ރާއްޖެއިން ޗައިނާއަށް ދައްކަން ޖެހޭ ލޯނުތައް ރީސްޓްރަކްޗާ ކުރުމުގެ ވިސްނުމެއް ނެތް ކަމަށް ޗައިނާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު ވާން ލިޖިން ވިދާޅުވި ނަމަވެސް، އެ ވާހަކަ ސަރުކާރުން ދޮގުކޮށްފި އެވެ.
ލޯނު ރިސްޓްރަކްޗާ ކުރުމުގެ ވިސްނުމެއް ނެތް ކަމަށް ސަފީރު ވިދާޅުވީ މި ހިނގާ މެއި 17، ގައި ޗައިނާ އެމްބަސީގައި ބޭއްވި ނޫސްވެރިންގެ ބައްދަލުވުމެއްގަ އެވެ. ރާއްޖެ އާއި ޗައިނާގެ ޓެކްނިކަލް ޓީމުތަކުން ލޯނުތައް ރީސްޓްރަކްޗާނުކޮށް ކުރިއަށް ދެވޭނެ ގޮތެއް ބަލަމުން އަންނަ ކަމަށް ސަފީރު އެ ދުވަހު ވިދާޅުވި އެވެ.
މިކަމުގައި ސަރުކާރެއްގެ ބަހެއް ހޯދުމަށް "އަދަދު" އިން ސުވާލުކުރުމުން ހީނާ ވިދާޅުވީ، ލޯނުތައް ރީސްޓްރަކްޗާ ނުކުރާނެ ކަމަށް ބުނެ ދައްކާ ވާހަތަކަކީ ރަނގަޅު ވާހަތަކެއް ނޫން ކަމަށެވެ.
"ޗައިނާއިން ލޯނު ރިސްޓްރަކްޗަރ ކޮށްނުދޭނެކަމަކަށް ބުނެ ދެކެވެމުންދާ ވާހަކަތަކަކީ ރަނގަޅު ވާހަކަތަކެއްނޫން،" ހީނާ މެސެޖުން ފޮނުވި ޖަވާބުގައި ވިދާޅުވި އެވެ.
ނަމަވެސް ނޫސްވެރިންގެ ބައްދަލުވުމުގައި ސަފީރު ވަނީ ލޯނުތައް ރީސްޓްރަކްޗާ ކޮށްފި ނަމަ ރާއްޖެއަށް ކުރާނެ ނޭދެވޭ އަސަރުތައް ވެސް ފާހަގަކުރައްވާފަ އެވެ. އޭނާ ވިދާޅުވީ ލޯނުތައް ރީސްޓްރަކްޗާކޮށްފި ނަމަ، ރާއްޖެއަށް އާ ޕްރޮޖެކްޓްތައް ހިންގުމަށް ލޯނުތައް ނަގަން ދަތިވާނެ ކަމަށާއި، އެ ނޫން ގޮތަކަށް އެކަން ކުރެވޭނެ މަގެއް ފެނޭތޯ ވެސް މަސައްކަތް ކުރަމުން އަންނަ ކަމަށެވެ.
ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ ވެރިކަމުގައި ގެދޮރުވެރިކަމުގެ މަޝްރޫއުތައް ހިންގަން ޗައިނާ ސަރުކާރުން ގިނަ ލޯނުތައް ވަނީ ނަގާފަ އެވެ. އަދި އެ ލޯނުތައް މިހާތަނަށް އެއްކޮށް ދައްކާ ނިމިފައެއް ނުވެ އެވެ.
ރާއްޖެއިން ޗައިނާއަށް އަދާކުރަން ޖެހޭ ލޯނުގެ މުއްދަތު ފަސްކޮށްދޭނެ ކަމުގެ ޔަގީންކަން ލިބިފައިވާ ކަމަށް މިދިޔަ ޖެނުއަރީ މަހު ޗައިނާއަށް ކުރެއްވި ރަސްމީ ދަތުރުފުޅަށްފަހު އެނބުރި ރާއްޖެ ވަޑައިގެން ރައީސް މުއިއްޒު ވިދާޅުވި އެވެ.
