ވިހި ވަނަ ރައްޔިތުންގެ މަޖިލީހުގެ ފުރަތަމަ ދައުރުގައި ގާނޫނުއަސާސީ އިސްލާހުކުރަން ހުށަހަޅާ ބިލުގައި ރައްޔިތުންގެ މަޖިލީހުގެ މެންބަރުގެ އަދަދު އިތުރު ނުވާނެ ގޮތަސް ހިފެހެއްޓުމާއި ޖުޑީޝަލް ސާވިސް ކޮމިޝަން އެކުލަވާލެވޭ ގޮތް ބަދަލުކުރުން ހިމެނޭނެ ކަމަށް ރައީސް އޮފީހުން ބުނެފި އެވެ.
މި މަޖިލީހުގެ ފުރަތަމަ ދައުރުގައި ސަރުކާރުން 37 ބިލެއް ހުށަހަޅާނެ ކަމަށް ސަރުކާރުން މަޖިލީހަށް އަންގާފައިވާއިރު، އޭގެ ތެރޭގައި ގާނޫނުއަސާސީއަށް އިސްލާހު ގެނައުމުގެ ބިލެއް ވެސް ހިމެނެ އެވެ.
ސަރުކާރުން ގާނޫނުއަސާސީއަށް ގެންނަން ހުށަހަޅާ އިސްލާހުތަކުގެ ތަފުސީލަށް އެދި "އަދަދު" އިން ސުވާލު ކުރުމުން ރައީސް އޮފީހުގެ އިސް ތަރުޖަމާނު ހީނާ ވަލީދު ވިދާޅުވީ، އިސްލާހުތަކުގެ ތެރޭގައި ހިމެނެނީ ޖޭއެސްސީގެ ކޮމްޕޮޒިޝަން ބަދަލުކުރުމާއި ރައްޔިތުންގެ މަޖިލީހުގެ މެންބަރުންގެ އަދަދު ހިފެހެއްޓުން ފަދަ އިސްލާހުތައް ކަމަށެވެ.
އަދި މީގެ އިތުރުން ވެސް ސަރުކާރުން ގާނޫނުއަސާސީއަށް އިސްލާހުތަކެއް ހުށަހަޅާފާނެ ކަމުގެ އިޝާރާތެއް ހީނާ ވަނީ ދެއްވާފަ އެވެ.
"މީގެއިތުރުން ވެސް ގާނޫނުއަސާސީއަށް ގެންނަން ޖެހޭ އިތުރު އިސްލާހު ތަކާ ގުޅޭ ގޮތުން ދައުލަތުގެ ކަމާގުޅުންހުރި އިދާރާތަކާ މަޝްވަރާ ކުރަމުން ދަނީ،" ހީނާ ވިދާޅުވި އެވެ.
މަޖިލިސް މެންބަރުންގެ އަދަދު ހިފަހައްޓަން ގާނޫނުއަސާސީއަށް އިސްލާހެއް ގެންނަން ސަރުކާރުން ނިންމާފައި މިވަނީ، ދައުލަތުގެ ހަރަދުތައް ކުޑަކުރުމަށް 20 ވަނަ މަޖިލީހުން ކުރާނެ މަސައްކަތްތަކުގެ ތެރޭގައި ސިޔާސީ މުވައްޒަފުންނާއި ރައްޔިތުންގެ މަޖިލީހުގެ މެންބަރުން އަދި ލޯކަލް ކައުންސިލްތަކުގެ މެންބަރުންގެ އަދަދު މަދުކޮށް، ކެޕް ކުރުމުގެ މަސައްކަތް ހިމެނޭނެ ކަމަށް މަޖިލީހުގެ ނައިބު ރައީސް އަހުމަދު ނާޒިމް ވިދާޅުވިތާ މަދު ދުވަސްކޮޅެއް ފަހުންނެވެ.
ޖޭއެސްސީ އެކުލެވޭ ގޮތަށް އިސްލާހު ގެނައުމަކީ މަޖިލިސް ކެމްޕޭނުގައި ރައީސް ޑރ. މުހައްމަދު މުއިއްޒު ވެވަޑައިގެންނެވި ވައުދެކެވެ. އެގޮތުން ރައީސް ވަނީ ޖޭއެސްސީގައި ސިޔާސީ ފަރާތްތައް ހިމެނުން ހުއްޓުމަކަށް ގެންނަން ޖެހޭ ކަމަށް އޭރު ވިދާޅުވެފަ އެވެ.
މި ސަރުކާރުގެ ފަސް އަހަރުގެ ތެރޭގައި ޖުމްލަ 200 ބިލެއް ހުށަހަޅުއްވާނެ ކަމަށް ރައީސް މުއިއްޒު ވަނީ މީގެ ކުރިން ވިދާޅުވެފަ އެވެ.
"އެފަދަ ބިލްތަކާއި މިފަދަ އެތަށް ކަމެއް ހިމެނޭ ގޮތަށް މުޅި މެނިފެސްޓޯގައި ހުރި މިހުރިހާ ވައުދެއް ފުއްދުމަށް 200 އަށް ވުރެ ގިނަ އިސްލާހާ، އާ ބިލުތައް ފާސްކުރުމަށް މަޖިލީހުގެ އެހީތެރިކަން ބޭނުންވޭ،" އެމަނިކުފާނު އޭރު ވިދާޅުވި އެވެ.
މަޖިލީހުގެ ޖުމްލަ 79 މެންބަރުންނާއެކު ސަރުކާރަށް ފުރިހަމަ ތާއީދު އޮތްއިރު، މި އަދަދަކީ ސަރުކާރުން ބޭނުންވާ ގޮތަށް ގާނޫނު އަސާސީވެސް ބަދަލުކުރެވޭނެ ވަރުގެ މެޖޯރިޓީއެކެވެ.
