މާދަމާރޭ ފެށުމަށް ހަމަޖެހިފައިވާ، ޔޫރަޕްގެ ބޮޑު ފުޓްބޯޅަ މުބާރާތް، ޔޫރޯ 2024 އަށް ހާއްސަކޮށް "އަދަދު" އިން ގެނެސްދޭ ކަވަރޭޖު, "ބޯޅައީދު - ޔޫރޯ 24" މިއަދު ލޯންޗުކޮށްފި އެވެ.
"ބޯޅައީދު - ޔޫރޯ 24" ނަމުގައި މިއަދު ނެރުނު ގައިޑުގައި މާދަމާ ރޭ ފަށާ ޔޫރޯ ފުޓުބޯޅަ މުބާރާތުގެ އެންމެ ފަހުގެ މުހިންމު މައުލޫމާތުތައް ހިމަނާފައިވެ އެވެ. އެގޮތުން ޔޫރޯ އަށް ޓީމުތައް ކޮލިފައިވި ގޮތާއި ގްރޫޕުތައް ބެހިފައިވާ ގޮތްތަކާއި ސްޓޭޑިއަމްތަކާއި މުބާރާތުގައި ފެނިގެންދާ ތަރިންނާއި ކޯޗުންގެ މައުލޫމާތުގެ އިތުރުން މުހިންމު ގިނަ މައުލޫމާތުތަކެއް ހިމަނާފައިވެ އެވެ.
މި ގައިޑް ތައްޔާރު ކުރުމުގައި ވީހާ ވެސް ސަޕޯޓަރުންނަށް ފަސޭހަ ގޮތަށް ގްރެފިކްސް އާއި މައުލޫމާތު ހިމަނާފައިވާނެ އެވެ.
މި ގައިޑުގެ ކޮންޓެންޓު ތައްޔާރުކޮށްފައި ވަނީ އަދަދުގެ ސްޕޯޓްސް ޓީމުންނެވެ. އަދި ގައިޑުގައި ހިމަނާފައިވާ ހުރިހާ ގްރެފިކްސްއަކާއި އިލަސްޓްރޭޝަނެއް ތައްޔާރުކޮށްފައި ވަނީ އަދަދުގެ ކްރިއޭޓިވް ޓީމުންނެވެ.
މީގެ އިތުރުން އަދަދުން މި ފަހަރުގެ ޔޫރޯއާ ދިމާކޮށް "ބޯޅައީދު - ޔޫރޯ 24" ނަމުގައި ޔޫރޯގެ މައުލޫމާތުތައް އާންމުންނާ ހަމައަށް ގެނަސްދިނުމުގެ ގޮތުން ހާއްސަ ޝޯއެއް ގެނެސްދިނުމަށް ވަނީ ނިންމައިފަ އެވެ. މި ޝޯގެ އެނަލިސްޓުންގެ ގޮތުގައި ހަރަކާތްތެރިވާނީ ރާއްޖޭގެ ފުޓުބޯޅައިގެ ނަން މަޝްހޫރު ފަރާތްތެކެވެ.
ޔޫރޯ ފުޓުބޯޅަ މުބާރާތަށް ހާއްސަކޮށް އަދަދުން ގެނެސްދޭ "ބޯޅައީދު - ޔޫރޯ 24" ކަވަރޭޖާ ގުޅޭގޮތުން ވާހަކަދައްކަވަމުން އަދަދުގެ ސީއީއޯ ހުސެއިން ފިޔާޒް މޫސާ ވިދާޅުވީ, މީގެ ކުރީ ފަހަރުތަކެކޭ އެއްގޮތަށް މިފަހަރުވެސް އަދަދުގެ ބޯޅަ އީދު ތަފާތުވެފައި ފުރިހަމަ ވާނެ ކަމަށެވެ.
"އަދަދުން އަބަދުވެސް މަސައްކަތް ކުރަނީ މިފަދަ ކޮންމެ އީދަކާ ދިމާކޮށް ދިވެހިންގެ މެދުގައި ފޯރި އިތުރުކޮށް އެންމެ ފަހުގެ މައުލޫމާތުތައް ގެނެސްދިނުމަށް. މިފަހަރުގެ އަދަދުން ގެނެސްދޭ ބޯޅަ އީދު ފުރިހަމަވެފައި ތަފާތުވާނެ،" އަދަދުގެ ސީއީއޯ ހުސެއިން ފިޔާޒް މޫސާ ވިދާޅުވި އެވެ.
މި ފަހަރުގެ "ބޯޅައީދު - ޔޫރޯ 24" ކުރިއަށްދާއިރު އަދަދު އިން ވަނީ ގޯލް އާރް އާއި ގުޅިގެން ސްކޯ ދިމާކޮށްގެން އިނާމު ހޯދުމުގެ ފުރުސަތު އާންމުންނަށް ހުޅުވާލަން ނިންމައިފަ އެވެ. މީގެ އިތުރުން، "ބޯޅައީދު - ޔޫރޯ 24" ކުރިއަށްދާއިރު ސޯޝަލް މީޑިއާގައި ހާއްސަ އިނާމުތައް ލިބޭ ސަޕްރައިޒްތަކެއް އާންމުންނަށް ދޫކޮށްލުމަށް "އަދަދު" އިން ވަނީ ނިންމައިފަ އެވެ.
މީގެ އިތުރުން، "އަދަދު"ގެ ވެބްސައިޓްގައި، ޔޫރޯ 2024 އަށް ހާއްސަ ޕޭޖެއް ހިމެނޭނެ އެވެ.
