މި ސަރުކާރުން އަލަށް އެއާޕޯޓު އަޅަން ނިންމި ރަށްރަށާއި ފަޅުތަކުގެ ތެރޭގައި ހިމެނޭ ނ. ވިހަފަރަކީ ރިސޯޓެއް ކުއްޔަށް ދިނުމުގެ އެއްބަސްވުމެއްގެ ދަށުން ބަޔަކަށް ދީފައި އޮތް ފަޅެއް ކަން ހާމަވެއްޖެ އެވެ.
ވިހަފަރަކީ ދައުލަތުގެ އާންމު މަންފާއެއް ހާސިލުކުރަން ބޭނުންވޭ އިގުތިސާދީ ސިޔާސަތެއްގެ ދަށުން ހިންގޭނެ މުހިންމު މަޝްރޫއުތަކުގެ ތެރެއިން އެއާޕޯޓު އަޅަން ރާވާފައިވާ ނުވަ ތަނުގެ ތެރެއިން ފަޅެކެވެ.
ނަމަވެސް "އަދަދު" އިން އިތުރަށް ބެލި ބެލުމުން އެނގުނު ގޮތުގައި އެ ފަޅު އޮތީ، އެމްއެމްޕީއާރުސީ ހިޔާނާތުގެ ތެރެއިން ދޫކުރި ނ. ރާފުށީގެ އެއްބަސްވުމުގައި ހިމަނައި، އެ ރަށުގައި ތަރައްގީކުރާ ރިސޯޓުގެ ސީޕްލޭން އޮޕަރޭޝަންތަކުގައި ބޭނުންކުރަން ކަމަށް ބުނެ ދޫކޮށްފަ އެވެ.
ވިހަފަރުގައި އެއާޕޯޓެއް އަޅައިދޭނެ ކަމަށް ރައީސް ފުރަތަމަ ވިދާޅުވީ ރިޔާސީ ކެމްޕޭނުގައި ނ. ވެލިދޫގައި ދެއްކެވި ވާހަކައިގެ ތެރެއިންނެވެ.
އެ ދުވަހު ރައީސް ވެސް ވަނީ ވިހަފަރު އޮތީ "ރިސޯޓު ޕްރޮޖެކްޓަކާ ގުޅިގެން ބަޔަކާ ހަވާލުކޮށްފައި" ކަމަށް ވިދާޅުވެފަ އެވެ. އަދި ގާނޫނީ ގޮތުން އެ ފަޅު އަނބުރާ ސަރުކާރަށް ހޯދަން މަސައްކަތް ކުރައްވާނެ ކަމަށާއި އެފަދައިން އެކަން ވެއްޖެ ނަމަ އެ ފަޅު "ސަލާމަތް" ކުރައްވާނެ ކަމަށް ވެސް ރައީސް އެ ދުވަހު ވިދާޅުވި އެވެ.
ނަމަވެސް ވިހަފަރުގައި އެއާޕޯޓު އަޅަން ރައީސްގެ ގަރާރަކުން ނިންމެވިއިރު ވެސް މި ރަށް އަނބުރާ ހޯދުމަށް ސަރުކާރުން އެއްވެސް މަސައްކަތެއް ކުރިކަން އަދި ސާފެއް ނުވެ އެވެ.
ނ. ވިހަފަރު (ކ) އަދި ނ. ރާފުށި (ވ) މެދުގައި ނ. އަތޮޅުގެ އެންމެ އާބާދީ ބޮޑު ރަށް ވެލިދޫ: އެއާޕޯޓު އަޅަން ނިންމާފައިވަނީ ވިހަފަރުގައި - ފޮޓޯ: ގޫގުލް އާތު
ރާފުށި ފުރަތަމަ ކުއްޔަށް ނެގީ ލަންކާގެ އެއިޓްކެން ސްޕެންސް ކުންފުނިން ހިއްސާވާ އޭސް ރިސޯޓްސްއިން ފަސް މިލިއަން ޑޮލަރަށެވެ. އެމްއެމްޕީއާރުސީ ހިޔާނާތާ ގުޅިގެން އެންޓި ކޮރަޕްޝަން ކޮމިޝަން (އޭސީސީ) އިން އާންމުކުރި ތަހުގީގު ރިޕޯޓުގައިވާ ގޮތުގައި މި ފަޅު ދޫކޮށްލީ ސަރުކާރަށް އެއްވެސް ފައިސާއެއް ނުލިބޭ ގޮތަށެވެ.
