ރައީސް ޑރ. މުހައްމަދު މުއިއްޒުގެ ރިޔާސީ ވައުދާ އެއްގޮތަށް ސަރުކާރުން ހިލޭ ހައްޖަށް ފޮނުވާ މީހުންގެ ތެރެއިން ފުރަތަމަ 50 މީހުން މިއަދު ހައްޖަށް ފުރާނެ ކަމަށް ރައީސް އޮފީހުން ބުނެފި އެވެ.
ރައީސް އޮފީހުން ރޭ މީޑިއާތަކަށް ފޮނުވި މެސެޖެއްގައި ބުނީ އެ މީހުން ފުރާނީ ހައްޖާޖީންގެ ފަހު ގްރޫޕާއެކު މިއަދު މެންދުރު ކަމަށެވެ. އެ ފްލައިޓު ފުރަން ހަމަޖެހިފައިވަނީ 1:55 ގަ އެވެ.
ހައްޖު ކޯޕަރޭޝަން ހަރުދަނާކޮށް ހައްޖުގެ އަގު ހެޔޮކުރުމުގެ އިތުރުން، ފަސް އަހަރު ތެރޭގައި 1،000 ފަގީރުން ހިލޭ ހައްޖުގެ އަޅުކަމަށް ފޮނުވާނެ ކަމަށް ރައީސް މުއިއްޒު ވައުދުވެވަޑައިގަތީ އޮގަސްޓު 18, ގައި މުލަކުގައި ބޭއްވި ކެމްޕޭން ޖަލްސާއެއްގަ އެވެ.
އޭގެ ތެރެއިން ފުރަތަމަ އަހަރު ހައްޖަށް ފޮނުއްވާނީ 50 މީހުން ކަމަށް ރައީސް އިއުލާނުކުރެއްވީ ޑިސެމްބަރު 5، 2023 ގައި އޮތް ވަޒީރުންގެ މަޖިލީހުގެ ބައްދަލުވުމަށްފަހު ނޫސްވެރިންނާ ބައްދަލުކުރައްވާ ވާހަކަދައްކަވަމުންނެވެ.
"ފަސް އަހަރު ތެރޭގައި 1000 މީހުން ހިލޭ ހައްޖަށް ފޮނުވުން، ފުރަތަމަ 50 މީހުން، އެކި އަހަރު އަދަދުތައް ތަފާތުވާނެ،" ރައީސް އެދުވަހު ވިދާޅުވި އެވެ.
މި އަހަރު ރާއްޖެއިން ހައްޖަށް މީހުން ގެންދަނީ ހަމައެކަނި ހައްޖު ކޯޕަރޭޝަނުންނެވެ. އިސްލާމިކް މިނިސްޓްރީ ބުނެފައިވާ ގޮތުގައި އެހީތެރިން ފިޔަވާ މި އަހަރު ރާއްޖެއިން 980 މީހަކު ހައްޖަށް ދާނެ އެވެ. ސައުދީއިން ރާއްޖެއަށް ދޫކުރާ ހައްޖު ކޯޓާގެ އަދަދަކީ 1000 އެވެ.
ރައީސްގެ ވައުދުގެ ދަށުން މި އަހަރު ހައްޖަށް ފޮނުވާ ފަގީރުންގެ އަދަދަކީ 60 ކަމަށްވެސް އިސްލާމިކް މިނިސްޓްރީން ފަހުން ނިންމި ނަމަވެސް އޭގެ ތެރެއިން 10 މީހުން ވަނީ އެ ފުރުސަތު ދޫކޮށްލާފަ އެވެ.
