ރާއްޖޭގައި ޑެންގީ އަދި ޗިކުންގުންޔާ ފެތުރުން ހުއްޓުވުމަށް ހާއްސަ ކޮމިޓީއެއް އެކުލަވާލައި، ހެލްތް މިނިސްޓްރީ އާއި ސަރުކާރުގެ އެހެން އިދާރާތައް ގުޅިގެން މަސައްކަތް ކުރަން ފަށައިފި އެވެ.
މިއަދު ހެލްތު މިނިސްޓްރީން ބޭއްވި ނޫސްވެރިންގެ ބައްދަލުވުމުގައި މައުލޫމާތު ދެއްވަމުން މިނިސްޓަރު ޑރ. އަބްދުﷲ ހަލީލް ވިދާޅުވީ، ޑެންގީއާ ޗިކުންގުންޔާ ފެތުރުން ހުއްޓުވުމަށް ލޯކަލް ގަވަމެންޓް މިނިސްޓްރީއާއި، ކައުންސިލުތަކާއި، ހޮސްޕިޓަލުތަކުގެ އިތުރުން، ވެމްކޯ އަދި ހެޗްޑީސީން ވެސް އެ މިނިސްޓްރީއާ ގުޅިގެން މަސައްކަތް ކުރަމުން އަންނަ ކަމަށެވެ.
އެ މަސައްކަތަށް އެކުލަވާލާފައިވާ ކޮމިޓީން އަޅަމުންދާ ފިޔަވަޅުތަކުގެ ތެރޭގައި މީހުން ދިރިއުޅޭ ރަށްތަށް ފޮގްކުރުމާއި މަދިރި އާލާވާނެހެން ހުންނަ ތަންތަން ނައްތައިލުން ހިމެނޭކަމަށް ހަލީލް ވިދާޅުވި އެވެ.
"މިކަމަށް ހާއްސަ ސިޓިޔަރިން ކޮމިޓީއެއް އެކުލަވާލެވިފަވޭ. އެ ކޮމިޓީން މަސައްކަތް ކުރައްވައިގެން މާލެއާ އަތޮޅުތެރޭގެ ރަށްރަށުގަ ފޮގްކުރުމުގެ މަސައްކަތްތަކާ މަދިރި އުފެދޭ ތަންތަން ނައްތާލުމުގެ މަސައްކަތް ވެސް ބައެއް ރަށްރަށުގަ ކުރެވިފަ އެބަހުރި،" މިނިސްޓަރު ފާހަގަކުރެއްވި އެވެ.
އޭގެ އިތުރުން ޑެންގީ އަދި ޗިކުންގުންޔާ ފެތުރުން ހުއްޓުވުމުގެ ގޮތުން ބަންގްލަދޭޝް ބަހުންނާއި ތަމަޅަ ބަހުން ވެސް މާލެ އަދި އަތޮޅު ތެރޭގައި ހޭލުންތެރިކަމުގެ ޕްރޮގްރާމުތަކެއް ކުރިއަށް ގެންގޮސްފައިވާ ކަމަށް މިނިސްޓަރު ވިދާޅުވި އެވެ.
މިނިސްޓަރު ހަލީލު އިތުރަށް ވިދާޅުވީ މިއަހަރުން ފެށިގެން މެއި 11، ގެ ނިޔަލަށް މާލެ އަދި އަތޮޅު ތެރެއިން ޑެންގީގެ 774 ކޭސް އަދި ޗިކުންގުންޔާގެ 389 ކޭސް ފެނިފައިވާކަމަށެވެ. އަދި ފަހުގެ ތާރީހުގައި ޗިކުންގުންޔާގެ ކޭސްތަށް އިތުރުވި މީ ފުރަތަމަ ފަހަރުކަމުން އެ ބައްޔަށް ހާއްސަ ސަމާލުކަމެއް ދެމުން އަންނަ ކަމަށް ވިދާޅުވި އެވެ.
މި ދެ ބައްޔަކީ ވެސް އީޑީސް މަދިރީގެ ޒަރިއްޔާއިން ފެތުރެމުން އަންނަ ބައްޔަކަށްވުމާއެކު، ބަލި ކޮންޓްރޯލް ކުރުމަށް ކޮންމެ ރައްޔިތަކު ވެސް ފަރުދީ ޒިންމާ އަދާކުރައްވައި މަދިރި އާލާވާނެ ތަންތަން ނައްތައިލުމަށް މިނިސްޓަރު އެދިވަޑައިގަތެވެ. އަދި މި މަސައްކަތުގައި ކޮންސްޓްރަކްޝަން ޖަމިއްޔާތަކުން ވެސް ބައިވެރިވަމުން އަންނަ ކަމަށް ވިދާޅުވި އެވެ.
މަދިރި ހެފުމުން ރައްކާތެރިވުމަށް ކުރެވިދާނެ ކަންތައްތައް
- ވީހާވެސް ނިވާކަންބޮޑު ހެދުންލުން
- މަދިރި ލޯޝަން ބޭނުން ކުރުން
- ކުޑަދޮރު ފަދަ ތަންތާނގައި މަދިރި ދާ ޖެހުން
- މަދިރި އެންމެ ގިނަވާ ވަގުތުތައް ކަމުގައިވާ ހެނދުނާއި ހަވީރު ގޭގައި ދޮރާއި ކުޑަދޮރުތައް ލައްޕާފައި ބެހެއްޓުން
ފެން ހަރުވާ ކޮންމެ ތަނެއްގައި ނުވަތަ އެއްޗެއްގައި އީޑީސް މަދިރި ބިސްއަޅާ އާލާވެ އެވެ. ފެން ހަރުލާފައިވާ ތަނެއްގައި އީޑިސް މަދިރި ބިސް އަޅައިފި ނަމަ, އެ ތަނަކުން ނުވަތަ އެއްޗަކުން ފެން ހުސްކުރި ނަމަވެސް މަދިރީގެ ބިސް ހަރުލާފައި ހުރެ އެވެ. އަދި އެ ބިސް, ހަ މަސް ދުވަހަށްވުރެ ގިނަ ދުވަހު ހުރެ އެވެ.
އެހެންކަމުން ގެ އާއި ގޯތިތެރޭގައި ފެން ހަރުލާގޮތަށް ހުންނަ ތަންތަނާއި ތަކެތި މަދުވެގެން ހަފްތާއަކު އެއްފަހަރު ސާފުކުރުން މުހިންމެވެ.
