ކުރީގެ ޓޫރިޒަމް މިނިސްޓަރު އަލީ ވަހީދަށް ކުރެވޭ ޖިންސީ ފުރައްސާރަ އާއި ރޭޕުގެ ތުހުމަތުތަކަށް ފާޑުވިދާޅުވުމަށް ފަހު، އެ މައްސަލާގައި ހިމެނޭ މި ސަރުކާރުގެ މަގާމެއްގައި ހުރި މުހައްމަދު ހުއްސާން އާ ޖެހުމުން އޭނާއަށް ފިޔަވަޅު އަޅާނީ ތުހުމަތުތައް ސާބިތުކޮށްދެވޭ ނަމަ ކަމަށް ޕީއެންސީގެ ތަރުޖަމާނު ހީނާ ވަލީދު ވިދާޅުވެއްޖެ އެވެ.
އަލީ ވަހީދުގެ މައްޗަށް ޓޫރިޒަމް މިނިސްޓްރީގެ ގިނަ އަންހެން މުވައްޒަފުން ތަކަކަށް ޖިންސީ ގޯނާ ކުރި ކަމުގެ ތުހުމަތު ކުރެވުނީ 2021 ގަ އެވެ. އޭރު ރައީސް އިބްރާހިމް ސޯލިހުގެ އަރިހަށް އެ މުވައްޒަފުންގެ ގޮސް ތުހުމަތުތައް ކިޔައިދިނުމުން އަލީ ވަހީދު އިސްތިއުފާ ދިނުމަށް ސޯލިހު އެންގެވި އެވެ.
އޭނާގެ މައްސަލަ ފުލުހުން ތަހުގީގުކޮށް ޕީޖީއަށް ފޮނުވާ ކޯޓުގައި މައްސަލަ ބަލަން މަސައްކަތް ކުރި ނަމަވެސް، ކޯޓުން ބޭސްފަރުވާއަށް ހުއްދަ ދިނުމުން، އަލީ ވަހީދު އިނގިރޭސިވިލާތަށް ގޮސް، ހެކިބަސްތަކާއި ދައުވާ އަނބުރޭ ގެންދަންދެން ހުރީ އެ ގައުމުގަ އެވެ.
އަލީ ވަހީދު އެނބުރި އައީ މިދިޔަ އަހަރެވެ. އެފަހުން ރިޔާސީ އިންތިހާބުގައި ޖުމްހޫރީ ޕާޓީގެ ކެންޑިޑޭޓު ގާސިމް އިބްރާހިމްގެ އިންތިހާބީ އެޖެންޓެއްގެ ގޮތުގައި މަސައްކަތް ކުރެއްވުމަށް ފަހު މިހާރު ހުންނެވީ އެމްޑީޕީގެ ޓިކެޓުގައި މަޖިލީހަށް ކުރިމަތިލައިގެންނެވެ.
މި މައްސަލަ މި ފަހުން އަނެއްކާވެސް ފެންމަތިވީ، އޭރު އަނިޔާ ލިބުނު މީހުން ފުލުހުންނަށް ދިން ބަޔާންތައް ލީކުވި ހިސާބުންނެވެ. އެ ބަޔާންތަކުގައި އަލީ ވަހީދަށް ރޭޕުގެ ތުހުމަތާއި ފުރައްސާރައިގެ އިތުރު ތުހުމަތުތަކެއް ކުރެވޭއިރު، އެ ކަންކަން ކުރުމަށް އަލީ ވަހީދަށް މަގުފަހިކޮށްދިނުމާއި މަސްތުވާތަކެތި ދޭން އުޅުނުކަމުގެ ތުހުމަތު ހައްސާނަށް ކުރެވެ އެވެ.
އޭރު ހައްސާން ހުރީ ޓޫރިޒަމް މިނިސްޓްރީގެ ޕޮލިޓިކަލް ޑިރެކްޓަރުގެ މަގާމުގަ އެވެ. މިހާރު އޭނާ ހުރީ ރައީސް އޮފީހުގެ އެސިސްޓެންޓު އަންޑަ ސެކްރެޓަރީގެ މަގާމުގަ އެވެ. އިވެންޓުތަކުގައި ރައީސް ޑރ. މުހައްމަދު މުއިއްޒުގެ އެންމެ އަރިހުގައި އޭނާ ހަރަކާތްތެރިވެ އެވެ. މި ސަރުކާރުން ވަނީ ހައްސާނަށް އައިލެންޑު އޭވިއޭޝަންގެ ބޯޑު މެންބަރަކަށް ވެސް އައްޔަންކޮށްފަ އެވެ.
މިކަމާ ގުޅިގެން ޕީއެންސީގެ ތަރުޖަމާނާ މިއަދު ސުވާލުކުރުމުން ވިދާޅުވީ މިފަދަ މައްސަލަތަކުގައި ފިޔަވަޅު އަޅާއިރު ރައީސް މުއިއްޒު އެއްވެސް ވަރަކަށް ތަފާތު ނުކުރައްވާނެ ކަމަށެވެ. ނަމަވެސް އެ ތުހުމަތުތައް ސާބިތުވާން ޖެހޭނެ ކަމަށް އޭނާ ވިދާޅުވި އެވެ.
"ސަރުކާރުގެ ސްޓޭންޑަކީ އެކަމުގަ އެއްވެސް ކަހަލަ މައްސަލައެއް އަޅުގަނޑުމެންނަށް ސާބިތުކުރެވޭ ފަރާތެއްވާނަމަ، ސަރުކާރުގެ ސްޓޭންޑަކީ އެ ފަރާތްތަކަށް އެ ލިބެންޖެހޭ އަދަބު ލިބޭނެ" ހީނާ ވިދާޅުވި އެވެ.
މީގެ އިތުރުން މި މައްސަލާގައި ނޫސްވެރިން ސުވާލު ކުރަންވީ ޕީޖީ އޮފީހާ ކަމަށާއި ސަބަބަކީ ދައުވާތައް އަނބުރާ ނެގީ ޕީޖީއިން ކަމަށް ވާތީ ކަމަށެވެ. ނަމަވެސް ނޫސްވެރިން ވަނީ ތުހުމަތު ކުރެވޭ ފަރާތްތައް ސަރުކާރުން ސަސްޕެންޑު ނުކޮށް މި ސަރުކާރުން އެ މައްސަލަ ނުބަލަނީ ކީއްވެތޯ ސުވާލުކޮށްފަ އެވެ.
އެ ސުވާލަށް ޖަވާބުދެއްވަމުންވެސް ހީނާ ވިދާޅުވީ، ޕީޖީއިން އެ މައްސަލާގައި ދައުވާ ކުރައްވަން ޖެހޭ ކަމަށާއި ނޫސްވެރިން ސުވާލު ކުރަން ޖެހޭނީ ޕީޖީ އަށް ކަމަށެވެ. "ސަރުކާރުން އެކަމާ ވިސްނަވާފަ އަޅުއްވަން ޖެހޭ ފިޔަވަޅެއް އަޅުއްވާނަން" ނޫސްވެރިން އެ ސުވާލު ތަކުރާރު ކުރި ހިސާބުން ހީނާ ވިދާޅުވި އެވެ.
