ވެރިކަންކުރާ ސިޔާސީ ޕާޓީ، ޕީއެންސީގެ މަޖިލިސް ޕްރައިމަރީއާ ގުޅިގެން ޕާޓީ އެތެރޭގައި އުފެދިފައިވާ ފަސާދަ އެއްފަރާތްކޮށް، ކުރިއަށް އޮތް 20 ވަނަ ރައްޔިތުންގެ މަޖިލީހުގެ އިންތިހާބުގެ އަޣުލަބިއްޔަތު ހޯދަން މެންބަރުން އެކަތިގަނޑަކަށް ވުމަށް، ރައީސް ޑރ. މުހައްމަދު މުއިއްޒު ގޮވާލައްވައިފި އެވެ.
ގއ. ވިލިނގިލީ ދާއިރާއަށް ޕީއެންސީގެ ޓިކެޓުގައި ވާދަކުރާ ކެންޑިޑޭޓު ޔަޒްމީދު މުހައްމަދު އަށް ތާއިދު ހޯދަން ރޭ މާލޭގައި ބޭއްވި ޖަލްސާގައި ރައީސް މުއިއްޒު ވިދާޅުވީ ވޭތުވެދިޔަ ހަތަރު މަސް ދުވަސް ހިޔާލު ތަފާތުވުމުގައި ދިޔަ ނަމަވެސް، އެކަންތައްގަނޑު ދޫކޮށް، އެކުވެރިވާން ޖެހޭ ކަމަށެވެ.
އެކަތިގަނޑަކަށް ނުވެއްޖެ ނަމަ ވިލިނގިލީ ގޮނޑީގެ އިތުރުން އެހެން ބައެއް ދާއިރާތަކުގެ ގޮނޑި ގެއްލިގެން ދިޔުމުގެ ފުރުސަތު އޮންނާނެ ކަމަށާއި އެހެންވެ، ރިޔާސީ އިންތިހާބުގައި ވިލިނގިލީ ދާއިރާއިން އެ މަނިކުފާނަށް ދިން މެޖޯރިޓީ އާއި އެ ދާއިރާއިން ދެއްކި އެކުވެރިކަން މަޖިލީސް އިންތިހާބަށް އިޔާދަކުރަން ޖެހޭ ކަމަށް ވެސް ރައީސް ވިދާޅުވި އެވެ.
"މިރެއިން ފެށިގެން ހުރިހާ ހިޔާލު ތަފާތުވުމެއް ދޫކޮށްލައްވާފައި، ޒާތީ ތައައްސުބު އެއްކައިރި ކުރައްވާފައި، ހުރި ކޮންމެ ހިތްހަމަ ނުޖެހުމެއް ވިޔަސް އެއްކައިރި ކުރައްވާފައި ޕާޓީއަށްޓަކައި، ގައުމަށްޓަކައި އަޅުގަނޑަށް ތި ކުރައްވާ އިތުބާރަށްޓަކައި އެންމެން އެކަތިގަނޑަކަށް ވެވަޑައިގަންނަވާ،" ރައީސް ވިދާޅުވި އެވެ.
އެ މަނިކުފާނު ވިދާޅުވީ މިއީ ހިޔާލު ތަފާތުވާންވީ ވަގުތެއް ނޫން ކަމަށާއި އޮންނާންވީ ހެޔޮ ކަންކަމުގައި އެކަތި ގަނޑަކަށް ވުމުގެ އާދަ ކަމަށާއި ރަށުގެ ތަރައްގީ ކުރިމަތީގައި އޮތްއިރު، އެކަން ބޭކާރުކޮށްލުމަކީ ހެޔޮ ކަމަކަށް ނުވާނެ ކަމަށެވެ. މިކަމުގައި ގައުމާއި ދާއިރާ އާއި ރަށުގެ މަސްލަހަތު އިސްކުރަންޖެހޭ ކަމަށް ވެސް އެ މަނިކުފާނު ވިދާޅުވި އެވެ.
"[އެ މަސްލަހަތު] އިސްކޮށްގެން އެކުވެރިކަމާ އެކީގައި މަސައްކަތް ކުރުމަކީ އަޅުގަނޑުމެންނަށް މި އިންތިހާބު ކާމިޔާބު ކުރުމަށް މުހިއްމު ކަމެއް،" ރައީސް ވިދާޅުވި އެވެ.
ޖެނުއަރީ މަހު ބޭއްވި ޕީއެންސީގެ ޕްރައިމަރީގައި ވާދަކުރަން ހުށަހެޅި ބައެއް މީހުންގެ ކެންޑިޑެސީ ބާތިލުކުރީ ފިތުނަ އުފެއްދި ކަމަށް ތުހުމަތު ކުރުމަށް ފަހު އެވެ. އަދި ބައެއް ކެންޑިޑޭޓުންގެ ކެންޑިޑެސީ ބާތިލުކުރީ ޕާޓީއަށް އެކަށީގެންވާ ހިދުމަތެއް ކޮށްދީފައިނުވާ ކަމަށް ބުނެ އެވެ.
