ޗައިނާ ސަރުކާރަށް ސިޔާސީ ލަފާދޭ ކޮންފަރެންސް, ޗައިނީސް ޕީޕަލްސް ޕޮލިޓިކަލް ކޮންސަލްޓޭޓިވް ކޮންފަރެންސް (ސީޕީޕީސީސީ)ގެ ވައިސް ޗެއާމަން ކަމަށްވާ ބާޓީ، މިއަދު ރައީސް ޑރ. މުހައްމަދު މުއިއްޒުގެ އަރިހަށް އިހުތިރާމުގެ ޒިޔާރަތެއް ކުރައްވައިފި އެވެ.
މި ބައްދަލުކުރެއްވުން އޮތީ މިއަދު މެންދުރު ރައީސް އޮފީހުގަ އެވެ. އެ ބައްދަލުކުރެއްވުމުގައި ފޮރިން މިނިސްޓަރު މޫސާ ޒަމީރު, އިކޮނޮމިކް މިނިސްޓަރު މުހައްމަދު ސައީދު އަދި ރައީސް އޮފީހުގެ ދެ މިނިސްޓަރުންނާއި ރައީސްގެ ޗީފް އޮފް ސްޓާފް ބައިވެރިވެވަޑައިގެންނެވި އެވެ.
މި އަހަރު ޗައިނާއަށް އެންމެ ފުރަތަމަ ފުރަމާނަ ދަތުރުފުޅެއް ކުރެއްވީ އެމަނިކުފާނުކަން ފާހަގަކުރައްވައި، އެ ފުރުސަތު އެމަނިކުފާނަށް ދެއްވިކަމަށްޓަކައި ރައީސް މިއަދު ޗައިނާގެ ސަރުކާރަށް ޝުކުރު އަދާކުރެއްވި އެވެ. ދެ ގައުމުގެ ގުޅުން އިތުރަށް ބަދަހިކުރުމަށް އެދިވަޑައިގަންނަވާ ކަމަށް ވެސް ބާޓީގެ އަރިހުން ރައީސް ވިދާޅުވި އެވެ.
މިދިޔަ މަޖިލިސް އިންތިހާބުގައި ޕީއެންސީން ހޯދި ކާމިޔާބީއަށް ސީޕީޕީސީސީގެ ވައިސް ޗެއާމަން މަރުހަބާ ވިދާޅުވި އެވެ.
ޗައިނާ ސަރުކާރުން ރާއްޖޭގެ އިސްތިގުލާލަށް އިހުތިރާމްކޮށް، އެއްބާރުލުން ދީ، ދެ ގައުމުގެ ހިޔާލު އެއްގޮތް ކަންކަމުގައި އެކުގައި މަސައްކަތްކޮށް، ދެ ގައުމުގެ މެދުގައި ގުޅުން ބަދަހިކުރުމަށް އުންމީދު ކުރައްވާ ކަމަށް ވެސް އޭނާ ވިދާޅުވި ކަމަށް ރައީސް އޮފީހުން ބުނެ އެވެ.
ސީޕީޕީސީސީ އަކީ ޗައިނާގެ ސަރުކާރަށް ސިޔާސީ ގޮތުން ލަފާދޭ އެންމެ މަތީ ކޮންފަރެންސެވެ. މި ކޮންފަރެންސުގެ މެންބަރުންގެ ގޮތުގައި ސިޔާސީންގެ އިތުރުން އެކި ސިނާއަތްތަކުގެ މާހިރުން ވެސް ހިމެނެ އެވެ. އެގޮތުން ގައުމުގެ އެކި ސިޔާސަތުތައް ކަނޑައެޅުމުގައި ސީޕީޕީސީސީ އިން އެކްސްޕާޓު އޮޕީނިއަން ތައް ސަރުކާރަށް އަރުވަ އެވެ.
