ރައީސް ޑރ. މުހައްމަދު މުއިއްޒުގެ ސަރުކާރުން، ގާނޫނެއްގެ ދަށުން 20 އަހަރުގެ ބޮޑު މާސްޓާ ޕްލޭނެއް އެކުލަވައިލަން ކުރާ މަސައްކަތުގެ ތެރެއިން ފުރަތަމަ ފަސް އަހަރަށް ހަދާ ސްޓްރެޓެޖިކް އެކްޝަން ޕްލޭން (އޭއެސްޕީ) ގެ މަސައްކަތް ފަށައިފި އެވެ.
ގާނޫނީ ބާރު ލިބިދޭ ގޮތަށް 20 އަހަރުގެ މާސްޓާ ޕްލޭނެއް އެކުލަވާލައްވާނެ ކަމަށް ރައީސް މުއިއްޒު ވިދާޅުވީ، ޖެނުއަރީ ހަތަރެއްގައި ބޭއްވި ވެލާނާ އެއާޕޯޓުގެ ތިން ވަނަ ފިޔަވަހީގެ ޕްލޭން އިފުތިތާހު ކުރުމަށް ބޭއްވި ހަފުލާގަ އެވެ. އެއީ ހުރިހާ ދާއިރާއެއް ހިމެނޭ ފުރިހަމަ ޕްލޭނަކަށް ވެގެންދާނެ ކަމަށް އެ ދުވަހު ރައީސް ވިދާޅުވި އެވެ.
އޭގެ ފަހުން މާސްޓާ ޕްލޭނާ ގުޅޭގޮތުން ސަރުކާރުން ވަކި ބަހެއް ބުނެފައެއް ނުވެ އެވެ. އެ މަސައްކަތް ގޮސްފައިވާ ހިސާބެއް ބަލަން ސުވާލުކުރުމުން، ރައީސް އޮފީހުގެ އިސް ތަރުޖަމާނު ހީނާ ވަލީދު "އަދަދު" އަށް ވިދާޅުވީ، މިހާރު ކުރިއަށްދަނީ ކުރިއަށް އޮތް ފަސް އަހަރުގެ ތެރޭގައި ކުރާނެ މަސައްކަތްތައް ހިމެނޭގޮތަށް ސްޓްރެޓެޖިކް އެކްޝަން ޕްލޭން އެއް އެކުލަވައިލުމުގެ މަސައްކަތް ކަމަށެވެ.
"މިހާރު ކުރިޔަށް ދަނީ ކަމާ ގުޅުން ހުރި އޮފީސް/އިދާރާތަކާއެކު މަޝްވަރާކޮށް މަޢުލޫމާތު އެއްކުރުމުގެ މަސައްކަތް، މި ސްޓްރެޓެޖިކް އެކްޝަން ޕްލޭން ވެގެންދާނީ ސަރުކާރުން ކުރުމަށް ރާއްވަވާފައިވާ 20 އަހަރުގެ ނޭޝަނަލް ޑިވެލޮޕްމަންޓް ޕްލޭންގެ ފުރަތަމަ ފަސް އަހަރު ދުވަހުގެ މަސައްކަތް ހިމެނޭނެ މަގުޗާޓަކަށް،" ހީނާ ވިދާޅުވި އެވެ.
ވިހި އަހަރުގެ ޕްލޭން އެކުލަވައިލުމުގެ ވާހަކަ ދެއްކެވި ރޭ ރައީސް މުއިއްޒު ވަނީ މި ސަރުކާރުން ހިންގަން ރާވާފައިވާ ބޮޑެތި މަޝްރޫއުތައްވެސް ހިއްސާކުރައްވާފަ އެވެ.
އޭގެ އެއް ކަމަކީ މިހާރު އެމްއޯޔޫގައި ސޮއިކޮށްފައިވާ ސްޕެޝަލް އިކޮނޮމިކް ޒޯނެވެ. ތިލަފުއްޓާއި އެ ސަރަހައްދުގައި ހިއްކާ އެހެން ބިންތަކުން ގެދޮރާއި އެހެނިހެން ބޭނުންތަކަށް ދިނުމަށްފަހު މިހާރު ސަރުކާރުން ހަދަން މަސައްކަތް ކުރަމުންދާ މޯލްޑިވްސް އިންޑަސްޓްރިއަލް ފްރީ ޒޯން ކޮމްޕެނީގެ ފަރާތުން އެ ސަރަހައްދުގައި ރީއެކްސްޕޯޓު ކުރާ އެސްއީޒީ ޒޯނެއް ގާއިމް ކުރާނެ ކަން ވެސް އެމަނިކުފާނު ފާހަގަކުރެއްވި އެވެ.
