އުތުރު އެމެރިކާގެ ކެރީބިއަންގައި އޮންނަ އެންޓިގުއާ އެންޑް ބާބިއުޑާގައި ބާއްވާ ހަތަރުވަނަ ސްމޯލް އައިލެންޑް ޑިވެލޮޕިން ސްޓޭޓްސް (ސިޑްސް) ކޮންފަރެންސްގައި ރާއްޖޭގެ ފަރާތުން ރައީސް ޑރ. މުހައްމަދު މުއިއްޒު އާއެކު ތިން ވަޒީރުން ބައިވެރިވެވަޑައިގަންނަވާނެ ކަމަށް ރައީސް އޮފީހުން ހާމަކޮށްފި އެވެ.
މި ވަފުދުގައި ފޮރިން މިނިސްޓަރު މޫސާ ޒަމީރާއި ތިމާވެއްޓާ ބެހޭ މިނިސްޓަރު ތޯރިގު އިބްރާހިމް އާއި ހައުސިން މިނިސްޓަރު ޑރ. އަލީ ހައިދަރު އަހްމަދު ބައިވެރިވެވަޑައިގަންނަވާނެ އެވެ. އޭގެ އިތުރުން, އެޗްޑީސީގެ މެނޭޖިން ޑިރެކްޓަރު އިބްރާހިމް ފަަޒުލް ރަޝީދާއި ކްލައިމެޓް ޗޭންޖު އެންވޯއި އަލީ ޝަރީފާއި ފޮރިން މިނިސްޓްރީގެ އެމްބެސެޑާ އެޓް ލާޖު އަލީ ނަސީރު އަދި ޕްރޮޓޮކޯލް ހެޑް މުހައްމަދު ޝަހުދީ ވެސް ބައިވެރިވެވަޑައިގަންނަވާނެ އެވެ.
"މިއީ ވަރަށް ދުރަށް ކުރައްވަން ޖެހޭ ދަތުރުފުޅެއް. އަދި ރައީސް ހަތް ސްޓޭޓްމަންޓެއް އިއްވުމަށް ހަމަޖެހިފައިވާތީ އިދާރީ ކަންކަމަށާއި ހުރިހާ ކަމަކަށް ވެސް މިނިމަމް ސްޓާފުން ބޭނުންކުރާ ގޮތަށް ހަމަޖެހިފައި ވަނީ. ދުރު ދަތުރެއް މިއީ, ފުދޭވަރަކަށް އަގުބޮޑު ދަތުރެއް," ހީނާ މިއަދު ވިދާޅުވި އެވެ.
ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމެއްގައި ސަރުކާރުގެ ތަރުޖަމާނު ހީނާ ވަލީދު ވިދާޅުވީ ރާއްޖޭގެ ވަފްދުގެ ހަރަދުތަކުގެ ތެރެއިން ގިނަ ބޭފުޅުންގެ ހަރަދުތައް ބަލަހައްޓަނީ އދ. އިން ކަމަށެވެ.
ސިޑްސް ކޮންފަރެންސް އޮންނާނީ މެއި 27-30 އަށް އެންޓިގުއާ އެންޑް ބާބިއުޑާގެ ސެއިންޓް ޖޯންސްގަ އެވެ. ރާއްޖެއަކީ މިއަހަރުގެ ކޮންފަރެންސްގެ ކޯޗެއާ އެކެވެ. ސިޑްސްގައި އދ. ގެ 37 މެމްބަރު ގައުމު ހިމެނެ އެވެ.
ކުދި ޖަޒީރާ ގައުމުތަކުގެ ފުރަތަމަ ކޮންފަރެންސް 1989 ވަނަ އަހަރު ރާއްޖޭގައި ބޭއްވުމަށްފަހު ރާއްޖެއިން ވަނީ ކުދި ޖަޒީރާ ގައުމުތައް އެކުލެވޭ ޖަމާއަތެއް އުފެއްދުމުގެ މަސައްކަތް ބާރަށް ކުރިޔަށްގެންގޮސްފަ އެވެ.
