އެ މަނިކުފާނު މިނިވަން ކުރުމަށް ރައީސް ޑރ. މުހައްމަދު މުއިއްޒު ކުރައްވާ މަސައްކަތެއް ނެތް ކަމަށާއި، ހައި ކޯޓުގައި އޮތް އިސްތިއުނާފު މައްސަލަ ވެސް ލަސްކުރަނީ މި ސަރުކާރުން "އަތް ބާނައިގެން" ކަމަށް ވިދާޅުވެ، ރައީސް މުއިއްޒަށް، ކުރީގެ ރައީސް އަބްދުﷲ ޔާމީން ފާޑުވިދާޅުވެއްޖެ އެވެ.
ޔާމީން ފަހަތުގައި ހުންނަވައިގެން އުފައްދަވާ ސިޔާސީ ޕާޓީ، ޕީއެންއެފުގެ ތާއީދާއެކު، އަމިއްލަ ކެންޑިޑޭޓުންގެ ގޮތުގައި، ކުރިއަށް އޮތް 20 ވަނަ ރައްޔިތުންގެ މަޖިލީހަށް ވާދަކުރާ ފަރާތްތަކަށް ތާއިދު ހޯދުމަށް އެ ޕާޓީގެ އޮފީހުގައި ރޭ ބޭއްވި ޖަލްސާގައި ޔާމީން ވިދާޅުވީ ރައީސް މުއިއްޒު ރައްޔިތުންނާ ބައްދަލު ކުރެއްވުމަށް ގޭގެ އަށް ވަޑައިގަތުމުން، އެ މަނިކުފާނު މިނިވަން ނުވެ ހުރި ސަބަބާ ގުޅޭ ގޮތުން ސުވާލު ކުރާ ކަމަށެވެ. އެ ސުވާލަށް ރައީސް މުއިއްޒު ދެއްވާ ޖަވާބަކީ "ތިމަންނަން ހާދަ މަސައްކަތެއް އެކަމުގައި ކުރަމޭ" ކަމަށް ވެސް ޔާމީން ވިދާޅުވި އެވެ.
"މުއިއްޒު ކުރައްވާ މަސައްކަތެއް ނޯންނާނެ އަޅުގަނޑު މިނިވަން ކުރާކަށް. އަޅުގަނޑަށް އެނގިފައި އޮތް ގޮތުން ކަމަށް ވަންޏާ ސަރުކާރުގެ މަތީ ފަންތިން އަތް ބާނައިގެން އަޅުގަނޑުގެ ޝަރީއަތް މިހާތަނަށް ވެސް ލަސްކުރީ،" ޔާމީން ވިދާޅުވި އެވެ.
ޔާމީން މިގޮތަށް ތުހުމަތު ކުރެއްވިއިރު، ރައީސް މުއިއްޒު ކުރިން ވިދާޅުވެފައި ވަނީ ޔާމީނަށް އިންސާފު ލިބުމަށް ހުރަސް އަޅާނެ އެއްވެސް މީހަކު މި ސަރުކާރުގައި ނުހުންނާނެ ކަމަށެވެ.
"އެއްވެސް ވަޒީރަކު, އެއްވެސް ކުންފުންޏެއްގެ ވެރިއަކު, އެއްވެސް އެމްޕީއަކު, ސަރުކާރުގެ އެއްވެސް މީހަކު ކޯޓުގައި ހިނގާ އެއްވެސް ކަމަކަށް ނުފޫޒެއް ނުފޯރުވާނެ. އެ ޔަގީންކަން އަޅުގަނޑަށް އެބައޮތް. ކޯޓުތައް އެ ހިނގަނީ އެއްވެސް ނުފޫޒެއް ނެތި،" އައްޑޫ ސިޓީއަށް ކުރެއްވި ދަތުރުގައި ތެރެއިން ހިތަދޫ އަދި ފޭދޫ ރައްޔިތުންނާއެކު ބޭއްވި ބައްލުވުމުގައި ރައީސް މުއިއްޒު ވިދާޅުވި އެވެ.
ވ. އަތޮޅު އާރަށް ކުއްޔަށް ދޫކުރުމުގައި ހިންގި ކަމަށް ބުނާ ހިޔާނާތުގެ މައްސަލާގައި, ކުރީގެ ރައީސް އަބްދުﷲ ޔާމީނަށް އިއްވި ޖަލު ހުކުމުގެ އިސްތިއުނާފުގެ އަޑުއެހުންތައް ހައި ކޯޓުގައި ނިންމާލިތާ ހަތަރު މަސް ވަނީ ވެފަ އެވެ.
