މީގެ ފަސް އަހަރު ކުރިން ޖޭއެސްސީއީން ކޯޓުތަކުގެ އެޑްމިނިސްޓްރޭޓަރުންގެ ފެންވަރު ބެލުމަށް ފަހު ވަކިކުރި 10 މުވައްޒަފުންނަށް އަލުން ވަޒީފާ ދީ ވަޒީފާ ގެއްލުނު ފަހުން ހިނގާފައިވާ މުއްދަތަށް ދޭން ޖެހޭ މުސާރަ ދިނުމަށް ލޭބަޓްރައިބިއުނަލާއި ހައިކޯޓުން ކޮށްފައި އޮތް ހުކުމެއް ސުޕްރީމް ކޯޓުން ދަމަހައްޓައިފި އެެވެ.
ކޯޓުތަކުގެ އެޑްމިނިސްޓްރޭޓަރުންގެ މަސައްކަތު ފެންވަރު ބެލުމަށް ނިންމާ ޖޭއެސްސީއިން އެ މަސައްކަތް ފެށީ 2019 ގަ އެވެ. އެ މަސައްކަތުގެ ތެރެއިން ވަކި ވަރަކަށް މާކްސް ނުލިބޭ ކަމަށް ބުނެ 10 މުވައްޒަފަކު ވަޒީފާއިން ވަކިކުރަން ނިންމީ 2020 ގެ މެދުތެރޭގަ އެވެ.
އެގޮތުން ވަކިކުރުން ނިންމީ ހައި ކޯޓާއި ކްރިމިނަލް ކޯޓާއި ފެމިލީ ކޯޓުގެ އިތުރުން މެޖިސްޓްރޭޓް ކޯޓުތަކުގެ ތެރެއިން ހަތް ކޯޓެއްގެ އެޑްމިނިސްޓްރޭޓަރުން ތަކެކެވެ. ވަޒީފާއިން ވަކިކުރި މުވައްޒަފުން މި މައްސަލަ ވަޒީފާއާ ބެހޭ ޓްރައިބިއުނަލަށް ހުށަހެމުން މައްސަލަ ނިމުނީ އެ މީހުންނާ އެއްކޮޅަށެވެ.
ޖޭއެސްސީއިން މި މައްސަލަ ހައި ކޯޓުގައި އިސްތިއުނާފުކުރުމުން އެ ކޯޓުންވެސް ނިންމާފައިވަނީ އެ މީހުން ވަކިކުރީ ގާނޫނާ ހިލާފަށް ކަމަށާއި ޓްރައިބިއުނަލް އިން އެންގި ގޮތަށް އެ މީހުންގެ ވަޒީފާ އަނބުރާ ދޭން ޖެހޭނެ ކަމަށެވެ. ނަމަވެސް ޖޭއެސްސީއިން ވަނީ މައްސަލަ ސުޕްރީމް ކޯޓުގައިވެސް އިސްތިއުނާފުކޮށްފަ އެވެ.
މި މައްސަލާގައި ޖޭއެސްސީއާ ދެކޮޅަށް މިއަދު ހުކުމް ކޮށްފައިވަނީ ސުޕްރީމް ކޯޓުގެ ފަނޑިޔާރުންގެ އިއްތިފާގުންނެވެ. އެ ހުކުމުގައި މި 10 މީހުން ވަޒީފާއިން ވަކިކުރަން ޖޭއެސްސީއިން ދެއްކި ސަބަބަކީ ގާނޫނާ ހިލާފު ސަބަބެއް ކަމަށް ބުނެފައިވެ އެވެ.
މި 10 މީހުންނަށް އަލުން ވަޒީފާ ދޭން އެ ފަރާތްތަކުން އެދުނު ގޮތަށް ނިންމި މައިގަނޑު އެއް ސަބަބެއް ގޮތުގައި ހުކުމުގައި ބުނެފައިވަނީ، އެތަނުން އެކެއްގެ ވަޒީފާ އިޔާދަކުރަން ޑިޕާޓްމެންޓް އޮފް ޖުޑީޝަލް އެޑްމިނިސްޓްރޭޝަނުން (ޑީޖޭއޭ) ނިންމާފައި އޮތުމެވެ. ވަކި މީހަކަށް ވަޒީފާ އިޔާދަކޮށްދިނުން އެއީ ޑީޖީއޭއަށް ލިބިދޭ އިހުތިޔާރެއް ނޫން ކަމަށް ކޯޓުގެ ހުކުމުގައި ބުނެފައިވެ އެވެ.
މީގެ ތެރޭގައި ހިމެނޭ އެންމެ މަތީ މުސާރަ ލިބޭ މުވައްޒަފުންގެ މުސާރައާއި އިނާޔަތަށް އެކު ޖުމްލަ 24،000 އެއްހާ ރުފިޔާ މަހެއްގެ މައްޗަށް އަރަ އެވެ. އެންމެ މަދުން ލިބޭ މުވައްޒަފަކަށްވެސް މަހަކު 16،000 ލިބޭނެ އެވެ. މީގެ އެންމެ ދަށް މުސާރައިން ބެލި ނަމަވެސް މި ހުކުމާ އެކު ބަދަލުގެ ގޮތުގައި ދައުލަތުން މި 10 މީހުންނަށް ހަތް މިލިއަނަށްވުރެ ގިނަ ރުފިޔާ ދޭން ޖެހޭނެ އެވެ.
