ހުޅުމާލެ ދެވަނަ ފިޔަވަހީގެ ރުއްގަނޑު ތިނެއްގެ ބީޗު ސަރަހައްދުގައި އަމިއްލަ ފަރާތްތަކުން ހަދާފައިވާ ހަޓުތަކާއި ގާޑިޔާތަކާއި، އަދި އެ ތަނުގައި ބަހައްޓާފައިވާ ތަކެތި މި މަސް ނިމުމުގެ ކުރިން ނަގަން އަންގައިފި އެވެ.
އެޗްޑީސީން ބުނި ގޮތުގައި އެ ސަރަހައްދުގައި ވަގުތީ ގޮތުން ހަދާފައިވާ ހަޓްތައް ނަގަނީ އެ ސަރަހައްދު އިތުރަށް ތަރައްގީ ކުރުމަށް ކުރަން ޖެހޭ މަސައްކަތްތައް ކުރުމަށެވެ.
"ދެވިފައިވާ މުއްދަތުގައި މި ތަކެތި ނަގާފައި ނުވާނަމަ، އެ ތަކެތި ނަގައި ސަރަހައްދު ސާފު ކުރުމުގެ މަސައްކަތް މި ކޯޕަރޭޝަނުން ކުރިއަށް ގެންދާނެ، މި ގޮތުން ސާފު ކުރުމުގެ މަސައްކަތުގެ ތެރެއިން ތަކެއްޗަށް ލިބޭ ގެއްލުމަށް މި ކޯޕަރޭޝަނުން ޒިންމާ ނުވާނެ ކަމުގައި ދަންނަވަން،" އެޗްޑީސީގެ އިއުލާނުގައިވެ އެވެ.
ހުޅުމާލޭގެ ދެވަނަ ފިޔަވަހީގެ ބީޗް ސަރަހައްދުގައި އަމިއްލަ ފަރާތްތަކުން ހަޓްތައް ހަދާފައި ވަނީ އެކިއެކި ވިޔަފާރީގެ ބޭނުމަށެވެ. ނަމަވެސް މި ތަނަކީ އަދި ތަރައްގީކުރުމުގެ މަރުހަލާގައި އޮތް ސަރަހައްދަކަށް ވާތީ އާއި، ވަސީލަތްތައް ގާއިމްވެފައި ނުވާތީ ގިނަ ދަތިތަކެއް ކުރިމަތިވާ ކަން އެޗްޑީސީން ފާހަގަ ކުރި އެވެ.
އެ ސަރަހައްދު މިހާރު ބޭނުން ކުރެވެމުންދާ ގޮތުން ތަން ސާފުކޮށް ބެލެހެއްޓުމުގެ މަސައްކަތަށް ވެސް ގިނަ ދަތިތަކެއް ހުރި ކަން އެ ކުންފުނިން ފާހަގަ ކުރި އެވެ.
ހުޅުމާލޭގައި ހުންނަ ހުސް ބިންތަކުގައި މިހެން ވިޔަފާރި ކުރާ މައްސަލަ ދޭތެރެއަކުން ފެންމަތިވެ އެވެ. ދެވަނަ ފިޔަވަހީގައި މީހުން އާބާދުވީ ދުވަސްވަރު ވެސް އެތަނުގައި ގިނަ ވިޔަފާރި ހަޓުތައް ހެދި އެވެ. އެ ފަހަރު ވެސް ހަޓުތައް ރޫޅާލަން ޖެހުނީ އެޗްޑީސީންނެވެ.
