އޭޕްރީލް 21، ގައި އޮންނަ ރައްޔިތުންގެ މަޖިލީހުގެ އިންތިހާބުގެ ކެމްޕެއިނުގައި ވެރިކަންކުރާ ޕީއެންސީއިން ކުރިއަށް ގެންދާ ޑޯ ޓު ޑޯ ހަރަކާތުގެ ތެރެއިން ރައީސުލްޖުމްހުރިއްޔާގެ އޮފީހުގެ ރަސްމީ ކަރުދާހުގައި ބަންދުކޮށްފައިވާ ހަދިޔާ ބަހަމުންދާކަން އެނގިއްޖެ އެވެ.
ރައީސް ޑރ. މުހައްމަދު މުއިއްޒު މި މަހުގެ ތެރޭ މާލޭގެ އެކި ދާއިރާތަކުގައި ކުރިއަށް ގެންދަވާ ޑޯ ޓު ޑޯ އިވެންޓުތަކުގެ ތެރެއިން ރަސްމީ ކަރުދާހުގައި ހަދިޔާ ބަހާ ފޮޓޯތަކެއް ވެސް ވަނީ އާންމުކޮށްފަ އެވެ.
މީގެ ކުރިން ރަސްމީ ހަފުލާތަކުގައި އަދި ރަސްމީ އިވެންޓުތަކުގައި ދޭ ރަސްމީ އިނާމުތައް ބަންދުކުރާ މި ކަރުދާހުގައި ބަންދުކޮށްފައިވަނީ ކޮން އެއްޗެއްކަން ސާފެއްނުވެ އެވެ. ނަމަވެސް މި ހަދިޔާ ބަހާފައިވަނީ އިއްޔެގެ ޑޯޓުޑޯ އިވެންޓުގެ ތެރެއިން ކަމަށް ބުނެ ބަޔަކު ވަނީ ސޯޝަލް މީޑިއާގައި ކަންބޮޑުވުން ފާޅުކޮށްފަ އެވެ.
އެކަމާ ގުޅިގެން ރައީސް އޮފީހުގެ ކޮމިއުނިކޭޝަން މިނިސްޓަރު އިބްރާހިމް ހަލީލު "އަދަދު" އާ ވާހަކަ ދައްކަވަމުން ވިދާޅުވީ، ކެމްޕެއިނު ހަރަކާތެއްގައި ބައިވެރިވެވަޑައިގެންނެވި ނަމަވެސް ރައީސުލްޖުމްހުރިއްޔާ ހުންނަވާނީ އެމަނިކުފާނުގެ މަގާމުގައި ކަމަށާއި އެއީ 24 ގަޑިއިރު އަދާކުރައްވާ ވަޒީފާއެއް ކަމަށެވެ.
އެއީ ޕީއެންސީގެ ޑޯ ޓު ޑޯ އިވެންޓެއްގެ ތެރެއިން ހިނގި ކަމެއް ނޫންތޯ އެހުމުން ހަލީލު ވިދާޅުވީ، "އެއީ ދެން ތިބޭފުޅުން ސިފަކުރައްވާ ގޮތް" ކަމަށެވެ.
"ރައީސުލްޖުމްހުރިއްޔާ އޭ އެއީ 24 ގަޑިއިރު، ރައީސުލްޖުމްހުރިއްޔާގެ ހައިސިއްޔަތުން އެންމެ ސިކުންތަކަށްވެސް ނުގެއްލޭ،" ހަލީލު ވިދާޅުވި އެވެ.
އިންތިހާބުތަކާ ބެހޭ އާންމު ގަވާއިދުގެ 19 ވަނަ މާއްދާގެ ހ. ގެ 14 ގައި ވަނީ "ވަކި މީހަކަށް ވޯޓު ލުމަށް ނުވަތަ ނުލުމަށް ބުނެ ރިޝްވަތުގެ ގޮތުން އެއްވެސް މީހަކަށް ފައިސާ ނުވަތަ ހަދިޔާ ދީ ހަދައިގެން ނުވާނެ، އަދި މާލީގޮތުން ނުވަތަ މާއްދީގޮތުން ފައިދާއެއް ވެދާނެ ފަދަ އެއްވެސް ކަމެއް ކޮށްދީގެން އަދި ކޮށްދިނުމަށް ހުށަ ހަޅައިގެންވެސް ނުވާނެ" ކަމަށެވެ.
މަޖިލިސް އިންތިހާބާ ގުޅޭ އަށް މައްސަލައެއް ތަހުގީގު ކުރަމުންދާ ކަމަށް އެންޓި ކޮރަޕްޝަން ކޮމިޝަން (އޭސީސީ) އިން ވަނީ މި މަހުގެ މާޗު، 30 ގައި ވަނީ ބުނެފަ އެވެ.
އިންތިހާބާ ގުޅޭ ގޮތުން ހުށަހަޅާފައިވާ މައްސަލަތަކުގެ ތެރޭގައި ދައުލަތުގެ ވަސީލަތްތައް ބޭނުން ކޮށްގެން ކެމްޕެއިނު ކުރުމާއި ކެމްޕެއިނު ކުރުމުގައި ރިޝްވަތު ހުށަހެޅުމުގެ އިތުރުން އިންތިހާބުގައި ވާދަކުރާ ކެންޑިޑޭޓުންގެ ހައްގަށް އުނިކަން ލިބޭ ގޮތަށް ކެމްޕޭނު ކުރުމުގެ މައްސަލަތައް ހިމެނޭ ކަމަށް އޭސީސީގެ މީޑިއާ އޮފިޝަލް ހަސަން މަނިކު "އަދަދު" އަށް ވިދާޅުވި އެވެ.
