ފާއިތުވި މަހު ސްޓެލްކޯއިން ފޮނުވި ކަރަންޓު ބިލުތައް ބޮޑުވުމުގެ ސަބަބުން އާންމުންގެ ނުރުހުމާއި ޝަކުވާ ވަރަށް ބޮޑަށް އަމާޒުވެފައި ވަނިކޮށް 2021 ގައި މާލޭގެ މޭޔަރަކަށް ހުންނަވަނިކޮށް ކަރަންޓު ބިލުތަކާ ގުޅޭ ގޮތުން, ރައީސް ޑރ. މުހައްމަދު މުއިއްޒު ކުރެއްވި ޓްވީޓަކަށް ފާޑުކިޔުން އަމާޒުވެއްޖެ އެވެ.
ގޭބިސީތަކަށް ކަރަންޓު ބިލުތައް ލިބުމާ އެކު އާންމުންގެ ތެރެއިން ގިނަ ބަޔަކު ވަނީ އޭގެ ކުރީ ބިލަށް ވުރެ ވަރަށް ބޮޑުތަނުން އިތުރުވެފައިވާ ކަމަށް ބުނެ ބިލުތަކުގެ ފޮޓޯތައް ސޯޝަލް މީޑިއާގައި ހިއްސާކޮށްފަ އެވެ. އެ ކަންބޮޑުވުންތަކާ އެކު ސްޓެލްކޯ ކައިރީގައި މުޒާހަރާ ވެސް ކުރި އެވެ.
ބިލު ބޮޑުވުމުގެ ހޫނުގައި މިފަހަރު ތިލަވީ ޖުލައި 29, 2021 ގައި މާލޭގެ މޭޔަރަކަށް ރައީސް މުއިއްޒު ހުންނެވި އިރު ކުރެއްވި ޓްވީޓެކެވެ.
"މި މަހުގެ ކަރަންޓު ބިލަކީ މާލޭގެ ގިނަ ރައްޔިތުންނަށް ދެއްކޭ ވަރަށްވުރެ ބޮޑު ބިލެއް. ހާލުގައި އުޅެމުންދާ ރައްޔިތުން އިތުރަށް ހާލުގައި ޖެހޭގޮތް މިވަނީ ވެފައި. ރައްޔިތުން އަތުގައި ނެތް ފައިސާއަކުން ބިލް ދައްކަން މިވަނީ ޖެހިފައި," އެ ޓްވީޓުގައި ވިދާޅުވެފައިވެ އެވެ.
އެ ޓްވީޓު އެކި ސޯޝަލް މީޑިއާ ޕްލެޓްފޯމްތަކުގައި ދަނީ ދައުރުވަމުންނެވެ. އަދި, އެމަނިކުފާނުގެ ޓްވީޓަށް ބައެއް މީހުން ދަނީ ރިޕްލައި ވެސް ކުރަމުންނެވެ.
"ދެން ކިހިނެއް ހަދަންވީ. ރައީސްގެ ދީލަތި އެހީގައި ޑިސްކައުންޓް ދީފައި އެވާހަކަ ގޮވަންތަ ރެޑީވަނީތި," މީހަކު ރައީސަށް ދިން ރިޕްލައިގައި ސުވާލުކުރި އެވެ.
"ހާލުގައި އުޅެމުންދާ ރައްޔިތުން، އުޑުގައި ޖެހިފައި ބިމުގައި ޖެހުނަސް، ކަރަންޓް ބިލް ޖެހޭނީ ހަމަ ދައްކަން."
ރައީސް އޭރު ޓްވީޓު ކުރެއްވީ އޭރު ހުންނެވި މަގާމުގެ ގޮތުން އިތުރަށް ތާއީދު ހޯއްދެއްވުމަށް ކަމަށް ހިޔާލު ފާޅުކުރި ބައެއް މީހުން ވަނީ ބުނެފަ އެވެ. އަދި, ރައީސް ވެރިކަމަށް ހަވާލުވެވަޑައިގަތުމަށް ފަހު އެމަނިކުފާނުގެ "ރާގު ބަދަލުވެފައި" ވާ ކަމަށް ވެސް ބައެއް މީހުން ވަނީ ބުނެފަ އެވެ.
"ބިލުތަކާ ގުޅިގެން އާންމުން ރައްޔިތުން ވަނީ އެތަކެއް ތަކުލީފުތަކެއް އުފުލަން ޖެހިފައި. މަނިކުފާނުގެ މިވަގުތު އެއްވެސް އިހުސާސެއް ނެތީތޯ," އެކްސްގައި މީހަކު ޝަކުވާ ކުރަމުން ބުނެފައިވެ އެވެ.
"މިފަހަރު މަނިކުފާނުގެ ސަރުކާރުގަ ވެސް މިއޮތީ ކަރަންޓު ބިލް ބޮޑުކޮށްފަ. ރައްޔިތުން ބޮޑުކުލިދައްކާފަ ނެތް ފައިސާއަކުން ބިލް ދައްކާނީ ކިހިނެތްތޯ؟ މަނިކުފާނު މިކަން ހައްލުކޮށްދެއްވާނެ ކަމަށް މިބަލަނީ."
ރޯދަ މަހުގެ ގިނަ ދުވަސްތައް ކުރީ މަހުގެ ބިލުގައި ހިމެނިފައި މިފަހަރުގެ ބިލުގައި ރޯދަ މަހުގެ މަދު ދުވަސްތަކެއް ހިމެނޭއިރު, މެއި މަހުގެ ބިލުތައް ބޮޑުވުމުގެ ޝަކުވާއިން ސޯޝަލް މީޑިއާ ވަނީ ފުރާލާފަ އެވެ.
ސްޓެލްކޯއިން އެ ކުންފުނީގެ "އެކްސް" އެކައުންޓުގައި ކޮށްފައިވާ ޕޯސްޓެއްގައި ބުނީ ކަރަންޓު ބިލާއި ގުޅިގެން ކަސްޓަމަރުން ހުށަހަޅަން ބޭނުންވާ ޝަކުވާތައް އެ ކުންފުނީގެ ކަސްޓަމާ ސާވިސް އަށް ހުށަހެޅޭނެ ކަމަށެވެ.
އެގޮތުން ސްޓެލްކޯގެ ކަސްޓަމާ ސާވިސް ބިލްޑިންގްގެ ފޯނު ނަމްބަރު، 7788438 އަށް ވަޓްސްއެޕް ނުވަތަ ޓެލެގްރާމް މެދުވެރިކޮށް ޝަކުވާ ހުށަހެޅުމުގެ ފުރުސަތު އެ ކުންފުނިން ވަނީ ހުޅުވާލާފަ އެވެ. އަދި ސްޓެލްކޯގެ އީމެއިލްއަށް ވެސް ޝަކުވާ ހުށަހެޅޭނެ އެވެ.
