ނޫސްވެރިޔާ އަހުމަދު ރިލްވާން އަބްދުﷲ އާއި ބްލޮގަރު ޔާމީން ރަޝީދު މަރާލި މައްސަލައިގައި ތުހުމަތު ކުރެވޭ އިސްމާއިލް އަބްދުއްރަހީމް (އިސޫ) އަށް ހައުސިން ޑިވެލޮޕްމަންޓް ކޯރަޕަރޭޝަން (އެޗްޑީސީ) ގެ އިސް މަގާމެއް ދީފި އެވެ.
"އަދަދު" އަށް މައުލޫމާތު ލިބިފައިވާ ގޮތުގައި އިސޫއަށް ދިނީ އެޗްޑީސީގެ، ޑެޕިއުޓީ ޑިރެކްޓާ އޮފް ހުޅުމާލެ އޮޕަރޭޝަންސްގެ މަގާމެވެ.
އިސޫ ވަޒީފާއަށް ނުކުމެފައިވަނީ ކޮން ދުވަހެއްގައި ކަން ކަށަވަރެއްނުވެ އެވެ. އޭނާ ވަނީ މެއި 19، ގައި އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު މުއައްސަސާތަކާއި ކުންފުނިތަކާއެކު ބޭއްވި ބައްދަލުވުމުގައި އެޗްޑީސީގެ މުވައްޒަފެއްގެ ގޮތުގައި ބައިވެރިވެފަ އެވެ.
މިކަމާ ގުޅިގެން އެޗްޑިސީގެ ފަރާތުން ކޮމެންޓެއް ނުކުރި އެވެ.
ރިލްވާން ވަގަށް ނަގައި މަރައިިލި މައްސަލަ އަދި ޔާމީން މަރާލި މައްސަލާގައި އިސްކޮށް ހަރަކާތްތެރިވި ކަމަށް ތުހުމަތުކޮށް އިސޫ ހައްޔަރު ކުރީ ޖޫން 26، 2022، ގައި ހައްޔަރުކުރި އެވެ.
ނަމަވެސް ޓެގު އެޅުވުމަށްފަހު ޖުލައި، 2023، ގައި އިސޫ ދޫކޮށްލި އެވެ. އަދި ނޮވެމްބަރު، 2023، އޭނާގެ މައްޗަށް އުފުލި ދައުވާތައް އަނބުރާ ގެންގޮސް، ޓެގު ވަނީ ނަގައިފަ އެވެ.
އިސޫއަކީ މާރާމާރީ ހިންގުމާއި ޓެރަރިޒަމްގެ އަމަލެއްގެ ތުހުމަތުގައި އަދި މުދަލަށް ގެއްލުންދިނުމުގެ ތުހުމަތުގައި މީގެ ކުރިން ހައްޔަރުކޮށްފައިވާ މީހެކެވެ. އަދި ސީރިޔާގެ ހަނގުރާމައަށް ދާން އުޅުނު ކަމަށް ތުހުމަތުކޮށް ތުރުކީ ބޯޑަރު ކައިރިން 2015 ވަނަ އަހަރު ވެސް އޭނާ ހައްޔަރުކޮށްފައިވެ އެވެ.
މިނިވަން ނިއުސްގައި މަސައްކަތް ކުރި ނޫސްވެރިޔާ ރިލްވާން ގެއްލުވާލާފައި ވަނީ އޯގަސްޓް 7، 2014 ގަ އެވެ. އަދި ބްލޮގަރު ޔާމީން ރަޝީދު މަރާލީ ރިލްވާންގެ މައްސަލައިގައި އިންސާފު ހޯދުމަށް އޭނާ ގިނަ މަސައްކަތްތަކެއް ކުރަމުންދަނިކޮށް އޭޕްރީލް 23، 2017 ގަ އެވެ.
