ޕީޕަލްސް ނެޝަނަލް ފްރަންޓު (ޕީއެންއެފް) އުފެއްދުމުގެ ޖަލްސާއަށް ފުލުހުން ހުރަސްއެޅުމާ ގުޅިގެން، ރައީސް ޑރ. މުހައްމަދު މުއިއްޒު އަމުރު ކުރެއްވި ތަހުގީގަށް އެއްބާރުލުން ދޭނެ ކަމަށް ފުލުހުން ބުނެފި އެވެ.
ފުލުހުންގެ ތަރުޖަމާނު އަހުމަދު ޝިފާން ވިދާޅުވީ ފުލުހުންގެ ގާނޫނާއި އަމަލު ކުރަމުންދާ އުސޫލުތަކުގެ ރޫހަށް ބަލާއިރު ރައީސުލްޖުމްހޫރިއްޔާ ނުވަތަ ވަޒީރު ބައްލަވަމުންދާ ކަމެއްގައި ފުލުހުން ބަސްބުނުމަކީ ރަނގަޅުކަމެއް ކަމުގައި ނުދެކޭ ކަމަށެވެ.
އެގޮތުން އެ އަމުރަށް އެއްބާރުލުން ދިނުން ފިޔަވާ އެއްވެސް ކޮމެންޓެއް ފުލުހުންގެ ފަރާތުން މިވަގުތު ދެވެން ނެތް ކަމަށް ޝިފާން ވިދާޅުވި އެވެ.
ރައީސް މުއިއްޒު ވިދާޅުވީ ޕީއެންއެފް އުފެއްދުމުގެ ޖަލްސާއަށް ފުލުހުން ރޭ ހުރަސްއެޅީ އެމަނިކުފާނުގެ އެންގެވުމާ ކަނޑައެޅިގެން ހިލާފަށް ކަމަށާއި، މިއަދު އިރުއޮއްސުމުގެ ކުރިން އެކަމާ ގުޅޭ ތަހުގީގެއް ހިންގައި ރިޕޯޓެއް އެމަނިކުފާނަށް އެރުވުމަށް އަންގަވާފައިވާނެ ކަމަށެވެ.
ޕީއެންއެފް ޖަލްސާއަށް ފުލުހުން ހުރަސް އެޅީ ޖަލްސާ ހުއްޓުވައި ގިޔާސުއްދީން ސްކޫލް ހިމާޔަތް ކުރަން އެޑިއުކޭޝަން މިނިސްޓްރީން އަންގާފައި އޮތުމުން ކަަމަށް ފުލުހުން ބުނެ އެވެ.
އެގޮތުން ފުލުހުންގެ ޓީމެއް އެ ސްކޫލަށް ގޮސް އެ ހަރަކާތް ސްކޫލުގައި ކުރިއަށް ނުގެންދެވޭނެ ކަމަށް އެންގުމުން ވެސް، ފުލުހުންގެ އެންގުމާ ހިލާފަށް ހަރަކާތް ކުރިއަށް ގެންދިއުމަށް މަސައްކަތް ކުރުމުން އެކަން ހުއްޓުވާފައިވާ ކަމަށް ފުލުހުން ބުނެ އެވެ.
ނަމަވެސް ރައީސް ވިދާޅުވީ، ސިޔާސީ ކަމެއްގައި އެސްއޯ ފުލުހުން ނުފޮނުވަން، ހޯމް މިނިސްޓަރު އަލީ އިހުސާން އާއި ޕޮލިސް ކޮމިޝަނަރު އަލީ ސުޖާއަށް އެތައް ފަހަރަކު އަންގާފައިވާނެ ކަމަށެވެ.
ގާނޫނާ އެއްގޮތަށް، އޮންނަ އުސޫލުގެ ތެރެއިން ކުރިއަށް ގެންދާ ހަރަކާތްތަކަށް ފުލުހުންގެ ފަރާތުން އަބަދުވެސް އެއްބާރުލުން ލިބޭނެ ކަމަށް ފުލުހުން ބުނެ އެވެ.
