ޝަރުއީ ދާއިރާގެ އުމްރާނީ ތަރައްގީއަށް ކުރަމުންދާ މަސައްކަތުގެ ދަށުން ދ. ބަނޑިދޫގައި އިމާރާތްކުރި އެ ރަށު މެޖިސްޓްރޭޭޓު ކޯޓުގެ އާ އިމާރާތް މިއަދު ހުޅުވައިފި އެވެ.
ބަނޑިދޫ މެޖިސްޓްރޭޓު ކޯޓުގެ އާ އިމާރާތް ހުޅުއްވައި ދެއްވާ، އެކަން ފާހަގަކުރަން ބޭއްވި ޖަލްސާ ޝަރަފުވެރިކޮށްދެއްވީ އުއްތަމަ ފަނޑިޔާރު އަހުމަދު މުއުތަސިމް އަދުނާނެވެ. އެމަނިކުފާނު އަރިހުގައި ފަނޑިޔާރު ހުސްނުއްސުއޫދާއި ޗީފް ޖުޑީޝަލް އެޑްމިނިސްޓްރޭޓަރު އާއިޝަތު ރިޒުނާ ބައިވެރިވެވަޑައިގެންނެވި އެވެ.
މި ކޯޓު ހުޅުވަން ފާހަގަކޮށް ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ) ގެ ރަސްމީ އެކްސް އެކައުންޓުގައި ކުރި ޕޯސްޓެއްގައި ބުނީ، ކޯޓު ހުޅުއްވައިދެއްވުމަށް ފަހު ދެއްކެވި ވާހަކައިގައި އުއްތަމަ ފަނޑިޔާރު އަލިއަޅުއްވާލެއްވީ ފަނޑިޔާރުކަން ކުރުމުގައި އަދުލުވެރިވުމުގެ އިހްސާންތެރިކަން އިސްކުރުމަށް ފަނޑިޔާރުންނަށް އޮންނަ ވާޖިބާއި ޒަމާނަށް އަންނަ ބަދަލުތަކާއެކު ޝަރުއީ ދާއިރާއަށް ގެންނަން ޖެހޭ ބަދަލުތަކަށެވެ.
އިސް ޖުޑީޝަލް އެޑްމިނިސްޓްރޭޓަރު ރިޒްނާގެ ވާހަކައިގައި އުމްރާނީ ތަރައްގީއަށް ގިނަ މަސައްކަތްތަކެއް ކުރަމުން އަންނަ މަސައްކަތްތަކުގެ އިތުރުން ޝަރުއީ ދާއިރާ އާއި ކޯޓުތަކުގެ އިންސާނީ ވަސީލަތްތައް އިތުރުކުރުމަށާއި ޒަމާނީ ޓެކްނޮލޮޖީ ކޯޓުތަކުގައި ގާއިމުކުރުމަށްޓަކައި ކުރަމުންދާ މަސައްކަތްތައް ފާހަގަކުރެއްވި ކަމަށް ޑީޖޭއޭ އިން ބުންޏެވެ.
ބަނޑިދޫ މެޖިސްޓްރޭޓު ކޯޓުގެ އާ އިމާރާތެއް ހުޅުވިގެން ދިޔައިރު، މި ކޯޓުން ކުރިން ބޭނުންކުރަމުން އައި އިމާރާތުގައި ފާހަނާއެއްހާ ހިސާބު ވެސް ނެތް ކަމަށް މީޑިއާތަކުގައި ކުރިން ރިޕޯޓުކޮށްފައި އެބަހުއްޓެވެ. މިއީ ދައުލަތުގެ ޕީއެސްއައިޕީ ބަޖެޓުން ހަރަދުކޮށްގެން އެޅި އިމާރާތެކެވެ.
