ރައީސް ޑރ. މުހައްމަދު މުއިއްޒު، ސީޝެލްސްގެ ރައީސް ވޭވަލް ރަމްކަލަވަން އާ ބައްދަލު ކުރައްވައިފި އެވެ.
އެންޓީގާ އެންޑް ބާބިޔުޑާގައި ކުރިއަށްދާ އިންޓަނޭޝަނަލް ކޮންފަރެންސް އޮން ސްމޯލް އައިލެންޑް ޑިވެލޮޕިން ސްޓޭޓްސް (ސިޑްސް)ގެ ހަވާސާގައި މިއަދު ދެ ރައީސުން ބައްދަލު ކުރައްވައި، ކުދި ޖަޒީރާ ގައުމުތަކަށް ކުރިމަތިވި ގޮންޖެހުންތަކާއި، އެ ގޮންޖެހުންތަކުން އަރައިގަތުމަށް ގައުމުތައް ގުޅިގެން މަސައްކަތް ކުރެވޭނެ ގޮތާއި، ސިޑްސް ކޮންފަރެންސްގެ މުހިންމު ކަމާ ބެހޭ ގޮތުން ވާހަކަ ދެއްކެވި އެވެ.
މި ބައްދަލުކުރެއްވުމުގައި، ދެ ގައުމުގެ މަސްލަހުތު އޮތް މުހިންމު އެކި މައްސަލަތަކުގެ މައްޗަށް ދެ ރައީސުން ވާހަކަ ދެއްކެވި އެވެ. އޭގެ ތެރޭގައި ޒުވާނުންނާއި ގުޅޭ އެކިއެކި ކަންކަމާއި، ދެ ގައުމުގެ ދޭދޭ ފަރުދުންގެ މެދުގައި ގުޅުން ދެމެހެއްޓުމުގެ އިތުރުން، އިންޑިއާ ކަނޑު ސަރަހައްދުގެ ސަލާމަތާއި، ކަނޑުގެ ލޮނުގަނޑު އުފުލުމުން ރައްކާތެރިވުމާއި، މުރަކަ ފަރުތައް ހިމާޔަތްކޮށް އާލާކުރުމާ ގުޅޭ ގޮތުން މަޝްވަރާކުރެއްވި އެވެ.
ދިވެހިރާއްޖެއަށް ހުރިހާ ދާއިރާއެއްގައި ވެސް އެހީތެރިކަމާއި އެއްބާރުލުން ދެއްވާނެ ކަމުގެ ޔަގީކަން ސީޝެލްސްގެ ރައީސް ވޭވަލް ރަމްކަލަވަން ދެއްވި އެވެ.
ކޮންމެ 10 އަހަރަކުން ބާއްވާ ސިޑްސް ކޮންފަރެންސް މި ފަހަރު ކުރިއަށްދާނީ އެންޓީގާ އެންޑް ބާބިޔުޑާގައި މި މަހުގެ 30 ގެ ނިޔަލަށެވެ.
މި ކޮންފަރެންސްގައި ރައީސްގައިގެ އަރިހުގައި ފޮރިން މިނިސްޓަރު މޫސާ ޒަމީރާއި އެންވަޔަރަމެންޓު މިނިސްޓަރު ތޯރިގު އިބްރާހިމް އާއި ހައުސިން މިނިސްޓަރު ޑރ. އަލީ ހައިދަރު އަހްމަދުގެ އިތުރުން އެޗްޑީސީގެ މެނޭޖިން ޑިރެކްޓަރު އިބްރާހިމް ފަަޒުލް ރަޝީދާއި ކްލައިމެޓް ޗޭންޖު އެންވޯއި އަލީ ޝަރީފާއި ފޮރިން މިނިސްޓްރީގެ އެމްބެސެޑާ އެޓް ލާޖު އަލީ ނަސީރު އަދި ޕްރޮޓޮކޯލް ހެޑް މުހައްމަދު ޝަހުދީ ވެސް ބައިވެރިވެވަޑައިގަންނަވަ އެވެ.
ސީޝެލްސްގެ ރައީސް ވޭވަލް ރަމްކަލަވަން އާއި އެމަނިކުފާނުގެ އަނބިކަނބަލުން ލިންޑާ ރަމްކަލަވަން ރަސްމީ ދަތުރުފުޅެއްގައި ޖޫން 2023 ގައި ރާއްޖެ ވަޑައިގަތެވެ.
