ކުރީގެ ރައީސް އަބްދުﷲ ޔާމީނުގެ އާ ޕާޓީ ޕީޕަލްސް ނެޝަނަލް ފްރޮންޓް (ޕީއެންއެފް)ގެ ނަމާއި, ކުލަތަކާއި, ލޯގޯ, އަސާސީ ގަވައިދު އަދި މެނިފެސްޓޯ ފާސްކޮށްފި އެވެ.
ރާޅުގަނޑު ސަރަހައްދުގައި މިރޭ ކުރިއަށްދާ ޕީއެންއެފް އުފެއްދުމުގެ ޖަލްސާގައި ރިޔާސަތު ބަލަހައްޓަވާ, ކުރީގެ މިނިސްޓަރު މުހައްމަދު މަލީހު ޖަމާލު ވިދާޅުވި ގޮތުގައި ޖަލްސާ ކުރިއަށް ގެންދަވަނީ 329 މެންބަރުންނާއެކު އެވެ.
އެޕާޓީގެ ފުރިހަމަ ނަން 'ޕީޕަލްސް ނެޝަނަލް ފްރަންޓް'ގެ އިތުރުން ރަމްޒީ ނަމެއްގެ ގޮތުގައި އާއްމުކޮށް ކިޔާ ނަމެއްގެ ގޮތުގައި 'ޕީއެންއެފް' ވެސް ފާސްކުރި އެވެ. އެ ދެ ނަން ވެސް ފާސްކުރީ ވޯޓްލީ މެމްބަރުންގެ އިއްތިފާގުންނެވެ.
ޕީއެންއެފްގެ ކުލަތަކުގެ ގޮތުގައި އެޕާޓީން މިރޭ ދެ ކުލައެއް ފާސްކުރި އެވެ. އެއީ މަޑު ފެހި ކުލައާއި ނޫ ކުލަ އެވެ. އެ ދެކުލަ ހިމެނޭ ލޯގޯގައި އޮތީ ތަރިއަކާއި ހުޅެވިހަނދެކެވެ.
ޕީއެންގެ ލޯގޯއާއި ކުލަތައް
ޕީއެންއެފްގެ އެޑްރެސްގެ ގޮތުގައި ފާސްކުރީ ހ. ހުރަފާ އެވެ. އެއީ ކުރިން ޕީޕީއެމްގެ އޮފީސް ހިންގި އިމާރާތެވެ.
ޕީއެންއެފްގެ މައިގަނދު މެނިފެސްޓޯ އަދި އަސާސީ ގަވައިދުވެސް ފާސްކުރީ ޖަލްސާގެ ހުރިހާ ބައިވެރިންގެ އިއްތިފާގުންނެވެ.
މިރޭ 10:00 އަށް ތާވަލުކުރި ޕީއެންއެފް އުފެއްދުމުގެ ޖަލްސާ ފެށޭ ގޮތްވީ, އެ ޖަލްސަ ބާއްވަން އޮތް މާލަމް ބަދަލުކޮށް, ރާޅުގަނޑު ސަރަހައްދަށް ހުރިހާ މެންބަރުން ގެންދިއުމަށްފަހު މިރޭ 00:20 ގަ އެވެ. އެހެންކަމުން ޕީއެންއެފް އުފައްދާ ޖަލްސާ ކުރިއަށް ގެންދިޔައީ ކުރުކޮށެވެ.
