ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އަށް ދުނިޔޭގެ ފުޓުބޯޅަ ފެޑެރޭޝަން (ފީފާ) އިން ފޮނުވާ ފައިސާ ނަހަމަ ގޮތުގައި ބޭނުންކުރާ ކަމުގެ ތުހުމަތުގައި ދައުވާ އުފުލާފައިވާ އެ އެސޯސިއޭޝަންގެ ރައީސް ބައްސާމް އަދީލް ޖަލީލު ކުށްވެރިއެއް ގޮތަށް ސިފަކުރުން ކްރިމިނަލް ކޯޓުން މަނާކޮށްފި އެވެ.
ކޯޓުގައި ހިނގަމުންދާ މައްސަލައަކާ ގުޅޭ ގޮތުން ލިޔެ ޝާއިއުކުރުމާއި ވަކި ގޮތަށް ލިޔެ ޝާއިއުކުރުން މަނާކޮށް ގެގް އޯޑަރު ނެރުމަކީ ކޯޓުތަކަށް ލިބިގެންވާ ބާރެކެވެ.
ދައުލަތް ތަމްސީލްކުރާ، ޕްރޮސެކިއުޓަ ޖެނެރަލް (ޕީޖީ) އޮފީހުގެ ނިއުސްލެޓާ، "އުންސުރު" ގެ މިދިޔަ މަހުގެ އަދަދުގައި އެފްއޭއެމްގެ ކޮރަޕްޝަނާ ގުޅޭ ގޮތުން ލިޔުމެއް ޝާއިއުކޮށްފައިވެ އެވެ. އޭގައި، ބައްސާމް ވަނީ ބައިނަލްއަގުވާމީ ޖަމިއްޔާތަކުން ލިބުނު 12 މިލިއަން ޑޮލަރު (191 މިިލިއަން ރުފިޔާ) ގެ ބޮޑުބައެއް އޭނާގެ އަމިއްލަ ބޭނުމަށް ބޭނުން ކުރި ކަމަށް ތުހުމަތުކޮށްފަ އެވެ.
މިއަދު ކްރިމިނަލް ކޯޓުގައި ބޭއްވި އަޑުއެހުމުގައި ބައްސާމްގެ ފަރާތުން ވަނީ އެފަދަ ލިޔުންތައް ޝާއިއުކުރުން މަނާކޮށްދިނުމަށް އެދިފަ އެވެ.
އޭގެ އިރުކޮޅެއް ފަހުން ކޯޓުން ނެރުނު އަމުރެއްގައި ބުނެފައިވަނީ ކޯޓުން ވަކި ގޮތެއް ނިންމުމުގެ ކުރިން ހައްގުތައް ކަށަވަރު ކުރުމުގެ ގާނޫނީ ޒިންމާ އޮތް އެއްވެސް ފަރާތަކުން އޭނާއަކީ ކުށްވެރިއެއް ކަމަށް ކަނޑައެޅޭ ބިދާއަކުން އެއްވެސް ވާހަކައެއް އަދި ހިޔާލެއް ނުލިޔުމަށް އަމުރު ކުރާ ކަމަށެވެ.
"މިފަދަ ކޮންމެ ކަމަކީ ކޯޓުގެ ހުރުމަތް ކެނޑުންކަމުގައި ބެލިދާނެ އަމަލެއް ކަމުގައި އަންގަން،" ކޯޓުގެ އަމުރުގައި ބުނެފައިވެ އެވެ.
ބައްސާމްގެ މައްޗަށް ދައުވާ ކުރުމުގެ ކުރިން އޭނާގެ ޕާސްޕޯޓު ވަނީ އަންނަ މަހުގެ ފަސްވަނަ ދުވަހުގެ ނިޔަލަށް ހިފަހައްޓަން ކޯޓުން ވަގުތީ އަމުރެއް ނެރެގެން ހިފަހައްޓައިފަ އެވެ. ބައްސާމް ފިލައިގެން ދިޔުމުގެ އިހުތިމާލު އޮތަތީވެ، ދައުލަތުން އެދިގެން ކޯޓުން މިއަދު ވަނީ ޝަރީއަތް ނިމެންދެން އޭނާގެ ޕާސްޕޯޓު ހިފެހެއްޓުމަށް އަމުރުކޮށްދީފަ އެވެ.
ބައްސާމް ހިންގަވާފައިވާ އެކި މުއާމަލާތްތަކުގެ މައްސަލަ ފުލުހުން ދަނީ ތަހުގީގު ކުރަމުންނެވެ. އަދި ދައުވާ ކުރަން ފޮނުވައިގެން ދައުވާ އުފުލީ އެއިން އެންމެ މުއާމަލާތެއްގެ މައްސަލަ އެވެ.
އެއީ އެފްއޭއެމްގެ އެކައުންޓަކަށް ފީފާއިން ޖަމާކޮށްދިން 10،000 ޑޮލަރުގެ ތެރެއިން 9،999 ޑޮލަރު ބައްސާމްގެ އެކައުންޓަށް ޖަމާކޮށް ބޭނުންކުރި ކަމަށް ކުރާ ތުހުމަތުގަ އެެވެ. އެ މައްސަލާގައި އޭނާގެ މައްޗަށް ހިޔާނާތާއި މަނީ ލޯންޑަރިންގެ ދައުވާ އުފުލާފައިވެ އެވެ.
