ފުލުހުންނާއި ސިފައިން އަމަލުކުރާނީ މަތިން އަންނަ އޯޑަރަށް ކަމަށް ކުރީގެ ރައީސް އިބްރާހިމް މުހައްމަދު ސޯލިހު ވިދާޅުވެއްޖެ އެވެ.
މަޖިލިސް އިންތިހާބުގެ ކެމްޕޭނަށް ފުވައްމުލަކަށް ވަޑައިގެން ވާހަކަ ދައްކަވަމުން ސޯލިހު ވިދާޅުވީ ރޭގަ ހިނގައިދިޔަ ކަންތައް ފުލުހުންގެ އިސްވެރިންނާއި، މިނިސްޓަރާއި، ރައީސްއަށް އެނގިވަޑައިނުގަންނަވާ ކަމަށް ވިދާޅުވުމުން ކަންބޮޑުވާ ކަމަށެވެ.
ނަމަވެސް ރާއްޖޭގައި ރައީސްކަން ކުރެއްވި މީހެއްގެ ހައިސިއްޔަތުން ފުލުހުންނާއި ސިފައިން އަމަލުކުރާނީ މަތިން އޯޑަރަށްކަން ޔަގީންވާ ކަމަށް ސޯލިހު ވިދާޅުވި އެވެ.
"ރޭގެ މާލެއިން ފެނިގެން އެ ދިޔައީ 2024 ވަނަ އަހަރު ފެންނަން ޖެހޭ މަންޒަރެއް ނޫން. ކަންބޮޑުވާން ޖެހޭ ކަމެއް އެއީ. އަނެއްކާ އެއާ ގުޅިގެން ރައީސް މުއިއްޒު ދެއްކެވި ވާހަކަފުޅާ ގުޅިގެން މާ ބޮޑަށް ކަންބޮޑުވޭ،" ސޯލިހު ވިދާޅުވި އެވެ.
ސޯލިހު ވިދާޅުވީ ނޭނގޭ ކަމަށް ވިދާޅުވެ ރާއްޖޭގެ ޑިމޮކްރަސީއަށް ހުރަސް އެޅުމުން އެނގިގެންދަނީ ވަރަށް ކައިރިން ފާރަލާން ޖޭހޭކަން ކަމަށެވެ.
އޭގެއިތުރުން ރޭގެ މަންޒަރަކީ ޑިމޮކްރަސީގައި ރާއްޖެ މިހާރު އާދެވިފައިވާ ހިސާބުން އެއްގޮތަކަށް ވެސް ފެނިގެންވާނެ މަންޒަރެއް ނޫން ކަމަށާއި، އެކަން ކުށްވެރިކުރާ ކަމަށް ސޯލިހު ވިދާޅުވި އެވެ.
"ރޭގެ މާލެއިން ފެނިގެން އެ ދިޔައީ 2024 ވަނަ އަހަރު ފެނިގެންދާންޖެހޭނެ މަންޒަރެއް ނޫން. އަޅުގަނޑު މި ދެންނެވީ ރާއްޖޭގެ ޑިމޮކްރަސީއަށް މި ކުރި ދަތުރުގައި މިހާރު އާދެވިފައި މި އޮތީ މި ހިސާބުގައި އެއްގޮތަކަށް ވެސް ފެނިގެންވާނެ މަންޒަރެއް ނޫން،" ސޯލިހު ވިދާޅުވި އެވެ.
ރައްޔިތުން ތިބީ ޑިމޮކްރަސީ ގަބޫލުކޮށްގެންކަން ފާހަގަކުރައްވާ ސޯލިހު ވިދާޅުވީ މިއަދު ޕާޓީ ފިކުރާއި، ހިޔާލުތަފާތުވުން ތަކާއި، ޕާޓީ ނިޒާމު ނުހުއްޓުވޭނެ ކަމަށާއި، ސަރުކާރަށް ކުރިއަށް ދެވޭނީ އެކަމަށް ޖާގަދީގެން އެކަން ގަބޫލުކޮށްގެން ކަމަށެވެ.