ފަހުން އޭސް ރިސޯޓްސްއިން ވަނީ، މި ރަށުގައި ރިސޯޓެއް ތަރައްގީކުރުމަށް އެއްވެސް މަސައްކަތެއް ނުކޮށް ބާއްވާފައި، އެ ރަށް ވިއްކާލާފަ އެވެ. މި ރަށާ ގުޅޭ ހުރިހާ ހައްގެއް އޭސްއިން ވިއްކާލީ ސިންގަޕޫރުގެ ހޮޓެލްސް ޕްރޮޕަޓީސް ލިމިޓެޑް (އެޗްޕީއެލް) އިން ހިއްސާވާ ލެޝާ ސޭންޑްސް ޕްރައިވެޓް ލިމިޓެޑަށެވެ.
ރާއްޖޭގައި މިހާރު ވެސް މަތީ ފަންތީގެ ރިސޯޓުތަކެއްގެ އެޗްޕީއެލްއަކީ ސިންގަޕޫރުގެ ބިލިއަނަރު އޮންގް ބެންގް ސެންގްގެ ކުންފުންޏެކެވެ. އޭނާގެ ކުންފުނިން ރާއްޖޭގައި ހިންގާ ރިސޯޓުތަކުގެ ތެރޭގައި ފޯ ސީޒަންސް ރިސޯޓުތަކާއި ސިކްސް ސެންސަަސްގެ ރިސޯޓުތައް ހިމެނެ އެވެ.
އޮންގްއަކީ އެމްއެމްޕީއާރުސީގެ ހިޔާނާތުގެ ތެރެއިން މަންފާވި ކަމަށް އޯގަނައިޒްޑް ކްރައިމް އެންޑް ކޮރަޕްޝަން ރިޕޯޓިން ޕްރޮޖެކްޓް (އޯސީސީއާރުޕީ) ގެ ރިޕޯޓެއްގައި ބަޔާންކޮށްފައިވާ މީހެކެވެ. އޯސީސީއާރުޕީގެ ރިޕޯޓަކީ, ހިޔާނާތުގެ ދުވަސްވަރު ޓޫރިޒަމް މިނިސްޓަރަކަށާއި ފަހުން ނައިބު ރައީސްއަކަށް ހުންނެވި އަހްމަދު އަދީބުގެ ފޯނުގައި ހުރި މައުލޫމާތުތައް އެއްކޮށްގެން އެކުލަވާލި ރިޕޯޓެކެވެ.
މައުލޫމާތު ލިބިފައިވާ ގޮތުގައި އޭސްއިން މި ރަށް ވިއްކާލިއިރު ވިހަފަރު އުނިކުރަން ސަރުކާރުން މަސައްކަތް ކުރި އެވެ. ނަމަވެސް އެކަމެއް ނުވެ އެވެ.
ވިހަފަރުގައި އެއާޕޯޓު އަޅާނަމަ، ދިވެހި ސަރުކާރުން ލެޝާ ސޭންޑްސްއަށް ކޮންމެ ވެސް ކަހަލަ ބަދަލެއް ދޭން ޖެހޭނެ އެވެ. އެއީ މިހާރު އޮތް އެއްބަސްވުމުގައި ވިހަފަރު ހިމަނާފައިވާތީ، އެތަނަށް އެެއްވެސް ފައިސާއެއް ނުދީ އޮތް ނަމަވެސް، އެޗްޕީއެލްގެ ހައްގެއް އޮންނާނެތީ އެވެ.
