ސަރުކާރު ހިންގާ ޕީއެންސީގައި ޑިމޮކްރެޓިކް އަސާސްތަކާއި ރައްޔިތުންނަށް ދައުލަތަކުން ފޯރުކޮށްދޭން ޖެހޭ ހިދުމަތްތަކުގެ ފެންވަރު މަތިކުރުމަށް އެކަށައަޅާނެ ސިޔާސަތުތަކެއް ފެންނަން ނެތް ކަމަށް، ރައްޔިތުންގެ މަޖިލީހުގެ އުނގޫފާރު ދާއިރާގެ މެންބަރު އަދި ޑިމޮކްރެޓްސްގެ ކެމްޕެއިން ތަރުޖަމާނު މުހައްމަދު ވަހީދު (ވައްޑެ) ވިދާޅުވެއްޖެ އެވެ.
ގައުމުގެ ބޮޑެތި މައްސަލަތަކަށް ވާހަކަ ދެއްކުމުގެ މަގުސަދުގައި "އަދަދު" ނޫހުން ފެށި "އަދަދު ޑިބޭޓްސް" ޝޯގެ ފުރަތަމަ އެޕިސޯޑުގައި ވަހީދު ވަނީ ސަރުކާރު ހިންގާ ޕީއެެންސީގެ ތެރެއިން ފެންނަ ބައެއް ކަންކަމަށް ވަރަށް ބޮޑަށް ފާޑުވިދާޅުވެފަ އެވެ.
ސަރުކާރުގެ ހިދުމަތް ދެވޭނީ ރައްޔިތުންގެ މަޖިލީހުގެ އަގުލަބިއްޔަތު ސަރުކާރަށް ދިނުމުން ކަމަށް ދެކެވޭ ވާހަކައިގެ މައުޟޫއުގައި ވާހަކަ ދައްކަވަމުން ވަހީދު ވިދާޅުވީ އެއީ ގާނޫނު އަސާސީއާ ހިލާފު ވާހަކަތަކެއް ކަމަށެވެ. ގާނޫނު އަސާސީގެ ދެވަނަ ބާބުގައި ބަޔާން ކުރާ ހައްގުތަކާއި ހިދުމަތްތަކަކީ އެއްވެސް ތަފާތު ކުރުމެއް ނެތި، ސަރުކާރަކުން ފޯރުކޮށްދޭން ޖެހޭ ކަންކަން ކަމަށް އޭނާ ވިދާޅުވި އެވެ.
"މަޖިލިސް ލިބިގެންނޭ ވެރިކަން ކުރެވޭނީ، އެއަށް ވުރެ ގާނޫނު އަސާސީއާ ހިލާފު ވާހަކައެއް ނޯންނާނެ، ޑިމޮކްރެސީއާ ވަރަށް ބީރައްޓެހި ވާހަކައެއް އެއީ،" ވަހީދު ވިދާޅުވި އެވެ.
އޭނާ ވިދާޅުވީ ރައްޔިތުންނަށް ފޯރުކޮށްދޭން ޖެހޭ މުހިންމު ހިދުމަތަކާއި ނުވަތަ ރައްޔިތުންނަށް ފައިދާވާ ކަމެއްގައި، ހުޅުވާލެވިފައިވާ މަޝްވަރާއެއްގައި، މަޖިލީހުގެ އެއްވެސް މެންބަރަކަށް ދެކޮޅު ހަދަން ނުކެރޭނެ ކަމަށެވެ. އެކަމަކު ސަރުކާރުން ފެންނަނީ ޒާތީ މަސްލަހަތެއްގައި މަސައްކަތް ކުރާ މަންޒަރު ކަމަށް ވެސް އޭނާ ވިދާޅުވި އެވެ.
އޭގެ މިސާލެއްގެ ގޮތުގައި އޭނާ ދެއްކެވީ، މަޖިލިސް އިންތިހާބާ ދިމާކޮށް ވެރިކަންކުރާ ޕީއެންސީން ބޭއްވި ޕެނަލް ޑިސްކަޝަނެވެ. ޕީއެންސީ އަދި ސަރުކާރުގެ ވެސް އިސް މަގާމުތައް ފުރުއްވާ ބޭފުޅުންގެ އެ ބައްދަލުވުމުގައި އެއްވެސް ސިޔާސަތެއްގެ ވާހަކަ ނެތް ކަން ފާހަގަ ކުރެއްވި އެވެ.
"ޕެނަލް ޑިސްކަޝަން މި ކިޔަނީ ރައްޔިތުންގެ ތެރޭގައި އޮތް ބޮޑު ކަންބޮޑުވުމަކަށް، މުޖުތަމައުގައި އޮތް މައްސަލައަކަށް، މައުޟޫއެއް ކަނޑައަޅައިގެން، ރައްޔިތުން ވެސް އޭގައި ބައިވެރިކޮށްގެން، އެހެންވެ ވަރަށް ޝައުގުވެރިވެގެން މި ބަލައިލީ، މި ދައްކަނީ ރައީސް ޔާމީނުގެ ވާހަކަ، މެޑަމް ފާތުމަގެ ވާހަކަ،" ވަހީދު ވިދާޅުވި އެވެ.
މަޖިލީހުގެ އަގުލަބިއްޔަތު ލިބުމުން ހުށަހަޅާނެ ގާނޫނުތަކާއި އިސްލާހުތަކުގެ އެއްވެސް ހުށަހެޅުމެއް ސަރުކާރުގައި ނެތް ކަމަށެވެ. 200 ބިލެއްގެ ވާހަކަ ދެއްކި ނަމަވެސް އޭގެ އެއްވެސް ތަފުސީލެއް، ކުޑަމިނުން އޭގެ ނަން ވެސް ނޭނގޭ ކަން އޭނާ ފާހަގަކުރެއްވި އެވެ.
ޑިމޮކްރެޓިކް ޕާޓީއެއް ގޮތުގައި ޕީއެންސީ ނުހިނގާ ކަމުގެ ދެވަނަ މިސާލަކަށް އޭނާ ދެއްކެވީ މަޖިލިސް އިންތިހާބަށް ޕީއެންސީގެ ކެންޑިޑޭޓުން ކަނޑައަޅަން ޕްރައިމަރީއެއް ބޭއްވި ނަމަވެސް ޕްރައިމަރީން މޮޅުވި ކެންޑިޑޭޓުގެ ބަދަލުގައި ބަލިވި ކެންޑިޑޭޓަކަށް ނޫނީ ރައީސްގެ ގާތް މީހަކަށް ތާއީދު ކުރާ ކުރުމެވެ.
"ޑިމޮކްރެޓިކް އެއްވެސް ކަމެއް ގަބޫލު ކުރުމެއް ނެތް، ގައުމުގައި މި ހުރި މައްސަލަތައް ހައްލު ކުރަން ބޭނުން ވަންޏާ، އަޅުގަނޑަކަށް ނުފެނޭ، ޕީއެންސީގެ ކެންޑިޑޭޓުންނަށް ވޯޓު ދޭކަށް،" އޭނާ ވިދާޅުވި އެވެ.
