ކަރަންޓު ބިލުތައް އާދަޔާ ހިލާފަށް ބޮޑުކަމަށް ބުނެ ގިނަ ބަޔަކު ޝަކުރާކުރަން ފެށުމުން، އާންމުންގެ ޝަކުވާތަށް ހުށަހަޅާނެ ހާއްސަ ނަމްބަރެއް ސްޓެލްކޯއިން ދީފި އެވެ.
އިއްޔެ އާއި މިއަދު ގިނަ އަދަދެއްގެ ބަޔަކު ގެންދަނީ އެމީހުންގެ ގޭބިސީތަކުގެ ކަރަންޓު ބިލު އޭގެ ކުރީ ބިލަށް ވުރެ ވަރަށް ބޮޑުތަނުން އިތުރުވެފައިވާ ކަމަށް ބުނެ ބިލުތަކުގެ ފޮޓޯތައް ސޯޝަލް މީޑިއާގައި ހިއްސާކުރަމުންނެވެ. އަދި މިވަގުތު ސްޓެލްކޯ ކައިރިއަށް އެއްވެ ބައެއް މީހުން އަންނަނީ މުޒާހަރާ ކުރަމުންނެވެ.
ސްޓެލްކޯއިން އެ ކުންފުނީގެ "އެކްސް" އެކައުންޓުގައި ކޮށްފައިވާ ޕޯސްޓެއްގައި ބުނީ ކަރަންޓު ބިލާއި ގުޅިގެން ކަސްޓަމަރުން ހުށަހަޅަން ބޭނުންވާ ޝަކުވާތައް އެ ކުންފުނީގެ ކަސްޓަމާ ސާވިސް އަށް ހުށަހެޅޭނެ ކަމަށެވެ.
އެގޮތުން ސްޓެލްކޯގެ ކަސްޓަމާ ސާވިސް ބިލްޑިންގްގެ ފޯނު ނަމްބަރު، 7788438 އަށް ވަޓްސްއެޕް ނުވަތަ ޓެލެގްރާމް މެދުވެރިކޮށް ޝަކުވާ ހުށަހެޅުމުގެ ފުރުސަތު އެ ކުންފުނިން ވަނީ ހުޅުވާލާފަ އެވެ. އަދި ސްޓެލްކޯގެ އީމެއިލްއަށް ވެސް ޝަކުވާ ހުށަހެޅޭނެ އެވެ.
ކަސްޓަމަރުން ހުށަހަޅާ ޝަކުވާތަކަށް ގިނަވެގެން 24 ގަޑީރު ތެރޭގައި ޖަވާބުދާރީވުމަށް އެ ކުންފުނިން މަސައްކަތް ކުރަމުން އަންނަކަމަށް ސްޓެލްކޯއިން ބުނެ އެވެ.
