މަސްވެރިންނަށް ދެންޖެހޭ ފައިސާ ދެވޭ ވަރަށް ސަރުކާރުގެ މަސް ކުންފުނި، މިފްކޯގައި މިވަގުތު ފައިސާ ނެތް ކަމަށާއި އެހެންނަމަވެސް މަސައްކަތް ކުރަމުން ދަނީ މަސްވެރިންނަށް ފައިސާ ދެވޭނެ ގޮތެއް ހޯދުމަށް ކަމަށް އެ ކުންފުނިން ބުނެފި އެވެ.
މިފްކޯގެ އޮފިޝަލަކު "އަދަދު" އާ ވާހަކަ ދައްކަމުން ބުނީ ފައިސާ ހޯދުމުގެ މަސައްކަތް މިހާރު ވެސް ކުރަމުންދާ ކަމަށާއި ފައިސާ ހަމަޖެހުނުހައި އަވަހަކަށް މަސްވެރިންނަށް ދޭންޖެހޭ ފައިސާގެ ތެރެއިން ކޮންމެވެސް މިންވަރެއް ދޫކުރާނެ ކަމަށެވެ.
"އަޅުގަނޑުމެން މަސައްކަތް ކުރަމުން މިދަނީ މަސްވެރިންނަށް ދޭންޖެހޭ ފައިސާގެ ތެރެއިން ކޮންމެވެސް މިންވަރެއް ދޫކުރެވޭތޯ، އެކަމަކު މިވަގުތު މިފްކޯގައި ފައިސާއެއް ނެތް، ފައިސާ ލިބުނުހައި އަވަހަކަށް މަސްވެރިންނަށް ފައިސާ ދޫކުރާނަަން،" މިފްކޯގެ އޮފިޝަލް ބުންޏެވެ.
އޭނާ ބުނީ ފައިސާގެ ދަތިކަން މިފްކޯއަށް ކުރިމަތިވެފައި އޮތް ނަމަވެސް މަސްވެރިންނަށް ދޭންޖެހޭ ފައިސާ ވީހާވެސް އަވަހަކަށް ދޫކުރުމަށް މަސައްކަތް ކުރަމުންދާ ކަމަށެވެ.
"މިފްކޯގައި ފައިސާގެ ދަތިކަން ނެތްނަމަ، މި ހަފުތާގައި ވެސް މަސްވެރިންނަށް ކޮންމެވެސް މިންވަރެއް ދޫކުރެވުނީސް،" އޮފިޝަލް ވިދާޅުވި އެވެ.
ފައިސާގެ ދަތިކަން މިފްކޯއަށް ކުރިމަތިވެފައިވާ ކަމަށް މިފްކޯއިން ބުނެފައިވާއިރު، އެ ކުންފުނިން މަސްވެރިންނަށް ދޭންޖެހި، ނުދީ ހުރި ފައިސާގެ އަދަދު 35 މިލިއަން ދިވެހި ރުފިޔާއަށް އަރަ އެވެ.
މަސްވެރިން ކިރާ މަހަށް 48 ގަޑިއިރު ތެރޭގައި ފައިސާ ދައްކާ ނިޒާމެއް ގާއިމު ކުރުމަކީ ރައީސް ޑރ. މުހައްމަދު މުއިއްޒުގެ ވައުދެކެވެ.
"އަޅުގަނޑުމެންގެ އަމާޒަކީ 48 ގަޑިއިރު ތެރޭ މަސްވެރިންނަށް ލިބޭ ނިޒާމު ގާއިމުކުރާނަމޭ. އަޅުގަނޑަކީ ވައުދުވާ ގޮތަށް ކަން ކުރާނެ މީހެއް. ޓާގެޓަށް ދާން ކުރާ މަސައްކަތް މިކުރަނީ. އެ ޓާގެޓަށް ދާނަން," ރައީސް ވިދާޅުވެފައިވެ އެވެ.
ނަމަވެސް ރައީސްގެ އެ ވައުދާ އެއްގޮތަށް މަސްވެރިންނަށް ފައިސާ ނުލިބޭތީ މިދިޔަ ހުކުރު ދުވަހުން ފެށިގެން އައްޑޫ ސިޓީ ހުޅުމީދޫ މިފްކޯ ބަނދަރުގައި މަސްވެރިން ދަނީ މުޒާހަރާ ކުރަމުންނެވެ.
