ކުރީގެ ރައީސް އަބްދުالله ޔާމީން އިސްވެ އުފައްދަވާ ޕީޕަލްސް ނޭޝަނަލް ފްރޮންޓް (ޕީއެންއެފް) އުފެއްދުމަށް ސަރުކާރުން ހުރަސް އެޅުމަކީ ހުދުމުހުތާރު ވެރިކަމެއްގެ ފެށުން ގޮތުގައި އެމަނިކުފާނުގެ ދަރިކަލުން އަދި އެ ޕާޓީގެ މުއައްސިސް ޒޭން އަބްދުالله ޔާމީން ވިދާޅުވެއްޖެ އެވެ.
މިރޭ 10:00 އަށް ތާވަލުކުރި ޕީއެންއެފްގެ ޖަލްސާއަށް, އެ ޕާޓީގެ އިސްވެރިންނާއި މެންބަރުން ދިޔައިރު, ފުލުހުން ވަނީ ޣިޔާސުއްދީން ސްކޫލުގެ ގޭޓު ބަންދުކޮށް ބައިވެރިން އެތެރެއަށް ދިއުމަށް ހުރަސް އަޅައިފަ އެވެ.
ފުލުހުން އެ ޖަލްސާއަށް ހުރަސް އެޅީ ސިޔާސީ ނުފޫޒެއްގެ ސަބަބުން ކަމަށް ޒޭން ތުހުމަތު ކުރެއްވި އެވެ. އަދި, އެއީ ރައީސް ޑރ. މުހައްމަދު މުއިއްޒު ދެއްވި "އީދު ހަދިޔާ" އެއްގެ ގޮތުގައި ސިފަކުރެއްވި އެވެ.
"މި ތަނަށް ވަންނާނެ އާންމު ރައްޔިތުންނާއި ސަޕޯޓަރުންނަށް ހުރަސް އެޅުމަށް ރަޔަޓް ގިއަރުގައި އެސްއޯ ފޮނުވައިގެން މުއިއްޒު ހުރަސް މި އަޅުއްވަނީ ޖަލްސާ ނުބޭއްވިޔަ ދޭން ވެގެން. މި ފެންނަނީ ހުދުމުހުތާރު ވެރިކަމެއްގެ ފެށުން," ގިޔާސުއްދީން ސްކޫލުގެ ބޭރުގައި ހުންނަވައި ޗެނަލް 13 އަށް ޒޭން ވިދާޅުވި އެވެ.
ފުލުހުން ފޮނުވިއިރު ވެސް އީސީގެ އޮފިޝަލުން ޖަލްސާ ކުރާ މާލަމުގެ ތެރޭގައި ތިއްބެވި ކަމަށާއި ފުލުހުން ޤައިރު ގާނޫނީ އޯޑަރަށް ތަބާވެފައިވާ ކަމަށް ވެސް އޭނާ ވިދާޅުވި އެވެ.
"ކޮން އަދަދެއްތޯ ހަމަނުވާނީ އަޅުގަނޑުމެންނަށް. ރައީސް މުއިއްޒުއަށް ތާއީދު އޮވެގެންތޯ ރައީސް މުއިއްޒު ހޮވިފައި އެހުރީ މިއަދު. އެ ބޭފުޅާއަށް ގާނޫނީ އަސާސީން އަޅުގަނޑުމެންނަށް ލިބިދޭ ހައްގަކަށް ހުރަސް އަޅަން މި ބޭފުޅުންނަށް ޢައިރު ގާނޫނީ އަމުރު ކުރީމާ, މި ބޭފުޅުން އެއަށް ތަބާވުން އެއީ އަޅުގަނޑު ވަރަށް ކަންބޮޑުވާ ކަމެއް," އޭނާ ވިދާޅުވި އެވެ.
އެކަމާ ގުޅިގެން ފުލުހުން ބުނީ ހުއްދަދެވިފައި ނުވާ އެއްވުމެއް ހުއްޓުވައި ސްކޫލު ރައްކާތެރިކުރުމަށް، މިނިސްޓްރީ އޮފް އެޑިއުކޭޝަންގައި އެދިފައިވާތީ، އެކަން ތަންފީޒުކުރަން ފުލުހުން މަސައްކަތްކުރަމުން އަންނަ ކަމަށެވެ.
ޣިޔާސުއްދީން ސްކޫލުގައި ޖަލްސާ ނުބޭއްވޭ ގޮތް ވުމުން މިހާރު ރާޅުގަނޑުގައި ޖަލްސާ ބާއްވަން ވަނީ ނިންމާފަ އެވެ.
ޕީޕީއެމުން ވަކިވެ، އާ ޕާޓީއެއް ހެއްދެވުމަށް ރައީސް ޔާމީން ނިންމެވީ ޕާޓީގެ ލީޑާޝިޕުން އެމަނިކުފާނު އެއްފަރާތް ކޮށްފައިވާ ކަމަށް ބުނެ އެވެ. ޔާމީންގެ ފަރާތުން ރައީސް މުއިއްޒަށް ގިނަ ތުހުމަތުތަކެއް ކޮށްފައިވާއިރު އޭގެ ތެރޭގައި، އެމަނިކުފާނުގެ ފޯނު ކޯލަށް ރައީސް ޖަވާބު ނުދެއްވުމާއި ޖަލު ހުކުމުން މިނިވަން ނުކުރުން ހިމެނެ އެވެ.