ކެންޑިޑެސީ ބާތިލުކުރި މައްސަލަ ބޮޑުވުމާ ގުޅިގެން އެ ސިޓީތައް ބާތިލުކޮށް ހުރިހާ ކެންޑިޑޭޓުނަށް ޕްރައިމަރީގައި ވާދަ ކުރެވޭ ގޮތް ޕީއެންސީގެ ލީޑަޝިޕުން ހެދި ނަަމަވެސް، ޕްރައިމަރީ ކާމިޔާބު ކުރި ބައެއް ކެންޑިޑޭޓުންނަށް ރައީސް މުއިއްޒު ތާއިދެއް ނުކުރައްވަ އެވެ.
އެ ޕާޓީގެ އަސާސީ ގަވާއިދުގައިވާ ގޮތުން "ޕާޓީގެ ޓިކެޓުގައި އާންމު އިންތިހާބުތަކަށް ވާދަކުރާ ކެނޑިޑޭޓުންނަށް ތާއީދު ހޯދާދިނުމާއި، އެކެނޑިޑޭޓުންނަށް ވޯޓު ދިނުން،" އެއީ ޕާޓީގެ ކޮންމެ މެންބަރަކަށް ވާޖިބު ކަމެކެވެ.
"ޕާޓީގެ މައިގަނޑު މަގުސަދުތަކާ ހިލާފުވާ ފަރާތްތަކާއި، ޕާޓީގެ ސިޔާސަތުތަކާ ދެކޮޅަށް މަސައްކަތްކުރާ ފަރާތްތަކާ، ޕާޓީގެ މެންބަރުންގެ ވާޖިބުތައް އަދާކުރަން އުޒުރުވެރިވާ ފަރާތްތަކާއި، ގާނޫނާ ހިލާފު ބޮޑެތި ކުށްތަކަށް އަރައިގަންނަ ފަރާތްތަކާމެދު ސުލޫކީ ފިޔަވަޅު އެޅުމުގެ އިހުތިޔާރު ޕާޓީއަށް ލިބިގެން" ވާ ކަމަށް ވެސް އަސާސީ ގަވާއިދުގައި ބުނެފައިވެ އެވެ.
ނަމަވެސް ރައީސް މުއިއްޒު ގެންދަވަނީ ޕީއެންސީގެ ޓިކެޓު ލިބުނު ބައެއް ކެންޑިޑޭޓުން އެއް ފަރާތްކޮށް، ޕްރައިމަރީން ބަލިވި ކެންޑިޑޭޓުންގެ ތެރެއިން އަމިއްލަ ގޮތުން ވާދަކުރާ ބައެއް ކެންޑިޑޭޓުންނަށް ތާއިދު ކުރައްވަމުންނެވެ.
ބައެއް ކެންޑިޑޭޓުން އަމިއްލަ މަސްލަހަތު އިސްކުރާ ކަމަށާއި އެހެންވެ އެ މަނިކުފާނު ތާއީދު ކުރައްވާ ކެންޑިޑޭޓުން ހޮވައިދިނުމަށް އެމަނިކުފާނު ވަނީ އަންގަވައިފަ އެވެ.
މާލޭގެ ދާއިރާތަކުގެ ތެރެއިން ގަލޮޅު އުތުރު ދާއިރާގެ ޕީއެންސީގެ ޓިކެޓު ލިބިފައިވާ ކެންޑިޑޭޓަކު ހުއްޓައި، ރައީސް މުއިއްޒު ތާއިދު ކުރައްވަނީ ޕްރައިމަރީގައި އެންމެ 30 ވޯޓު ލިބުނު އާމިނަތު މިޔާދާ (އާނަ) އަށެވެ. މައްޗަންގޮޅި މެދު ދާއިރާއަށް ޕީއެންސީގެ ޓިކެޓު ލިބުނު މުހައްމަދު އަބްދުލްގާދިރު (ކޫކު)ގެ ބަދަލުގައި، ރައީސް މުއިއްޒު ތާއިދު ކުރެއްވީ ޕްރައިމަރީން ބަލިވި އަހުމަދު ޒަމީރަށެވެ. ނަމަވެސް މިހާރު މުހައްމަދު އަބްދުލްގާދިރު ވަނީ ޒަމީރަށް ތާއިދުކުރަން ނިންމައިފަ އެވެ.
އަތޮޅުތަކުގެ ބައެއް ދާއިރާތަކަށް ވާދަކުރަން ޕީއެންސީގެ ޓިކެޓު ލިބިފައިވާ ކެންޑިޑޭޓުން ދޫކޮށް، އެހެން ކެންޑިޑޭޓުންނަށް ވެސް ރައީސް މުއިއްޒު އެބަ ތާއިދު ކުރައްވަ އެވެ.