މުޒާހަރާގެ ބައިވެރިން ގޮވާލަމުން ދަނީ މަސްވެރިންނަށް ދޭންޖެހޭ ފައިސާ ވަގުތުން ވަގުތަށް ދިނުމަށާއި ކުރިއަށް އޮތް ތަނުގައި ކިރުވާ މަހަށް ކޮންމެ 15 ދުވަހަކުން ފައިސާ ދިނުމަށް ސަރުކާރުން އެއްބަސްވުމަށެވެ.
އެ ކަންކަމާ ގުޅޭ ގޮތުން އެމީހުންނާ ވާހަކަ ދައްކަން ކަމާގުޅޭ އިސް ފަންތީގެ ބޭފުޅަކު މުޒާހަރާގެ ބައިވެރިންގެ ގާތަށް ވަޑައިގަތުމަށް ވެސް މުޒާހަރާގެ ބައިވެރިން ދަނީ ގޮވައިލަމުންނެވެ.
ނަމަވެސް ސަރުކާރުން މިހާތަނަށް މުޒާހަރާގެ ބައިވެރިންގެ އެއްވެސް ގޮވައިލުމަކަށް ޖަވާބުދާރީވެފައެއް ނުވެ އެވެ.
ފިޝަރީޒް މިނިސްޓްރީން އެންމެފަހުން ބޭއްވި ނޫސްވެރިންގެ ބައްދަލުވުމުގައި މިނިސްޓަރު އަހުމަދު ޝިޔާމް ވިދާޅުވީ މަސްވެރިންނަށް ދޭންޖެހޭ ފައިސާ ހޯދުމަށް މިފްކޯއާއި ސަރުކާރުން މަސައްކަތް ކުރަމުން އަންނަ ކަމަށާއި "މާލީ ގޮތުން ނޭވާ ލާނެ ގޮތްތައް" ހޯދަން ފިނޭންސް މިނިސްޓަރު ވެސް މަސައްކަތް ކުރައްވަމުން ގެންދަވާ ކަމަށެވެ.
"އަޅުގަނޑުމެންނަށް އެބަ ފެނޭ އޭގައި އަލި މަގެއް ލިބޭނެކަން. ލިބިއްޖެ ކަމަށް ވަންޏާމު މިފްކޯއަށް ވެސް ހަމަ އެ ލުއި ލިބިގެން އެ ދިޔައީ. މިފްކޯއަށް ދައުލަތުން ދޭންޖެހޭ ސަބްސިޑީ ދިނުމުގައި ވެސް ތަންކޮޅެއް ފަސޭހަ ވެގެންދާނެ. އޭރުން މަސްވެރިންނަށް ދޭންޖެހޭ ފައިސާ ވެސް ދިނުމުގައި ތަންކޮޅެއް ފަސޭހަ ވެގެންދާނެ،" މިނިސްޓަރު އެދުވަހު ވިދާޅުވި އެވެ.
މި ސަރުކާރު ވެރިކަމާ ހަވާލުވިއިރު މަސް ގަންނަމުންދިޔަ އަގަކީ ކިލޯއަކަށް 25ރ. އެވެ. އޭގެ ސަބަބުން މަސްވެރިންނަށް ފައިސާ ދިނުމަށް ދަތިތަކާ ދިމާވެ ފައިސާ ދިނުން ލަސްވުމުގެ ސަބަބުން މިދިޔަ ފެބްރުއަރީ މަހު އަދި މިމަހު ކުރީގައި ވެސް މަސްވެރިން އިހުތިޖާޖު ކުރި އެވެ.
ފެބްރުއަރީގައި ކުރި މުޒާހަރާގެ ތެރެއިން ކޫއްޑޫގެ އޮޕަރޭޝަންތައް ވެސް މަަސްވެރިންގެ ބެލުމުގެ ދަށަށް ގެންދިޔަ އެވެ. އެ މުޒާހަރާ ނިންމައިލީ މަސްވެރިންނަށް ދޭންޖެހި ނުދެވި ހުރި ފައިސާގެ ތެރެއިން ދޭން ޖެހޭ ބޮޑު އިންސައްތައެއް ޖަމާކުރުމުންނެވެ.
މި ސަރުކާރުން ވަނީ ފެބްރުއަރީ 12، 2024 އިން ފެށިގެން މަހުގެ އަގު 20ރ. އަށް ވެސް ކުޑަކޮށްފަ އެވެ.
