ހުޅުމާލެ ފޭސް 2 ގެ ރުއްގަނޑު 3 ގެ ބީޗް ސަރަހައްދުގައި އަމިއްލަ ފަރާތްތަކުން ހަދާފައިވާ ހަޓްތަކާއި އެތަނުގައި ބަހައްޓާފައިވާ ތަކެތި ދާއިމީކޮށް ނަގައި ހުސްކުރަން އަންގައިފި އެވެ.
އެޗްޑީސީގެ ޕަބްލިކް ރިލޭޝަން އެސިސްޓަންޓް މެނޭޖާ މުހައްމަދު ސިރާޖު "އަދަދު" އަށް ވިދާޅުވީ އެ ހަޓްތައް ދާއިމީކޮށް ނަގަން އެންގީ އެ ސަރަހައްދު ތަރައްގީ ކުރުމަށް ކަމަށެވެ.
"ހަޓްތައް ނަގަން އެންގީ އެ ސަރަހައްދު ތަރައްގީކުރަން. ދެން އެތަނުން ހަޓްތައް ދޭނީ ވަކި އުސޫލެއްގެ ދަށުން،" ސިރާޖު ބުންޏެވެ.
އެ މަސައްކަތްތައް ނިމޭއިރު ހަޓްތައް ދޫކުރާނެ ގޮތުގެ އުސޫލު އާންމުކުރާނެ ކަމަށް އެޗްޑީސީން ބުންޏެވެ.
އެޗްޑީސީއިން މީގެ ކުރިން ބުނީ މެއި، 31 ގެ ކުރިން ރުއްގަނޑު 3 ގެ ބީޗް ސަރަހައްދުގައި ހަދާފައި ހުރި ހަޓްތަކާއި ތަކެތި އެ ބިމުގެ ހުސްތަނަށް ވަގުތީގޮތުން ބަދަލުކޮށް އެ ތަނުގައި ހިންގުމަށެވެ. ނަމަވެސް އެޗްޑީސީއިން ވަނީ އެ ނިންމުން ބަދަލުކޮށް ހަޓްތައް ދާއިމީކޮށް ނަގަން އަންގާފަ އެވެ.
ހުޅުމާލޭގެ ދެވަނަ ފިޔަވަހީގެ ބީޗް ސަރަހައްދުގައި އަމިއްލަ ފަރާތްތަކުން ހަޓްތައް ހަދާފައި ވަނީ އެކިއެކި ވިޔަފާރީގެ ބޭނުނަމަށް ކަމަށާއި، ނަމަވެސް އެ ތަނަކީ ތަރައްގީކުރުމުގެ މަރުހަލާގައި އޮތް ސަރަހައްދަކަށް ވުމާއެކު، ވަސީލަތްތައް ގާއިމްވެފައި ނުވާތީ ގިނަ ދަތިތަކެއް ކުރިމަތިވާ ކަމަށް އެޗްޑީސީއިން ބުނެ އެވެ.
