އިންޑިއާ އާއި ރާއްޖެއާ ދެމެދު އޮތް ގާތް ގުޅުމުގެ ތެރެއިން ކުރިއަށްވުރެވެސް ރަނގަޅު ކަންކަން ވެގެންދާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
އިންޑިއާގެ ބޮޑުވަޒީރު ނަރެންދުރަ މޯދީ ތިންވަނަ ދައުރަކަށް ހުވާކުރެއްވި ރަސްމިއްޔާތަށް ވަޑައިގެން އެގައުމުގައި ހުންނަވައިގެން ޕަބްލިކް ސާވިސް މީޑިއާއަށް ދެއްވި އިންޓަވިއުއެއްގައި ރައީސް ވިދާޅުވީ ދެ ގައުމުގެ ގުޅުމުގެ "އެކުވެރި ގާތް ގުޅުމުގެ" ތެރެއިން ކަންކަން ކުރާނީ ދިވެހި ރައްޔިތުންނަށް އެންމެ ހެވާ ލާބަ ލިބޭ ގޮތްތައް ބަަލައިގެން ކަމަށެވެ. ދަތުރުގައި ބޭއްވި މަޝްވަރާތަކުގެ ތެރެއިން ކަންކަން ފަހިވެގެންދާނެކަން ކަމަށް ވެސް އެމަނިކުފާނު ވިދާޅުވި އެވެ.
"ރާއްޖެއަށް އިރާދަކުރެއްވިއްޔާ ރަނގަޅު ކަންތައްތައް ކުރިއަށް އޮތްތަނުގަ ދެގައުމުގެ ގުޅުމުގެ ތެރެއިން ކުރިއަށްވުރެވެސް އިރާދަކުރެއްވިއްޔާ ރަނގަޅުވެގެންދާނެ ކަމަށް އަޅުގަނޑު ގަބޫލުކުރަން،" ރައީސް ވިދާޅުވި އެވެ.
މޯދީ ހުވާ ކުރެއްވި ރަސްމިއްޔާތުގައި ބައިވެރިވެވަޑައިގަންނަވަން ކުރެއްވި ދަތުރަކީ ރައީސް މުއިއްޒު އިންޑިއާއަށް ކުރެއްވި ފުރަތަމަ ރަސްމީ ދަތުރެވެ.
ރައީސް މުއިއްޒު ވެރިކަމަށް ވަޑައިގެންނެވިފަހުން އިންޑިއާ އާއި ރާއްޖެއާ ދެމެދު އޮތް ގުޅުން ފުރަތަމަ ގޯސްވި އެވެ. އެމަނިކުފާނު ވެރިކަމަށް ވަޑައިގެންނެވީ ވެސް ދެ ހެލިކޮޕްޓަރާއި ޑޯނިއާ މަތިންދާބޯޓު ދުއްވަން ރާއްޖޭގައި ތިބޭ އިންޑިއާ ސިފައިން ގައުމުން ބާލާނެ ކަމުގެ ވައުދާއެކު އެވެ.
އިންޑިއާގެ ބަދަލުގައި ރައީސް މުއިއްޒު މީގެ ކުރިން ގެންދެވީ ޗައިނާއާއެކު ގާތް ގުޅުމެއް ބާއްވަވަމުންނެވެ. އެމަނިކުފާނުގެ ފުރަތަމަ ރަސްމީ ދަތުރު ވެސް ކުރެއްވީ ޗައިނާއަށެވެ. އެ ދަތުރަށްފަހ އިންޑިއާއަށް ވަރުގަދަ ބަހުގެ ހަމަލާތަކެއް ވެސް ދެއްވި އެވެ.
ނަމަވެސް މިފަހަރުގެ ދަތުރުގެ ދައުވަތު ގަބޫލުކުރައްވައި ރައީސް ވިދާޅުވީ އިންޑިއާއާއެކު އޮތް ގުޅުން ރަނގަޅުކޮށް މޯދީއާއެކު މަސައްކަތް ކުރައްވަން އެދިވަޑައިގަންނަވާ ކަމަށެވެ. ޕީއެސްއެމްއަށް ދެއްވި އިންޓަވިއުގައި އެމަނިކުފާނު ވިދާޅުވޒީ މިއީ ރާއްޖެއަށް ވަރަށް ކާމިޔާބު ދަތުރެއް ކަމަށާއި ދައުވަތު ދެއްވި ކަމަށްޓަކައި މޯދީއަށް ޝުކުރު އަދާކުރައްވާ ކަމަށެވެ.
"މި ދަތުރުގަ އާދެވި މިކަމުގަ ބައިވެރިވެވުނީމަ އަދި ބައްދަލުވުންތަކަށްވެސް ވަރަށް ބޮޑަށް އަޅުގަނޑު ޝުކުރު އަދާކުރަން އިންޑިއާގެ ބޮޑުވަޒީރާއި ރައީސާއި އަދި [އެކްސްޓާނަލް އެފެއާޒް މިނިސްޓަރު] ޖައިޝަންކަރާވެސް ބައްދަލުވި،" ރައީސް ވިދާޅުވި އެވެ.
އިންޑިއާއަށް ކުރެއްވި ދަތުރު ނިންމަވާލެއްވުމަށްފަހު ރައީސް މިއަދު ހެދުނު ވަނީ މާލެ ވަޑައިގެންފަ އެވެ. މި ދަތުރުގައި ބައިވެރިވި ސަރުކާރުގެ އިސް ވަފުދުގައި ފޮރިން މިނިސްޓަރު މޫސާ ޒަމީރާއި ޑރ. މުހައްމަދު ޝަފީގު ބައިވެރިވެވަޑައިގެންނެވި އެވެ.
