ހިޔާލު ތަފާތުވުންތަކުގައި އެކަކު އަނެކަކަށް އިހުތިރާމްކޮށް، އަމިއްލަ މަސްލަހަތުގެ ބަދަލުގައި ދީނާއި ވަތަނުގެ މަސްލަހަތު އިސްކުރުމަށް މިއަދު ދިން ބޮޑު އީދު ހުތުބާގައި ގޮވާލައިފި އެވެ.
އިސްލާމީ އުންމަތް މިއަދު ފާހަގަކުރަމުންދާ ބޮޑު އީދުގެ މުނާސަބަތުގައި އިއްވި ހުތުބާގައި ވަނީ ދޭދޭ ގުޅުންތައް ވަރުގަދަ ކުރުމުގައި އަތުކުރި އޮޅާލުމަށް ގޮވާލާފަ އެވެ.
“ގައުމަކަށް ލިބޭނެ އެންމެ ބޮޑު އަނެއް ނިއުމަތަކީ އެ ގައުމަކީ އަމާންކަން ލިބިފައިވާ ގައުމަކަށް ވުމެވެ. މި ކަންކަން އެ ބަޔަކަށް ހާސިލުވާނީ ދޭދޭ ފަރުދުންގެ މެދުގައި ގުޅުންތައް ވަރުގަދަވެ އެއްބައިވަންތަ ބަޔަކަށް ވެގެން،” ހުތުބާގައި ބަޔާންކޮށްފައިވެ އެވެ.
އިސްލާމް ދީނުގައި އެންމެ މެދުގައި ވެސް ހަމަހަމަކަން ކަނޑައަޅާފައިވާ ކަމަށާއި އެކަކު އަނެކަކުގެ މައްޗަށް ކިބުރުވެރި ނުވުމަށް ދީނުގައި ބާރުއަޅާ ކަމަށް ވެސް ހުތުބާގައި ބަޔާންކޮށްފައިވެ އެވެ.
އީދު ފާހަގަކުރަމުންދާއިރު އިސްލާމް ދީނުގެ މިންގަނޑުތަކުގެ ތެރެއިން ފާހަގަކުރުމަށް ހުތުބާގައި ވަނީ އިރުޝާދު ދީފަ އެވެ.
“އުފާ ފާޅުކުރާއިރު އިސްލާމް ދީނުގެ އުސޫލުތަކަށް ތަބާވާން ޖެހެއެވެ. ދީނުގައި ހަރާމް ކުރައްވާފައިވާ ކަންކަން ކުރުމާއި އުފާ ފާޅުކުރުމުގައި އެހެން ދީންތަކުގެ އަހުލުވެރީންގެ ގޮތްތައް ކޮޕީކުރުން ދޫކޮށްލާން ޖެހެ އެވެ” ހުތުބާގައި އިއްވާފައިވެ އެވެ.
އިސްލާމް ދީނަކީ އިއްޒަތްތެރިކަން ލިބިފައިވާ ދީނަކަށް ވިޔަސް މިއަދު މުސްލިމުން ނިކަމެތިވެފައިވާ ކަމަށް ހުތުބާގައި ބުނެފައިވެ އެވެ. އެގޮތުން، ފަލަސްތީނުގައި ހިންގަމުންދާ ގަތުލުއާންމުގެ ވާހަކަ ހިއްސާކޮށްފައިވެ އެވެ.
އިސްލާމީ އުންމަތުގެ މީސްތަކުންނާއި ވަސީލަތްތައް ގިނަވި ނަމަވެސް ފަލަސްތީނު ހިމާޔަތްކުރަން ނުކުޅެދިފައިވާކަން ވެސް ވަނީ ފާހަގަކޮށްފަ އެވެ. އަދި، މިފަދަ ދުވަހެއްގައި އުންމަތް ބިނާކުރަން އަޒުމް ކަނޑައެޅުމަށް ވެސް ހުތުބާގައި ގޮވާލާފައިވެ އެވެ.
