައްތަކަކީ ކޮބައިތޯ ބެލުމަށާއި އެކަންކަމާ ގުޅޭގޮތުން ކުރަންޖެހޭ ކަންކަން ވަޒީރުންގެ މަޖިލީހުގެ ސަބް-ކޮމިޓީއަކުން ކުރިއަށް ގެންދިއުމަށް ވެސް އިއްޔެގެ ބައްދަލުވުމުގައި ނިންމާފައިވާ ކަމަށް ރައީސް އޮފީހުން ބުނެފައިވެ އެވެ.
ހަރަދު ކުޑަކުރަން ރައީސް މުއިއްޒު ނިންމަވާފައިވާއިރު، މިދިޔަ އަހަރުގެ ޖޫން މަހުގެ ފުރަތަމަ ހަފްތާއާ ހަމައަށް ސަރުކާރު ހިންގުމަށް ކުރި ހަރަދު ނުވަތަ ރިކަރަންޓު ހަރަަދުތަކާ އަޅައިބަލާއިރު މިއަހަރުގެ އެ މުއްދަތުގައި ދައުލަތުގެ ބަޖެޓުން ކުރި ހޭދަ 627 މިލިއަން ރުފިޔާއިން ވަނީ އިތުރުވެފަ އެވެ.
ފިނޭންސް މިނިސްޓްރީން ވަނީ ޖޫން ހަޔަކާ ހަމައަށް ދައުލަތުގެ އާމްދަނީ އާއި ހަރަދުތަކުގެ ނަންބަރުތައް ހިމެނޭ "ވީކްލީ ފިސްކަލް ޑިވެލޮޕްމަންޓު ރިޕޯޓު" ޝާއިއުކޮށްފަ އެވެ. އެ ރިޕޯޓްތަކުން ފެންނަ ގޮތުގައި މުވައްޒަފުންނަށް ކުރާ ހަރަދު ދަނީ ބޮޑުތަނުން އިތުރުވަމުންނެވެ. މުވައްޒަފުންނަށް ހިނގާ ހަރަދު މި އަހަރު ވަނީ 11 ޕަސެންޓުން އިތުރުވެފަ އެވެ. ރިކަރަންޓް ހަރަދުވެސް ވޭތުވެދިޔަ އަހަރަށްވުރެ 617 މިލިއަނުން ވަނީ އިތުރުވެފަ އެވެ.
މި ސަރުކާރުން ވެރިކަމަށް އައީ ސިޔާސީ މުވައްޒަފުންގެ އަދަދު 700 އިން މަތި ނުވާނެ ކަމަށް ވައުދުވަމުންނެވެ. ނަމަވެސް ވެރިކަމަށް ހަތް މަސްވެފައިވާއިރު، ސިޔާސީ މުވައްޒަފުންގެ އަދަދު ސަރުކާރުން ހާމަކޮށްފައެއް ނުވެ އެވެ.
އެ އަދަދު 2000 އާ ގާތް ކުރާ ކަމަށް މީގެ ކުރިން މައުލޫމާތު ލިބިފައިވާއިރު ސިޔާސީ މުވައްޒަފުންގެ އަދަދު މަދުކުރަން ފަށާފައިވާ ކަމަށް މި ހަފުތާގެ ތެރޭގައި ބައެއް ނޫސްތަކުން ވަނީ ރިޕޯޓުކޮށްފަ އެވެ. މިހާތަނަށް ސިޔާސީ މުވައްޒަފުންގެ އަދަދު ހާމަކުރި ވުޒާރާތަކުގެ އެވްރެޖް އަދަދު 40 އިން މަތިވެ އެވެ.
