އިންޑިއާގެ ބޮޑުވަޒީރު ނަރެންދުރަ މޯދީ ހުވާ ކުރެއްވުމުގެ ރަސްމިއްޔާތު ލައިވް ކުރަން ނިންމުމުން އެކަމަށް ފާޑުކިޔުން އަމާޒުވި ފަހުން އެ ކަވަރޭޖު ނުގެނެސްދޭން ޕަބްލިކް ސާވިސް މީޑިއާއިން ނިންމައިފި އެވެ.
ލައިވް ކެންސަލް ކުރި ސަބަބާ ގުޅޭ ގޮތުން ޕީއެސްއެމްގެ ޑެޕިއުޓީ މެނޭޖިން ޑިރެކްޓަރު، ޔާމީން ރަޝީދުއާ ސުވާލު ކުރުމުން ވިދާޅުވީ މޯދީ ހުވާ ކުރައްވާ ރަސްމިއްޔާތު ލައިވް ކުރަން އެއް އިރަކު ވެސް ނުނިންމާ ކަމަށެވެ.
"އަޅުގަނޑުމެން އެއްވެސް އިރެއްގައި ލައިވް ކުރާކަށް ނުނިންމަން، އެއީ ކަނޑައެޅިގެން ދޮގު ހަބަރެއް،" ޔާމީން ވިދާޅުވި އެވެ.
އޭނާ އެހެން ވިދާޅުވި ނަމަވެސް "އަދަދު" އަށް ވަނީ ޕީއެސްއެމް ޕްރޮގްރާމްތަކުގެ ޝޫޓިން ތާވަލު ލިބިފަ އެވެ. މޯދީގެ ރަސްމިއްޔާތުގެ ލައިވް ކަވަރޭޖު ގެނެސްދިނުމަށް ޕީއެސްއެމް ޕްރޮގުރާމްތަކުގެ ޝޫޓިން ތާވަލުގައި ހިމަނާފައި އޮތީ މިއަދު އިރުއޮއްސި 6:00 އިން 8:00 އާ އަށެވެ. އެ ކަވަރޭޖު ގެނެސްދިނުމަށް އެގަޑިއަށް ތާވަލުކޮށް ޕްރެޒެންޓަރުންނާއި ޓެކްނީޝަނުންގެ އިތުރުން ސައުންޑް އަދި ލައިޓްްސްއަށް ވެސް މުވައްޒަފުން ހަމަޖައްސާފައިވެ އެވެ.
އޭގެ އިތުރުން، މޯދީ ހުވާ ކުރެއްވުމުގެ ރަސްމިއްޔާތު ލައިވް ކުރަން ނިންމިކަން ޕީއެސްއެމްގެ ތިން މުވައްޒަފަކު މި ނޫހަށް ކަށަވަރުކޮށްދިނެވެ.
ނަމަވެސް އެ ކަވަރޭޖު ކެންސަލް ކުރިކަން މިހާރު އެތަނުގެ މުވައްޒަފުންނަށް ވަނީ އަންގައިފަ އެވެ.
ޕީއެސްއެމްގެ އެތެރޭގެ ޕްރޮގުރާމު ތާވަލުގައި މޯދީގެ ލައިވް ކަވަރޭޖު ގެނެސްދިނުމަށް ތާވަލުކޮށް މުވައްޒަފުންނަށް ޑިއުޓީ ބަހާފައި -- ފޮޓޯ: ޕީއެސްއެމް
މައުލޫމާތު ލިބިފައި ވާގޮތުގައި ޕީއެސްއެމްގެ މުވައްޒަފުން އިންޑިއާއަށް ގޮސްފައި ވަނީ ވެސް ލައިވް ކުރަން ބޭނުންވާ އިކުއިޕްމެންޓުތައް ހިފައިގެންނެވެ. މިއަދު ހެނދުނު 10 ގެ ހަބަރުގައި ވެސް ވަނީ ޕީއެސްއެމްގެ ލައިވް އިންޑިއާއިން ގެނެސްދީފަ އެވެ.
އިންޑިއާގެ ބޮޑުވަޒީރަކު ހުވާ ކުރައްވާ ރަސްމިއްޔާތު މީގެ ކުރިން ދުވަހަކު ވެސް ރާއްޖޭގެ މީޑިއާއަކުން ލައިވްކޮށްފައެއް ނުވެ އެވެ. މިއަދުގެ ރަސްމިއްޔާތުގެ ލައިވް ކަވަރޭޖު ނުގެނެސްދޭން އެ މީޑިއާއިން ނިންމީ އާންމުންގެ ނަފުރަތާއި ނުރުހުން އިންތިހާއަށް އަމާޒުވި ފަހުންނެވެ.
މޯދީގެ ރަސްމިއްޔާތު ޕީއެސްއެމުން ލައިވް ކުރަން ނިންމި ހަބަރު މި ނޫހުން ގެނެސްދިނުމުން އާންމުން ވަނީ ސޯޝަލްމީޑިއާގައި ޕީއެސްއެމްއަށް ނަފުރަތުގެ ބަސްތައް އޮއްސާލައިފަ އެވެ.
އެ ރަސްމިއްޔާތުގައި ބައިވެރިވެވަޑައިގަތުމަށް ރައީސް ޑރ. މުހައްމަދު މުއިއްޒު ވަނީ ރޭ އިންޑިއާއަށް ވަޑައިގެންފަ އެވެ.
އެމަނިކުފާނު އިންޑިއާއަށް މި ވަޑައިގަތީ ވެރިކަމަށް ވަޑައިގަތުމަށްފަހު ރަސްމީ ހައިސިއްޔަތުން ފުރަތަމަ ފަހަރަށެވެ.
ތިންވަނަ ދައުރެއް މޯދީ ކަށަވަރުކުރެއްވުމާއެކު އެންމެ ފުރަތަމަ މަރުހަބާ ވިދާޅުވި ލީޑަރުންގެ ތެރޭގައި ރައީސް މުއިއްޒު ހިމެނިވަޑައިގަންނަވަ އެވެ. އެކްސްގައި ކުރެއްވި ޕޯސްޓުގައި ރައީސް ވަނީ ދެގައުމުގެ ހަމަޖެހުމާއި ތަރައްގީއާއި ހަމަޖެހުމަށް އެކުގައި މަސައްކަތް ކުރައްވާނެ ކަމުގެ ޔަގީންކަން ވެސް ދެއްވާފަ އެވެ.
ބޮޑުވަޒީރުކަމުގެ ހުވާ ފުރަތަމަ ދައުރުގައި މޯދީ ކުރެއްވިއިރު އެ ރަސްމިއްޔާތުގައި އޭރުގެ ރައީސް އަބްދުالله ޔާމީން ބައިވެރިވެވަޑައިގެންނެވި އެވެ. ނިމިދިޔަ ދައުރުގައި ވެރިކަން ކުރެއްވި ރައީސް އިބްރާހިމް މުހައްމަދު ސޯލިހު ހުވާކުރެއްވުމުގެ ރަސްމިއްޔާތަށް 2018 ގައި މޯދީ ރާއްޖެ ވަޑައިގެންނެވި އެވެ.
