ކޮންމެ އީދެއްގައި ވެސް ކުޅުދުއްފުށި ސިޓީން ބާއްވާ މަށި މާލި ޕެރޭޑު މިފަހަރު ވެސް ބާއްވައިފި އެވެ.
މިފަހަރުގެ ޕެރޭޑުގައި ވެސް ގައުމަށް ދިމާވެފައިވާ ބޮޑެތި މައްސަލަތަކާއި, ސިޔާސީ ޖޯކުތައް ހިމެނޭހެން ގިނަ މާލިތައް ނެރެފައިވެ އެވެ. ނަމަވެސް މި އަހަރު އެންމެ ބޮޑު ސަމާލުކަމެއް ދީފައިވަނީ މަސްވެރިންނަށް ދިމާވެފައިވާ ގޮންޖެހުންތަކާއި, ސަރުކާރުން މަސްވެރިންނަށްވީ ވައުދުތަކާ ގުޅުންހުރި މާލިތަކަށެވެ.
މަސްވެރިންނަށް މިޔަރުގެ އުނދަގޫ ބޮޑުވެފައިވާކަން ދައްކަން, ބޮޑު މިޔަރެއް, އިންސާނަކު ކާލާ މަންޒަރު ދައްކުވައިދޭ މާއްޔެއް ހިމަނާފައިވެ އެވެ. އަދި ސަރުކާރުންވީ ވައުދުތަކަށް އަލިއަޅުވާލާ, "ށިޔާމަށް ނޭޅުނު ފަރުމަސް ބޮއި", "ނުނިމުނު މެއި މަސް, އަދި "ވައުދު ކަނދުފަތި" މާލި ވެސް ޕެރޭޑުގައި ހިމެނެ އެވެ.
މަސްވެރިންނަށް ފައިސާ ދިނުން ލަސްވެފައިވާކަން ހާމަކޮށް "މަސް ބުހުތާން ނަން ކިރާ މަހުގެ ރުފިޔާ ދެވޭނީ 48 ދަރިން ވިހާފަހުން" އަދި "ޗަކޮއި ލާރިކޮޅު ކޮބާ" މާލި ހިމެނެ އެވެ.
މަސްވެރިކަމާ ބެހޭ ގިނަ މާލިތަކެއް ޕެރޭޑުގައި ހިމަނާފައިވާއިރު މަސްވެރިންނަށް ނުދީ ހުރި ފައިސާގެ މައްސަލަ އާއި ލޭނު އަޅައިގެން ބޮޑު ކަންނެލި ބޭނުމުގެ ހުއްދަ ސަރުކާރުން ދޭން އުޅޭ އުޅުމާ ދެކޮޅު ހެދުމުގެ ގޮތުން 35 ދޯނީގައި މަސްވެރިން ވަނީ މާލޭ ފަޅުގައި މިދިޔަ ބުދަ ދުވަހު މުޒާހަރާ ކޮށްފަ އެވެ.
މަސްވެރިންގެ މުޒާހަރާއަށް ފަހު ސަރުކާރުން ވަނީ ބައެއް ޑިމާންޑުތަކަށް އިޖާބަ ދީ, މަސްވެރިންނަށް ޑީސަލް ވިއްކާ އަގު އެއްގަމު ޝެޑުތަކާ އެއްހަމަކޮށް ދީފަ އެވެ. މީގެ ކުރިން މަސްވެރިންނަށް ޑީސަލް ވިއްކަމުންދިޔައީ ލީޓަރެއް 14.53ރ. އަށެވެ. ސަރުކާރުގެ ނިންމުމާއެކު ދެން މަސްއޮޑިފަހަރަށް ވެސް ޑީސަލް ވިއްކަމުން ދާނީ 13.92ރ. އަށެވެ.
އެމްޕީއެލްގެ އެމްޑީ, ވިޔަފާރި ކުރުމަށް ބޭނުންކުރި ޝޮޕިން ކާޑު މާލި -- ފޮޓޯ: ކުޅުދުއްފުށި އޮންލައިން
މަސްވެރިކަމުގެ އިތުރަށް ވެސް ގައުމުގެ ބައެއް އެހެނިހެން ޓްރެންޑުތަކަށް މަށިމާލި ޕެރޭޑުގައި އަލިއަޅުވާލި އެވެ. އަމިއްލަ ވިޔަފާރިއަށް އެމްޕީއެލްގެ ކްރެޑިޓް ކާޑު ބޭނުން ކުރުމާއި, ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުالله އަށް ނިސްބަތްކޮށް ވެސް ބައެއް މާލިތައް ހިމަނާފައިވެ އެވެ.
ކުޅުދުއްފުށީގެ ހުރިހާ އުމުރުފުރާއެއްގެ އެންމެންހެން ބައިވެރިވާ, "މަށިމާލި" ގޮތުގައި މާލިތައް ތައްޔާރުވެގެން ބާއްވާ މި ޕެރޭޑަކީ ޒަމާނުއްސުރެން ކޮންމެ ބޮޑު އީދާ ދިމާކޮށް ވަޅު އީދު ދުވަހު އެ ރަށުގައި ބާއްވާ ހަރަކާތެކެވެ. މަށިމާލިތަކާއެކު މުޅި ޕެރޭޑްގެ ސަމާލުކަން ލިބެނީ އޭގައި ބައިވެރިވާ އުފެއްދުންތެރި ފުޅަނދުތަކަށެވެ.
އަބަދުވެސް އޮންނަ އެ އާދަކާދައަކީ ކުޅުދުއްފުށީ ރައްޔިތުންގެ ޝުއޫރުތައް މި ޕެރޭޑުން ދައްކާލުމެވެ. އެހެން އަހަރުތަކެކޭ އެއް ގޮތަށް މި އަހަރު ވެސް ކުޅުދުއްފުށީ ރައްޔިތުންނަށް ހުރި ދަތިތަކާއި ހިދުމަތްތައް ހޯދުމުގައި ހުރި ގޮންޖެހުންތައް ކިޔައިދޭން ފުޅަނދުތައް ތައްޔާރުކޮށްފައިވެ އެވެ.
