ހދ. ކުޅުދުއްފުށި ސިޓީއަށް ކަރަންޓުގެ ހިދުމަތް ފޯރުކޮށްދިނުމަށް ފެނަކައިން ބޭނުުންކުރާ އެއް މެގަވޮޓްގެ ޖަނަރޭޓަރަކަށް މައްސަލަ ޖެހި، އަނެއްކާ ވެސް އެކި ވަގުތުތަކަށް އެ ރަށުގެ ގޭބިސީތަކުން ކަރަންޓުގެ ހިދުމަތް ކަނޑަން ޖެހިއްޖެ އެވެ.
ކުރިން ވެސް އިންޖީނުތަކަށް މައްސަލަ ދިމާވެގެން، ކަރަންޓުގެ ލޯޑު ބޮޑު ވާތީ މަހަކަށް ވުރެ ގިނަ ދުވަސްވަން ދެން ފެނަކައިން ގެންދިޔައީ ޝެޑިއުލެއް ނެރެގެން އެ ސިޓީގެ އެކި ހިސާބުތަކުން އެކި ވަގުތުތަކަށް ކަރަންޓު ކަނޑަމުންނެވެ. އެ ގޮތުން ކޮންމެ ގެއަކުން ގަޑިއަރަކަށް ކަރަންޓު ކަނޑައިލަ އެވެ.
ސްޓެލްކޯގެ ޓެކްނިކަލް ޓީމެއް ވެސް ގެންގޮސްގެން މައްސަލަ ކޮޅެއްގައި ހައްލުކުރިތާ މަހެއް ވެސް ނުވަނީސް، މިއަދު އަނެއްކާ ވެސް ފެނަކަ ކުޅުދުއްފުށި ބްރާންޗުން ކަރަންޓު ކަނޑާ ސަރަހައްދުތަކުގެ ޝެޑިއުލެއް ނެރުނެވެ.
އެ ޝެޑިއުލާ އެކު ފެނަކަ ބްރާންޗުން ނެރުނު ބަޔާނެއްގައި ބުނެފައިވަނީ ގަޑިއިރަކަށް ކޮންމެ ސަރަހައްދަކުން ކަރަންޓު ކަނޑާލަން ޝެޑިއުލް ނެރެން ޖެހުނީ އެއް މެގަވޮޓްގެ އިންޖީނަކަށް މައްސަލަ ޖެހިގެން ކަމަށެވެ. އަދި ވީހާވެސް މަދުން މި ދުވަސްވަރު ކަރަންޓު ބޭނުން ކުރުމަށް އެދިފައިވެ އެވެ.
އާބާދީގައި 10،000 އަށް ވުރެ ގިނަ މީހުން އުޅޭ އެ ސިޓީގައި، މީގެ ކުރިން އެ މައްސަލަ ދިގުލައިގެން ގޮސް ރަށުގެ ބަޔަކު ހިތްހަމަނުޖެހުން ފާޅުކޮށް މުޒާހަރާ ވެސް ކޮށްފައިވެ އެވެ.
