މީގެ 13 އަހަރު ކުރިން، ވިލިމާލޭގައި ގުރޫޕަކުން ހަމަލާދީ މަރާލި އަހުމަދު މިރުޒާ އިބްރާހިމް މަރާލި މައްސަލާގައި ކުށް ސާބިތުވެފައިވާ އަބްދުﷲ ނަޒީފަށް މިރުޒާގެ އާއިލާއިން މައާފު ދިނުމުން މަރުގެ އަދަބުގެ ބަދަލުގައި 17 އަހަރުގެ ޖަލު ހުކުމެއް ކްރިމިނަލް ކޯޓުން މިއަދު އިއްވައިފި އެވެ.
ވިލިމާލޭ ޕާކު ތެރޭގައި ލަކުޑިބުރިއަކުން ޖަހައި، ނ. މާޅެންދޫ ވައިޓްހައުސް މިރުޒާ މަރާލި މައްސަލައިގައި ދައުލަތުން ދައުވާ ކުރި ދެ މީހުންގެ ތެރެއިން ފުވައްމުލައް ސިޓީ, ޒާވިއާ، ނަޒީފުގެ މައްޗަށް ކުށް ސާބިތުވެއްޖެ ކަމަށް ކަނޑައަޅައި ކްރިމިނަލް ކޯޓުން ހުކުމް ކުރީ އޭނާ މެރުމަށެވެ.
ހައި ކޯޓުން އެ ހުކުމް ދެމެހެއްޓި އެވެ. މަރުގެ އަދަބު ކަނޑައެޅޭ އިރު ޝަރީއަތުގެ ތިން މަރުހަލާއިން ގޮތެއް ނިންމަން ގާނޫނުގައި ލާޒިމުކޮށްފައިވާތީ ސުޕްރީމް ކޯޓަށް މައްސަލަ ދިއުމުން މިރުޒާގެ އާއިލާއިން ވަނީ ނަޒީފަށް މާފުކޮށްފަ އެވެ.
އެހެންވެ އަނެއްކާ ވެސް އަދަބު ކަނޑައެޅުމަށް، ކްރިމިނަލް ކޯޓަށް މައްސަލަ ތަހުވީލު ކުރުމަށް ނުވަތަ ފޮނުވަން ސުޕްރީމް ކޯޓުން ނިންމީ އެވެ. އޭނާއަށް 17 އަހަރާއި ހަ މަހުގެ ޖަލު ހުކުމެއް ކަނޑައަޅަން ކްރިމިނަލް ކޯޓުން މިއަދު ހުކުމް ކުރީ، ސުޕްރީމް ކޯޓުގެ އެ އެންގުމުގެ ދަށުންނެވެ.
މަރުގެ އަދަބުން މާފު ލިބުމުން، ގާނޫނުގައި ކުށަށް ކަނޑަައަޅާފައިވާ އަސާސީ އަދަބަކީ 10 އަހަރުގެ މުއްދަތަކަށް ޖަލަށް ލުމެވެ.
ގާނޫނުގައި އަދަބުގެ ދަރަޖަ މަތިކުރުމުގެ މިންގަނޑުތައް ވެސް ހިމެނޭ އިރު ނަޒީފަށް އަދަބު ތިން ދަރަޖަ މަތިކުރަން މައްސަލަ ބައްލަވާ ގާޒީ ހުސައިން ފާއިޒު ރަޝާދު ނިންމެވި އެވެ. އެއީ ނަޒީފު ކުރި އަނިޔާވެރި އަމަލަށް ބެލުމަށް ފަހުގަ އެވެ.
މި ކުށުގެ ތުހުމަތުގައި ހަމްޒާ ބަންދުކުރީ އޭޕްރީލް 13، 2011 ގަ އެވެ. އޭނާ ބަންދުގައި ހުންނަތާ 13 އަހަރާއި އެއް މަހާއި 16 ދުވަސް ވެފައިވެ އެވެ. އެ މުއްދަތު އުނިި ކުރުމުން، ޖަލު ހުކުމުން ދެން ތަންފީޒު ކުރަން ޖެހޭނީ ހަތަރު އަހަރާއި ފަސް މަހާއި 14 ދުވަހެވެ.
އަދި ދެ މަސް ދުވަހު ރޯދަ ހިފުމަށް ވެސް ހުކުމްކުރި އެވެ. އަދި މަރުގެ ދިޔައަށް މިރުޒާގެ އާއިލާއިން އެދޭނަމަ ވަކި މައްސަލައެއްގެ ގޮތުގައި އެ މައްސަލަ ހުށަހެޅުމުގެ ހައްގު އޮންނާނެ ކަމަށް ވެސް ހުކުމް އިއްވުމުގެ މަޖިލިސް ނިންމާލައްވަމުން ގާޒީ ފާއިޒު ވިދާޅުވި އެވެ.
އެ މައްސަލާގައި ދެން ދައުވާކޮށްފައިވާ ވ. ފަޒީލާމަންޒިލް, މުހައްމަދު ޝިފާއުއަށް ވެސް މިރުޒާގެ އާއިލާއިން ވަނީ މާފުކޮށްފަ އެވެ. އޭނާއަށް، މިރުޒާގެ ވާރިސުން މާފުކުރީ ހައި ކޯޓު މަރުހަލާގަ އެވެ. ހައި ކޯޓުން ވަނީ ޝިފާއުގެ އަދަބަކަށް 17 އަހަރުގެ ޖަލު ހުކުމެއް ކަނޑައަޅައިފަ އެވެ.