ޔާމީނުގެ ވެރިކަމުގައި ހިނގި އެމްއެމްޕީއާރުސީގެ ބޮޑު ހިޔާނާތުގެ މައްސަލާގައި ހިމެނޭ އެ މުއާމަލާތުގެ ތެރެއިން، 1.1 މިލިއަން ޑޮލަރުގެ ރިޝްވަތު ނަންގަވައި އެ ފައިސާ ލޯންޑާކުރެއްވި ކަމުގެ ތުހުމަތުގައި އުފުލި ދައުވާތައް ސާބިތުވާ ކަމަށް ކަނޑައެޅުމަށް ފަހު އަދަބެއްގެ ގޮތުގައި ކްރިމިނަލް ކޯޓުން އިއްވީ 11 އަހަރުގެ ޖަލު ހުކުމެކެވެ. އަދި ފަސް މިލިއަން ޑޮލަރުގެ ޖޫރިމަނާއެއް ދެއްކުމަށެވެ.
ހައި ކޯޓުގައި އެ ހުކުމް އިސްތިއުނާފުކޮށް ހިންގި ޝަރީއަތުގައި، އެންމެ ފަހުން އަޑުއެހުމެއް ބޭއްވީ ނޮވެމްބަރު 21، 2023 ގަ އެވެ. އެ ދުވަހު ކުރިއަށް ގެންދިޔައީ މައްސަލައިގެ ފަހު ބަސް އިއްވުމެވެ. ދެން އޮތީ ހުކުމް އިއްވުމެވެ.
މާފުށީ ޖަލުގައި ހުކުމް ތަންފީޒު ކުރައްވަމުން ގެންދަވަނިކޮށް ޔާމީން ގެއަށް ބަދަލު ކުރީ ރިޔާސީ އިންތިހާބަށް ފަހު އެވެ. އެއަށް ފަހު އެ މަނިކުފާނަށް މާލޭގައި ހަރަކާތްތެރިވެވޭ ގޮތަށް ލުއި ދިނެވެ.
މިހާރު ހުކުމް ތަންފީޒު ކުރަމުން ގެންދަވާ މައްސަލައިގެ އިތުރުން، ރ. ފުއްގިރި ކުއްޔަށް ދޫކުރުމުގައި ހިންގި ކަމަށް ބުނާ ހިޔާނާތުގެ މައްސަލާގައި ވެސް ޔާމީންގެ މައްޗަށް ރިޝްވަތާއި މަނީ ލޯންޑަރިންގެ ދައުވާ އުފުލާފައިވެ އެވެ. އެ ޝަރީއަތް ކްރިމިނަލް ކޯޓުގައި ފަށައި އަޑުއެހުންތަކެއް ވެސް ބޭއްވި އެވެ. ނަމަވެސް ފަހުން އެ މައްސަލައިގެ އަޑުއެހުމެއް ވެސް ބާއްވާފައެއް ނުވެ އެވެ.
ރިޔާސީ އިންތިހާބުގައި ރައީސް މުއިއްޒު އެންމެ ބޮޑަށް ވިއްކި ވާހަކަ އަކީ ޔާމީން މިނިވަން ކުރުމުގެ ވާހަކަ އެވެ. ނަމަވެސް ވެރިކަމުގެ ހުވާ ކުރެއްވުމުގެ ކުރިން އެ ދެ ބޭފުޅުންގެ ގުޅުން ކެނޑުނެވެ.
ޔާމީން ވިދާޅުވީ ރައްޔިތުން އެދޭ ފަދަ ވެރިކަމެއް ރައީސް މުއިއްޒަށް ނުކުރެއްވޭ ކަމަށެވެ. ޕީއެންއެފްއިން ޖަލްސާތައް ބާއްވަން ޖެހެނީ އެކަންކަން ފުރިހަމަ ނުވާތީ ކަމަށް އެ މަނިކުފާނު ވިދާޅުވި އެވެ. އެކަމުގެ އެއް މިސާލެއްގެ ގޮތުގައި ނެންގެވީ ހުއްޓިފައިވާ ރަސްމާލެ މަޝްރޫއު އެވެ.
ރަސްމާލެ މަޝްރޫއަކީ މާލޭ ސަރަހައްދުން ރައްޔިތުންނަށް ބޯހިޔާވެހިކަން ދިނުމަށް ރައީސް މުއިއްޒުގެ މެނިފެސްޓޯގައި ހިމަނައިގެން ފެށި، އެ މަނިކުފާނުގެ އެންމެ ބޮޑު މަޝްރޫއެވެ. އެ މަޝްރޫއުގެ ބިން އަށް މަސް ދުވަސްތެރޭގައި ހިއްކައި ނިންމާނެ ކަމަށް ރައީސް މުއިއްޒު ވިދާޅުވި ނަމަވެސް، މަޝްރޫއު މިހާރު ހުއްޓިފައިވާ ކަމަށް އެންމެ ފަހުން ސަރުކާރުން ވަނީ އެއްބަސްވެފަ އެވެ.
