އިންޑިއާގެ އާންމު އިންތިހާބު ކާމިޔާބު ކުރައްވައި ވެރިކަމުގެ ތިންވަނަ ދައުރު ކަށަވަރު ކުރެެއްވުމުން އިންޑިއާގެ ބޮޑުވަޒީރު، ނަރެންދުރަ މޯދީއަށް ރައީސް މަރުހަބާ ދަންނަވައި ރައީސް މުއިއްޒު ލިޔުއްވި މެސެޖަށް ޝުކުރު އަދާ ކުރައްވައި މޯދީ ޖަވާބުދެއްވައިފި އެވެ.
ރައީސް މުއިއްޒުގެ މެސެޖު ރީޕޯސްޓު ކުރައްވައި އެކްސްގައި މޯދީ ލިޔުއްވި މެސެޖުގައި ވިދާޅުވެފައި ވަނީ ރާއްޖެއަކީ އިންޑިއާގެ ގާތް އަވަށްޓެރިއެއްގެ އިތުރުން ވަރަށް މުހިންމު ބައިވެރިއެއް ކަމަށެވެ.
"ދެ ގައުމުގެ ގުޅުންތައް އިތުރަށް ވަރުގަދަކުރުމަށް މިހާރަށްވުރެ ގާތްކޮށް މަސައްކަތް ކުރުމަށް އަޅުގަނޑުގެ ވެސް ޝައުގުވެރިކަން އެބަ ހުރި،" މޯދީ ލިޔުއްވާފައިވެ އެވެ.
ނިމިދިޔަ ދައުރުގައި މޯދީ ނިސްބަތްވެވަޑައިގަންނަވާ، ބީޖޭޕީއަށް އިންޑިއާގެ ގާނޫނު ހަދާ މަޖިލީހުގެ ތިރިގެ، ލޮކްޝަބާގެ ސާފު މެޖޯރިޓީ އޮތް ނަމަވެސް މިފަހަރުގެ އިންތިހާބުގައި އެކަނި ސަރުކާރެއް އެކުލަވައިލެވޭ އަދަދަށް އެ ޕާޓީއަށް މަޖިލީހުގެ ގޮނޑި ލިބިފައެއް ނުވެ އެވެ.
ތިންވަނަ ދައުރު މޯދީ ކަށަވަރު ކުރައްވާފައި ވަނީ ބީޖޭޕީއާއެކު ކޯލިޝަން ހަދާފައިވާ އެންޑީއޭއަށް ލިބުނު ގޮނޑިތައް ހިމަނައިގެންނެވެ.
މިއީ 1962 ގެ ފަހުން އިންޑިއާގައި ސަރުކާރަކުން ތިންވަނަ ދައުރެއް ކާމިޔާބުކުރި ފުރަތަމަ ފަހަރެވެ.
މޯދީއަށާއި ބީޖޭޕީ އަދި ބީޖޭޕީ އިން ލީޑުކުރާ އެންޑީއޭ ކޯލިޝަނަށް ރައީސް މުއިއްޒު މަރުހަބާ ވިދާޅުވީ ސޯޝަލް މީޑިއާ، އެެކްސްގައި ޖެއްސެވި ޕޯސްޓަކުންނެެވެ.
އެ މެސެޖުގައި ރައީސް މުއިއްޒު ވަނީ ކުރިއަށް އޮތް ދުވަސްތަކުގައި މޯދީއާއެކު މަސައްކަތް ކުރެއްވުމުގެ އުންމީދު އެބައޮތް ކަމަށާއި ދެގައުމުގެ ހަމަޖެހުމާއި ތަރައްގީއާއި ހަމަޖެހުމަށް އެކުގައި މަސައްކަތް ކުރައްވާނެ ކަމުގެ ޔަގީންކަން ވެސް ދެއްވައިފަ އެވެ.
ރައީސް މުއިއްޒުގެ ސަރުކާރާ ހަވާލުވުމަށްފަހު، ރާއްޖެއާ އިންޑިއާއާ ދެމެދު އޮތް ގުޅުމަށް ވަނީ ކޮންމެވެސް ވަރެއްގެ ބުރޫތަކެއް އަރާފަ އެވެ. އެގޮތުން ރާއްޖޭގެ ތިން ނައިބު ވަޒީރަކު މޯދީއަށް ސޯޝަލް މީޑިއާގައި މަލާމަތް ކުރުމާއި ރައީސްގެ ނުސީދާ ބަހުގެ ހަމަލާތަކަކަށްފަހު ދެ ގައުމުގެ ހާރިޖީ ގުޅުން ގޯސްވި އެވެ.
ނަމަވެސް، އޭގެ ފަހުން ރާއްޖޭގައި ތިބި އިންޑިއާ ސިފައިން ފޮނުވާލާ އެ ގައުމުން ބޭނުންވި ގޮތަށް މަދަނީން ގެނެސް، ހާރިޖީ ވަޒީރު މޫސާ ޒަމީރު އިންޑިއާއަށް ކުރެއްވި ދަތުރާއެކު ދެ ގައުމުގެ ގުޅުންވަނީ ކުރިއަށްވުރެ ރަނގަޅުވެފަ އެވެ.
